Hanuman Trailer: ‘హనుమాన్’ ట్రైలర్ రివ్యూ.. ఈసారి సంక్రాంతికి పెద్ద సినిమాలకు ధీటుగా!

‘బాహుబలి’, ‘పుష్ప’, ‘ఆర్ఆర్ఆర్’, ‘కార్తికేయ’ లాంటి చిత్రాలు ఇచ్చిన ధైర్యంతో చాలా మంది టాలీవుడ్ మేకర్స్ పాన్ ఇండియా సినిమాలపై ఫోకస్ చేస్తున్నారు. లార్జర్ దెన్ లైఫ్​ కంటెంట్​ ఉన్న కథలు రెడీ చేసుకొని భారీ బడ్జెట్స్​, స్టార్ క్యాస్టింగ్​తో నాలుగైదు భాషల్లో పెద్ద ఎత్తున మూవీస్ రిలీజ్​లు చేస్తున్నారు. బడా మేకర్స్ మాత్రమే కాదు.. సరైన స్టోరీ దొరికితే మీడియం, స్మాల్ రేంజ్ డైరెక్టర్స్ కూడా డేర్ చేసి పాన్ ఇండియా సినిమాలు తీసేస్తున్నారు. ఈ క్రమంలో వస్తున్న మరో చిత్రమే ‘హనుమాన్’. ‘కల్కి’, ‘జాంబీ రెడ్డి’ అంటూ ఒకదాంతో ఒకదానికి సంబంధం లేని కథలతో సినిమాలు తీసి విజయాలు అందుకున్న డాషింగ్ డైరెక్టర్ ప్రశాంత్ వర్మ ఈ సినిమాను తెరకెక్కిస్తున్నారు. ఇప్పటికే టీజర్​తో ఎక్స్​పెక్టేషన్స్​ పెంచేసిన ‘హనుమాన్’ నుంచి తాజాగా ట్రైలర్ విడుదలైంది. ఈ ట్రైలర్ చూస్తుంటే సంక్రాంతికి వస్తున్న పెద్ద సినిమాలకు గట్టి పోటీని ఇచ్చేలా ఉంది.

‘హనుమాన్’ ట్రైలర్ క్వాలిటీ చూస్తే పక్కా పాన్ ఇండియా ఫిల్మ్ అనే ఫీలింగ్ కలుగుతోంది. విజువల్ ఎఫెక్ట్స్, బ్యాగ్రౌండ్ మ్యూజిక్, సినిమాటోగ్రఫీ.. ఇలా అన్నింటా చాలా రిచ్​గా ఉంది. తన పవర్​ను మరింత పెంచుకునేందుకు ఒక బలమైన శక్తి కోసం విలన్ వెతుకుతుండగా వాళ్లకు ‘హనుమాన్’ గురించి తెలియడంతో వార్ స్టార్ట్‌ అవుతుంది. ఆంజనేయుడి భక్తుడు ఆ విలన్ గ్యాంగ్​కు వ్యతిరేకంగా ఎలా పోరాడాడు? అనేది కథగా కనిపిస్తోంది. ట్రైలర్ ఓపెనింగ్ షాట్ దగ్గర నుంచి ఆఖరి షాట్ వరకు ప్రతి ఫ్రేమ్ విజువల్​ ఫీస్ట్​లా ఉంది. సూపర్ హీరోగా తేజ సజ్జా ఆకట్టుకుంటున్నారు. ఆయనకు అక్కగా ప్రముఖ నటి వరలక్ష్మీ శరత్​కుమార్ కనిపిస్తున్నారు. ట్రైలర్​లో సముద్రఖని కొత్త గెటప్​లో షాకిచ్చారు. మూవీలో ఆయన రోల్​ స్పెషల్ అట్రాక్షన్​గా నిలిచేలా ఉంది.

‘హనుమాన్’ ట్రైలర్​లో విలన్​గా వినయ్ రాయ్ పవర్​ఫుల్​గా కనిపిస్తున్నారు. ఇంటెన్స్ లుక్​లో ఆయన చెబుతున్న డైలాగ్స్ బాగున్నాయి. ట్రైలర్​లో అన్ని షాట్స్ ఒకెత్తయితే లాస్ట్​లో హనుమంతుడు రివీల్ అయ్యే సీన్ మాత్రం గూస్​బంప్స్ తెప్పిస్తోంది. ఈ షాట్ థియేటర్లలో ఇంకెంతగా ఆకట్టుకుంటుందో చూడాలి. ఓవరాల్​గా ట్రైలర్ ద్వారా ‘హనుమాన్’ మీద ఎక్స్​పెక్టేషన్స్​ను మరింతగా పెంచేశారు దర్శకుడు ప్రశాంత్ వర్మ. ఈ సినిమా జనవరి 12న బిగ్​స్క్రీన్స్​లోకి రానుంది. తాజాగా విడుదలైన ట్రైలర్​ బాగుండటం, సూపర్ హీరో కథతో వస్తుండటంతో ప్రశాంత్ వర్మ మూవీకి బజ్​ నెక్స్ట్ లెవల్లో ఉంది. ఈ నేపథ్యంలో సంక్రాంతి బరిలో ఉన్న మహేష్ బాబు ‘గుంటూరు కారం’, వెంకటేష్ ‘సైంధవ’, రవితేజ ‘ఈగల్’ లాంటి బడా మూవీస్​కు ‘హనుమాన్’ నుంచి టఫ్ కాంపిటీషన్ తప్పేలా లేదు. మరి.. ‘హనుమాన్’ ట్రైలర్ మీకెలా అనిపించిందో కామెంట్ల రూపంలో తెలియజేయండి.

ఇదీ చదవండి: 2023 నాకు చాలా స్పెషల్..ఎందుకంటే.?