టాలీవుడ్లో మాస్ డైరెక్టర్లు చాలా మందే ఉన్నారు. కానీ వారిలో మోస్ట్ సక్సెస్ఫుల్ దర్శకుడిగా కొనసాగుతున్నారు బోయపాటి శ్రీను. ‘భద్ర’, ‘సింహా’, ‘లెజెండ్’, ‘సరైనోడు’, ‘అఖండ’ లాంటి చిత్రాలు ఆయన్ను మాస్ ఆడియెన్స్ హృదయాల్లో చెరగని స్థానం సంపాదించుకునేలా చేశాయి. బోయపాటి తీసే చిత్రాలు పైకి మాస్ మూవీస్లా కనిపించినా వాటిలో ఎమోషన్స్, ఫ్యామిలీ సెంటిమెంట్ అంతర్లీనంగా ఉంటాయి. కథలో భావోద్వేగాలతో కట్టిపడేసే సీన్లను ఎక్కువగా రాసుకుంటారాయన. వాటి చుట్టూ ఫైట్లను అల్లుకుంటారు. అందుకే ఎమోషన్తో విలన్లను హీరో చితకబాదుతుంటే సీన్లు బాగా పండుతాయి.
ఈ ఫార్ములాతో పక్కా కమర్షియల్, మాస్ ఎంటర్టైనర్స్ తీయడంలో బోయపాటి శ్రీను సిద్ధహస్తులుగా మారారు. బాలయ్యతో ‘అఖండ’ మూవీ తర్వాత బోయపాటి ఏ హీరోతో సినిమా చేస్తారనేది ఇంట్రెస్టింగ్గా మారింది. ఈ సమయంలో ఎనర్జిటిక్ స్టార్ రామ్ పోతినేనితో మూవీ చేసేందుకు బోయపాటి రెడీ అయ్యారు. వీరి కాంబోలో వస్తున్న ఫిల్మ్ ‘స్కంద’. ఇందులో రామ్ సరసన క్రేజీ బ్యూటీ శ్రీలీల హీరోయిన్గా యాక్ట్ చేస్తున్నారు. ‘ఇస్మార్ట్ శంకర్’ తర్వాత రామ్కు సరైన హిట్ పడలేదు. ఎన్నో అంచనాలతో రిలీజైన ‘వారియర్’ పెద్దగా ఆకట్టుకోలేదు. ఈ నేపథ్యంలో బోయపాటిపై గంపెడాశలు పెట్టుకున్నారు రామ్.
‘స్కంద’ మూవీ రిలీజ్కు రెడీ అవుతోంది. ఈ సినిమా నుంచి తాజాగా ఒక పాటను మేకర్స్ రిలీజ్ చేశారు. ‘నీ చుట్టూ చుట్టూ’ అంటూ సాగే ఈ సాంగ్ ఇప్పుడు నెట్టింట వైరల్ అవుతోంది. డ్యాన్స్ ఇరగదీస్తారనే పేరున్న రామ్, శ్రీలీల తమపై పెట్టుకున్న అంచనాలను నిలబెట్టుకున్నారు. రామ్ ఎప్పటిలాగే అదరగొట్టేశారు. శ్రీలీల అయితే తన అందంతో డ్యాన్స్తోనూ కట్టిపడేశారు. ఇందులో ఆమె మూతి తిప్పడం, నడుము తిప్పడం చూస్తే కుర్రాళ్ల గుండెలు మరింత స్పీడ్గా కొట్టుకోవడం ఖాయం. మ్యూజిక్ డైరెక్టర్ ఎస్ఎస్ తమన్ బీట్స్కు తగ్టట్లుగా రామ్, శ్రీలీల వేసిన స్టెప్పులు సూపర్బ్ అనే చెప్పాలి. మరి.. ‘నీ చుట్టూ చుట్టూ’ సాంగ్ను మీరు చూశారా? మీకు ఎలా అనిపించిందో కామెంట్ల రూపంలో తెలియజేయండి.
