కరోనా వైరస్ కట్టడి కోసం లాక్ డౌన్ విధించిన సంక్షోభ సమయంలోనూ ఆంధ్రాలో రాజకీయ కొట్లాటలు , కోర్టు వివాదాలు ఆగకపోగా మరిన్ని పిటిషన్లు విచారణలతో హోరెత్తుతుంది.
తాజాగా లాక్ డౌన్ సమయంలో బీదసాదలకు నిత్యావసరాలు , కూరగాయలు వంటివి సొంత నిధులతో పంచిన , సంక్షేమ పథకాల అమలు స్వయంగా పర్యవేక్షించిన ఐదుగురు అధికార వైసీపీ ఎమ్మెల్యేల పై లాక్ డౌన్ నిబంధనలు ఉల్లంఘించారని , కరోనా వైరస్ వ్యాప్తికి కారణమయ్యారని దాఖలైన పిటిషన్ ను విచారించిన హై కోర్ట్ సదరు ఎమ్మెల్యేలు విడుదల రజని , ఆర్కే రోజా , బియ్యపు మధుసూదన్ రెడ్డి , కిలివేటి సంజీవయ్య , వెంకట గౌడ లకు వారం లోగా వివరణ ఇమ్మంటూ నోటీసులు జారీ చేసింది .
అలాగే నిబంధనలు ఉల్లంఘించారని పిటిషన్ లో పేర్కొన్న ఐదుగురు ఎమ్మెల్యేలు నిజంగా నిబంధనలు ఉల్లంఘించారా లేదా అన్న అంశాలు , ఉల్లంఘిస్తే ఎం చర్యలు తీసుకున్నారో వివరిస్తూ కౌంటర్ దాఖలు చేయాలని ఏపీ డీజీపీకి , ప్రభుత్వానికీ ఆదేశాలు జారీ చేసింది .
అయితే ఈ ఎమ్మెల్యేలు సహాయ కార్యక్రమాల్లో నిబంధనలు ఉల్లంఘించారా లేదా , వారికి నిర్ధారణ కానీ కరోనా వ్యాప్తికి ఏ విధంగా కారణమయ్యారో విచారణలో తేలాల్సి ఉంది .
కాగా రాష్ట్రవ్యాప్తంగా లాక్ డౌన్ లో ఇబ్బంది పడుతున్న ప్రజలకు సొంత నిధులతో సహాయం అందిస్తున్న ప్రజా ప్రతినిధుల పై ఇలాంటి పిటిషన్లు చోటు చేసుకోవడం దురదృష్టకరమని , ఇలాంటి చర్యల వలన ఒకరికొకరు అండగా నిలవాల్సిన విపత్కర పరిస్థితుల్లో పది మందికి సాయం చేసే పెద్ద మనసు గలవారు వెనకంజ వేసే పరిస్థితి ఏర్పడుతుందని ఈ వార్త చూసిన పలువురు సామాన్యులు ఆవేదన వ్యక్తం చేస్తున్నారు .
