Idream media
Idream media
ఆంధ్రప్రదేశ్లో అన్నదాతల సంక్షేమమే లక్ష్యంగా వైసీపీసర్కార్ మరో కీలక నిర్ణయం తీసుకుంది. రాష్ట్రంలో మూడంచెల వ్యవసాయ సలహా కమిటీలను ఏర్పాటు చేస్తూ ఉత్తర్వులు జారీ చేసింది. ఈ నెల 30వ తేదీన రైతు భరోసా కేంద్రాలను సీఎం వైఎస్ జగన్ ప్రారంభిస్తున్న నేపథ్యంలో అంతకు ముందుగానే కమిటీలను ఏర్పాటు చేయడం విశేషం. రైతులకు సంబంధించి అన్ని విషయాల్లోనూ ఈ కమిటీలు పని చేస్తాయి. పంట వేయడం నుంచి ఎరువులు, పురుగుమందులు, సాంకేతికత, పంట గిరాకీ, మార్కెటింగ్, మద్ధతు ధర, ఇతర సమస్యలపై ఈ కమిటీలు పని చేయనున్నాయి. రాష్ట్ర, జిల్లా, మండల స్థాయిలో వేర్వేరుగా కమిటీలు ఏర్పాటు చేశారు.
– రాష్ట్ర స్థాయిలో కమిటీకి వ్యవసాయ శాఖ మంత్రి చైర్మన్గా, ఆ శాఖ ప్రత్యేక ముఖ్య కార్యాదర్శి వైస్ చైర్మన్గా, ఆ శాఖ కమిషనర్ మెంబర్ కన్వీనర్ ఉంటారు. సభ్యులుగా వ్యవసాయం, మార్కెటింగ్, హార్టికల్చర్ శాఖల ఉన్నతాధికారులు, అగ్రి, ఉద్యనవన వర్సిటీలు, పరిశోధన కేంద్రాలు, ఏపీ ఆగ్రోస్, మార్క్ఫెడ్, ఏపీ సీడ్స్, పలు రంగాల ప్రతినిధులుతోపాటు 10 మంది రైతులు ఉంటారు.
– జిల్లా స్థాయి కమిటీకి జిల్లా మంత్రి చైర్మన్గా, జిల్లా కలెక్టర్ వైస్ చైర్మన్గా, రైతు భరోసా, రెవెన్యూ వ్యవహారాలు చూసే జిల్లా జాయింట్ కలెక్టర్ మెంబర్ కన్వీనర్గా వ్యవహరిస్తారు. ఆ జిల్లాలోని ఎంపీలు, ఎమ్మెల్యేలతోపాటు వ్యవసాయ, ఉద్యానవన, సెరీకల్చర్, మార్కెటింగ్ శాఖ జిల్లా స్థాయి ఉన్నతాధికారులు, కేవీకేలు, వ్యవసాయ పరిశోధనా కేంద్రాల ప్రిన్సిపల్ సైంటిస్టులతోపాటు పది మంది రైతులు సభ్యులుగా ఉంటారు.
– మండల స్థాయి కమిటీకి ఎమ్మెల్యే చైర్మన్గా, మండల పరిషత్ అధ్యక్షుడు వైస్ చైర్మన్గా, మండల వ్యవసాయ అధికారి మెంబర్ కన్వీనర్గా వ్యవహరిస్తారు. తహసీల్దార్, ఎంపీడీవో, హార్టీ, సెరీ కల్చర్ అధికారులు, ఐదుగురు రైతులు సభ్యులు ఉండనున్నారు.
