ప్రపంచవ్యాప్తంగా ఎన్నో సినీ పరిశ్రమలు ఉన్నాయి. కానీ వాటిల్లో హాలీవుడ్కు ఉన్న క్రేజ్ వేరు. ఇంగ్లీష్ మూవీస్ అంటే చెవులు కోసుకునే ఆడియెన్స్ కోట్లలో ఉన్నారు. అందుకే హాలీవుడ్ స్టార్లకు అంత పాపులారిటీ ఉంటుంది. ముఖ్యంగా అక్కడ తెరకెక్కే భారీ యాక్షన్, సూపర్ హీరోస్ మూవీస్ను ఇష్టపడేవారు ఎక్కువ. అలాగే హాలీవుడ్ సైన్స్ ఫిక్షన్ సినిమాలకు కూడా స్పెషల్ ఫ్యాన్ బేస్ ఉంది. అలాంటి వాళ్లు ఎంతో ఆతృతగా ఎదురు చూస్తున్న చిత్రమే ‘ఓపెన్ హైమర్’. ఈ ఫిల్మ్ జులై 21వ తేదీన వరల్డ్వైడ్గా గ్రాండ్గా రిలీజ్ కానుంది. ఈ సినిమా కోసం భారత్లోనూ మూవీ లవర్స్ ఎంతో ఆసక్తిగా ఎదురు చూస్తున్నారు. ‘ఓపెన్ హైమర్’లో హాలీవుడ్ స్టార్ యాక్టర్ సిలియన్ మర్ఫీ ప్రధాన పాత్రలో నటించారు.
‘ఓపెన్ హైమర్’ను 2005లో కై బర్డ్, మార్టిన్ జె.షెర్విన్ రచించిన అమెరికన్ ప్రోమోథియస్ జీవిత చరిత్ర ఆధారంగా తీశారు. ఇందులో ఎమిలీ బ్లంట్, మాట్ డామన్, రాబర్ట్ డౌనీ జూనియర్, ఫ్లోరెన్స్ పగ్, జోష్ హార్ట్నెట్, కేసీ అఫ్లెక్, రామి మాలెక్, కెన్నెత్ బ్రానాగ్ కీలక పాత్రల్లో నటించారు. ఈ మూవీకి ఇప్పటికే భారత్లో ప్రీ బుకింగ్స్ కూడా మొదలయ్యాయి. ఈ సినిమాకు సంబంధించి ఐమాక్స్లో కళ్లు చెదిరే రేట్లకు టికెట్స్ అమ్ముడవుతున్నాయి. ఈ చిత్రం మొదటి రోజు షోలకు ఒక్కో టికెట్ ధర ఏకంగా రూ.2,450 పలుకుతోంది. గతంలో ‘అవతార్ 2’కు బెంగళూరులో గరిష్టంగా రూ.1,700 మాత్రమే టికెట్ రేట్ పలికింది. అంతటి క్రేజ్ ఉన్న ‘అవతార్’ సీక్వెల్కు మించిన రీతిలో ‘ఓపెన్ హైమర్’ టికెట్ రేట్లు ఉండటం అందర్నీ షాక్కు గురిచేస్తోంది.
అసలు ‘ఓపెన్ హైమర్’ మూవీ ఎందుకింత స్పెషల్ అనడానికి పలు కారణాలు ఉన్నాయి. అందులో ప్రధానమైనది దర్శకడు క్రిస్టోఫర్ నోలన్. ఆయన గత చిత్రాలు ‘డార్క్నైట్’, ‘ఇన్సెప్షన్’, ‘ఇంటర్స్టెల్లార్’ సృష్టించిన సంచనాలు అన్నీ ఇన్నీ కాదు. కంటెంట్, మేకింగ్, వీఎఫ్ఎక్స్, స్క్రీన్ ప్లే పరంగా ఈ సినిమాలు ది బెస్ట్గా నిలిచాయి. ‘ఓపెన్ హైమర్’కు ఇంత హైప్ రావడానికి మరో కారణం సిలియన్ మర్ఫీ. ‘పీకీ బ్లైండర్స్’ వెబ్ సిరీస్లో ఆయన నటనకు అంతా ఫిదా అయ్యారు. అలాంటి ఈ క్రేజీ కాంబోలో రూపొందిన మూవీ కావడంతో ‘ఓపెన్ హైమర్’కు ఇంత బజ్ ఏర్పడింది. ఈ చిత్రం కోసం మీరు ఎంతగా ఎదురు చూస్తున్నారో కామెంట్ల రూపంలో తెలియజేయండి.
