చంచల్‌గూడ జైలుకి ప్రణీత్ హనుమంతు! నమోదైన 4 సెక్షన్లు ఇవే! బాగా బిగించారు!

సోషల్ మీడియా అందుబాటులోకి వచ్చాక ట్రోల్స్ చేయడం, రోస్ట్ చేయడం వంటి పైత్యం మరింత ముదిరింది. సామాజిక మాధ్యమాల్లో ఇష్టారీతిలో మాట్లాడుతూ వికృతానందాన్ని పొందుతున్నారు. ఇక్కడ సెలబ్రీటీలనే కాదు.. పవిత్రమైన తండ్రీ కూతుర్ల మధ్య బంధంపై కూడా అసభ్యకరమైన కామెంట్స్ చేస్తున్నారు. ఇటీవల ప్రణీత్ హనుమంతు అనే యూట్యూబర్ ఓ వీడియోలో తండ్రీ కూతుర్ల బంధంపై సభ్య సమాజం తలదించుకునేలా వ్యాఖ్యలు చేశాడు. దీంతో ఈ వ్యవహారం ఇరు తెలుగు రాష్ట్రాల్లో సంచలనంగా మారింది. ప్రణీత్ హనుమంతుపై సినీ సెలబ్రిటీలు ఆగ్రహం వ్యక్తం చేస్తూ కఠినంగా శిక్షించాలని కోరుతూ పోస్టులు పెట్టారు. ఈ నేపథ్యంలో ప్రణీత్ హనుమంతును పోలీసులు బెంగళూరులో అరెస్టు చేశారు.

యూట్యూబర్ ప్రణీత్ హనుమంతును పోలీసులు అరెస్టు చేసిన తర్వాత హైదరాబాద్ కు తరలించారు. యూట్యూబర్ ను నాంపల్లి కోర్టులో ప్రవేశపెట్టారు. ఈ కేసులో ప్రణీత్ హనుమంతుకు కోర్టు 15 రోజుల రిమాండ్ ను విధించింది. ఆ తర్వాత అతడిని చంచల్ గూడ జైలుకు తరలించారు. అయితే సోషల్ మీడియా కీచకుడు అయిన ప్రణీత్ హనుమంతుపై నాలుగు సెక్షన్ల కింద కేసు నమోదైంది. ప్రణీత్‌పై 67B it యాక్ట్, ఫోక్సో యాక్ట్, 79, 294 BNSసెక్షన్స్ కింద కేసులు నమోదయ్యాయి. మళ్లీ ఎవరైనా ప్రణీత్ చేసిన తప్పు చేయాలంటేనే వణికిపోయేలా ఈ సెక్షన్ల కింద కేసు నమోదు చేశారు. ప్రణీత్ తో పాటు లైవ్ చాటింగ్ చేసిన మరో ముగ్గురిపై కేసులు నమోదయ్యాయి. ఏ1గా ప్ర‌ణీత్, ఏ2గా నాగేశ్వ‌ర‌రావు, ఏ3గా యువ‌రాజు, ఏ4గా సాయి ఆదినారాయ‌ణ‌పై పోలీసులు కేసు న‌మోదు చేశారు.

67B it యాక్ట్:

• 67B it యాక్ట్ ప్రకారం ఎవరైనా ఎలక్ట్రానిక్ మీడియాలో పిల్లలను లైంగికంగా, అసభ్యకరమైన రీతిలో చిత్రీకరించడం, కామెంట్స్ చేయడం వంటి చర్యలకు పాల్పడితే ఈ సెక్షన్ల కింద కేసు నమోదు చేస్తారు.

ఫోక్సో యాక్ట్:

• పోక్సో చట్టం అనేది లైంగిక నేరాల నుంచి చిన్నారులకు రక్షణ కల్పించే యాక్ట్. ఆడపిల్లలపై జరుగుతున్న అకృత్యాలను అడ్డుకోవడం కోసం 2012లో కేంద్ర ప్రభుత్వం ఈ చట్టాన్ని తీసుకొచ్చింది. వికృత చేష్టలతో పిల్లల జీవించే హక్కును హరించి వారికి ముప్పు వాటిల్లేలా చేస్తే ఈ చట్టం ద్వారా కఠినంగా శిక్షిస్తుంది. శారీరకంగా, మానసికంగా వారిని వేధిస్తే నిందుతులపై కేసు నమోదు చేసి చట్టపరంగా చర్యలు తీసుకుంటారు. ఈ చట్టం 18 ఏళ్లలోపు పిల్లలందరికీ లైంగిక వేధింపుల నుంచి రక్షణ కల్పిస్తుంది. ఈ చట్టం ద్వారా దోషులకు మరణశిక్ష విధిస్తారు. 16 ఏళ్లలోపు బాలికపై అత్యాచారం జరిగితే కనీస శిక్షగా 10 నుంచి 20 సంవత్సరాల వరకు జైలు జీవితం అనుభవించాల్సి ఉంటుంది.

294 BNSసెక్షన్:

• ఎలక్ట్రానిక్ మీడియాలో అశ్లీలంగా కంటెంట్‌ను ప్రదర్శించడం వంటి చర్యలకు పాల్పడితే ఈ సెక్షన్ కింద కేసు నమోదు చేస్తారు. నిందితులకు ఐదేళ్ల వరకు జైలు శిక్షతో పాటు జరిమానా కూడా విధిస్తారు.