రోహిత్​ శర్మపై క్రిస్ గేల్ ప్రశంసలు.. హిట్​మ్యాన్ రియాక్షన్ ఇదే..!

రోహిత్ శర్మ.. అతడో పది ఓవర్లు క్రీజులో ఉంటే ప్రత్యర్థి జట్టు మ్యాచ్​పై ఆశలు వదులుకోవాల్సిందే. ఇక సెటిలైతే ఆ రోజు చాలా రికార్డులు బ్రేక్ అయినట్లే. నీళ్లు తాగినంత అలవోకగా సిక్సులు కొట్టేయగల సమర్థుడతను. వరల్డ్ కప్ అంటే చాలు.. బీస్ట్ మోడ్​లోకి వెళ్లిపోతాడు హిట్​మ్యాన్. మెగా టోర్నీలో తీవ్ర ఒత్తిడి మధ్య పరుగుల వరద ఎలా పారించాలో అతడికి బాగా తెలుసు. అయితే ఇంత పెద్ద టోర్నీలో ఫస్ట్ టైమ్ టీమ్​కు కెప్టెన్సీ చేస్తున్నా ఎక్కడా ఆ ప్రెజర్ కనిపించనీయలేదు. ఆఫ్ఘానిస్థాన్​పై భారీ సెంచరీతో భారత్​కు మళ్లీ ఊపు తీసుకొచ్చాడు రోహిత్. ఒక్క మ్యాచ్​తో అనేక రికార్డులను తన అకౌంట్​లో జమచేసుకున్నాడు.

ఆస్ట్రేలియాతో ఫస్ట్ మ్యాచ్​లో రోహిత్ శర్మ గోల్డెన్ డక్​గా వెనుదిరిగినా ఆ ఎఫెక్ట్ ఈ మ్యాచ్​లో ఎక్కడా కనిపించలేదు. తన ట్రేడ్ మార్క్ పుల్, లాఫ్టెడ్ షాట్లతో ప్రపంచ కప్​లోనే టీమిండియా తరఫున అత్యంత ఫాస్టెస్ట్ సెంచరీ చేసిన బ్యాటర్​గా ఘతన సాధించాడు. 40 ఏళ్లుగా చెక్కుచెదరని రికార్డును హిట్​మ్యాన్ చెరిపేశాడు. ఈ మ్యాచ్​లో రోహిత్ 84 బంతుల్లోనే 131 రన్స్ చేయగా.. అందులో 16 ఫోర్లు, 5 సిక్సర్లు ఉన్నాయి. ఈ పెర్ఫార్మెన్స్​తో పలు రికార్డులను అతడు బ్రేక్ చేశాడు. ఇంటర్నేషనల్ క్రికెట్​లో అత్యధిక సిక్సులు కొట్టిన ప్లేయర్​గా రోహిత్ చరిత్ర సృష్టించాడు. ఈ మ్యాచ్​లో మూడో సిక్సర్ బాదిన హిట్​మ్యాన్.. యూనివర్సల్ బాస్ క్రిస్ గేల్​ను అధిగమించాడు.

వెస్టిండీస్ బ్యాటింగ్ గ్రేట్ క్రిస్ గేల్ ఇంటర్నేషనల్ క్రికెట్​లో 553 సిక్సులు బాదాడు. ఇప్పుడీ లిస్టులో 555 సిక్సులతో ఫస్ట్ ప్లేసులో నిలిచాడు హిట్​మ్యాన్. ఈ జాబితాలో రోహిత్, గేల్ తర్వాతి స్థానాల్లో షాహిద్ అఫ్రిదీ (476 సిక్సులు), బ్రెండన్ మెకల్లమ్ (398 సిక్సులు), మార్టిన్ గప్తిల్ (383 సిక్సులు) ఉన్నారు. తన రికార్డును బ్రేక్ చేసిన రోహిత్​ను గేల్ అభినందించాడు. హిట్​మ్యాన్​తో కలసి దిగిన ఓ ఫొటోను నెట్టింట షేర్ చేశాడు గేల్. ఇద్దరి జెర్సీ నంబర్ ఒకటే (45).. ఇదే తమకు స్పెషల్ అంటూ రోహిత్​ను మెచ్చుకున్నాడు గేల్. యూనివర్సల్ బాస్ ట్వీట్​పై రోహిత్ స్పందించాడు. ఇద్దరి జెర్సీల వెనుక 4,5 ఉన్నప్పటికీ తమ ఫేవరెట్ నంబర్ మాత్రం 6 అని రోహిత్ ఫన్నీగా రిప్లయ్ ఇచ్చాడు.

ఇదీ చదవండి: VIDEO: కోహ్లీకి గురించి చెడుగా మాట్లాడే వారికి గట్టి కౌంటర్‌ ఇచ్చిన లెజెండరీ క్రికెటర్‌!

Congrats, @ImRo45 – Most Sixes in International cricket. #45 Special 🙌🏿 pic.twitter.com/kmDlM1dIAj

— Chris Gayle (@henrygayle) October 11, 2023