Team India: రుతురాజ్ కంటే గిల్ ఎందులో గ్రేట్? యంగ్​స్టర్​ను అనవసరంగా బలి చేస్తున్నారా?

వన్డే వరల్డ్ కప్ కోల్పోయిన బాధలో ఉన్న భారత జట్టు టీ20 ప్రపంచ కప్ అయినా నెగ్గాలని ఫ్యాన్స్ కోరుకుంటున్నారు. ఈ బాధలో నుంచి బయటకు రావాలంటే వచ్చే ఏడాది జూన్​లో జరిగే మెగా టోర్నీలో ఎలాగైనా గెలిచి తీరాలని అంటున్నారు. అప్పుడు తమకు పూర్తిగా ఊరట దక్కుతుందని చెబుతున్నారు. అయితే ప్రస్తుత పరిస్థితులు చూస్తే మాత్రం కప్ నెగ్గడం కష్టంగా కనిపిస్తోంది. అందుకు ప్రధాన కారణం భారత జట్టు సన్నాహకాలు సరిగ్గా లేకపోవడమేనని చెప్పొచ్చు. టీ20 వరల్డ్ కప్​కు ఇంకా ఏడున్నర నెలల టైమ్ మాత్రమే ఉంది. ఇప్పటికే ఆస్ట్రేలియాతో సిరీస్ అయిపోయింది. ఇప్పుడు సౌతాఫ్రికాతో సిరీస్​ జరుగుతోంది. అందులో ఒక మ్యాచ్ రద్దవగా.. మరో మ్యాచ్​లో మన టీమ్ ఓటమిపాలైంది. ఈ సిరీస్ తర్వాత వచ్చే ఏడాది ప్రథమార్థంలో ఆఫ్ఘానిస్థాన్​తో టీ20 సిరీస్ ఉంది.

ఆఫ్ఘాన్​తో సిరీస్ తర్వాత ఐపీఎల్​ ఉంటుంది. మెగా లీగ్ ముగిసిన తర్వాత డైరెక్ట్ వరల్డ్ కప్​లోనే ఆడాల్సి ఉంటుంది. కాబట్టి భారత జట్టుకు ప్రిపరేషన్స్​కు ఎక్కువ టైమ్ లేదు. టీమ్​గా ప్లేయర్లు కలసి ఆడేది మహా అంటే మరో నాలుగైదు టీ20లే. ఇప్పటికే రెస్ట్ పేరుతో స్టార్ ఆటగాళ్లు విరాట్ కోహ్లీ, రోహిత్ శర్మ, జస్​ప్రీత్ బుమ్రా, కేఎల్ రాహుల్ ఆడట్లేదు. దీంతో ఎలెవన్​ మీద ఓ ఐడియా రావట్లేదు. అటు యంగ్​స్టర్స్​ను కూడా ప్రయోగాల పేరుతో ఇష్టం వచ్చినట్లుగా ఆడిస్తూ, తీసేస్తూ పోతున్నారు. ఆసీస్​తో సిరీస్​లో అదరగొట్టిన ఇషాన్ కిషన్, రుతురాజ్ గైక్వాడ్​, రవి బిష్ణోయ్​ను సౌతాఫ్రికాతో రెండో టీ20లో ఆడించలేదు. కంగారూలతో సిరీస్​లో ఆకట్టుకున్న అక్షర్ పటేల్​ను టీ20 సిరీస్​కు సెలక్ట్ కూడా చేయలేదు.

భారత టీమ్ కాంబినేషన్ చూస్తుంటే అసలు సెలక్టర్లు, మేనేజ్​మెంట్ ఏం ఆలోచిస్తోందో ఎవరికీ అర్థం కావడం లేదు. గత ఆరు ఇన్నింగ్స్​ల్లో ఒక్కసారి మాత్రమే సక్సెస్ అయి.. మిగిలిన ఐదు సార్లు ఫెయిలైన శుబ్​మన్​ గిల్ (0, 9, 77, 6, 7, 3, 0)​ను ఎందుకు ఆడిస్తున్నారో క్లారిటీ లేదు. అతడి కంటే కంగారూ సిరీస్​లో రాణించిన రుతురాజ్ గైక్వాడ్ (0, 58, 123 నాటౌట్, 32, 10) ఎందులో తక్కువ అనే ప్రశ్నలు ఉత్పన్నం అవుతున్నాయి. గిల్ వన్డేల్లో గ్రేట్ అయ్యుండొచ్చు గానీ టీ20ల్లో మాత్రం అతడు వరుసగా విఫలం అవుతున్నాడని సోషల్ మీడియాలో నెటిజన్స్ ఏకిపారిస్తున్నారు. శుబ్​మన్.. వెళ్లి వన్డేలు ఆడుకో పో అని కామెంట్స్ చేస్తున్నారు.

ఇటీవల జరిగిన ఆసియా క్రీడల్లోనూ టీమిండియాను కెప్టెన్​గా ముందుండి లీడ్ చేశాడు రుతురాజ్. ఆ టోర్నీలోనే గాక ఆస్ట్రేలియాతో టీ20 సిరీస్​లోనూ రాణించాడు. అయినా అతడ్ని బ్యాకప్ ఓపెనర్​గా చూడటం, గిల్ రాగానే పక్కన పెట్టడంపై కొందరు ఫ్యాన్స్ అసంతృప్తి వ్యక్తం చేస్తున్నారు. ప్రతి ప్లేయర్​ను అన్ని ఫార్మాట్లలో ఆడించాలని చూడొద్దని.. ఏ ఫార్మాట్​లో ఎవరు బాగా ఆడుతున్నారో చూడాలని అంటున్నారు. పొట్టి ఫార్మాట్​లో గిల్ కంటే రుతురాజ్ ఎంతో బెటర్ అని.. అనవసరంగా ప్రయోగాల పేరుతో అతడ్ని బలిపశువును చేయొద్దని కోరుతున్నారు. మరి.. రుతురాజ్​ను ఆడించకపోవడంపై మీ అభిప్రాయాలను కామెంట్ల రూపంలో తెలియజేయండి.

ఇదీ చదవండి: Rohit Sharma: రోహిత్ డబుల్ సెంచరీకి ఆరేళ్లు.. అన్నింట్లోనూ ఇదెంతో స్పెషల్! ఎందుకంటే..?

Shubman Gill has scored just one fifty in the last six T20I games for India. pic.twitter.com/1X8AAtYguP

— CricTracker (@Cricketracker) December 13, 2023