ఒకప్పుడు భారత జట్టులో అతడికి చోటు దక్కడమే కష్టంగా ఉండేది. 2011 వన్డే వరల్డ్ కప్ టీమ్లో ఆ ప్లేయర్కు ప్లేస్ దక్కలేదు. గాయాల బారిన పడటం, ఫామ్ లేమి.. దీంతో టీమ్లో అతడు అవసరమా? అనే ప్రశ్నలు తలెత్తాయి. కట్ చేస్తే.. 2023 వన్డే వరల్డ్ కప్. టీమిండియాను కెప్టెన్గా ముందుండి నడిపిస్తున్నాడతను. ఆ ప్లేయరో ఎవరో ఈపాటికే మీకు తెలిసిపోయి ఉంటుందిగా! అవును, మనం మాట్లాడుకుంటోంది భారత కెప్టెన్ రోహిత్ శర్మ గురించే. 2013 వరకు టీమ్లో రోహిత్ ప్లేస్ ఫిక్స్ కాదు. కానీ అప్పటి సారథి ఎంఎస్ ధోని హిట్మ్యాన్కు వెన్నంటే ఉండి వరుసగా అవకాశాలు ఇస్తూ పోయాడు. అంతేకాదు, ఆ ఏడాది జరిగిన ఛాంపియన్స్ ట్రోఫీకి ముందు రోహిత్కు ఓపెనర్గా ప్రమోషన్ ఇచ్చాడు.
ఛాంపియన్స్ ట్రోఫీ-2013తో తానేంటో నిరూపించుకున్నాడు రోహిత్ శర్మ. అతనెంత డేంజరస్ బ్యాటరో అప్పుడే క్రికెట్ వరల్డ్కు తెలిసింది. ఆ తర్వాత సెంచరీల మీద సెంచరీలు, డబుల్ సెంచరీలు.. పరుగుల వరద పారిస్తూ ఎన్నో రికార్డులను తన పేరు మీద రాసుకున్నాడు రోహిత్. ఒకప్పుడు సిక్సర్ ఎలా కొడతారో, తన వల్ల కాదేమో అనుకునే స్థాయి నుంచి ఇప్పుడు సిక్సర్ల కింగ్గా మారాడు. ఇటీవల జరిగిన ఆసియా కప్ దగ్గర నుంచి ప్రస్తుత వన్డే వరల్డ్ కప్లో జరిగిన మూడు మ్యాచుల వరకు హిట్మ్యాన్ కెప్టెన్సీలోనూ తానేంటో ప్రూవ్ చేసుకున్నాడు. టీమ్లోని యంగ్ ప్లేయర్లకు ఎప్పటికప్పుడు సూచనలిస్తూ ప్రోత్సహిస్తున్నాడు. టైమ్, సిచ్యువేషన్కు తగ్గట్లుగా తెలివైన నిర్ణయాలతో జట్టును గెలిపించడమే గాక ఆటగాళ్లపై ఒత్తిడి పడకుండా చూసుకుంటున్నాడు.
ప్లేయర్గానూ, కెప్టెన్గానూ దూసుకెళ్తున్న రోహిత్ శర్మ గురించి అతడితో కలసి ఆడిన మాజీ టీమ్మేట్ అమోల్ మజుందార్ ఓ సీక్రెట్ బయటపెట్టాడు. ‘రోహిత్ను చాన్నాళ్లుగా గమనిస్తున్నా. అతడు తనను తాను ఎలా మలచుకున్నాడు, స్టార్గా ఎలా ఎదిగాడో దగ్గరగా చూశా. అతడు ప్రతి విషయాన్ని చాలా జాగ్రత్తగా గమనిస్తాడు. చిన్న చిన్న విషయాలనూ జాగ్రత్తగా గుర్తుపెట్టుకుంటాడు. మ్యాచ్ స్టాటిస్టిక్స్కు చాలా ప్రాధాన్యత ఇస్తాడు. గ్రౌండ్లో ప్రత్యర్థి ప్లేయర్ల కదలికల్ని అబ్జర్వ్ చేస్తాడు. వాళ్లను ఎలా దెబ్బ కొట్టాలి? వారిపై నెగ్గాలంటే ఏం చేయాలి? లాంటి ప్రశ్నలకు స్పష్టంగా ఆన్సర్స్ వెతుక్కోగలడు. ఏ విషయాన్నైనా కాంప్లికేట్ చేయకుండా సింపుల్గా పరిష్కరించేందుకు రోహిత్ ప్రయత్నిస్తాడు. టీమ్మేట్స్ తనలాగే ఆలోచించేలా, వారిపై ఒత్తిడి లేకుండా చేయడంలో హిట్మ్యాన్ స్పెషలిస్ట్. అదే అతడి సక్సెస్ సీక్రెట్’ అని మజుందార్ రివీల్ చేశాడు.
ఇదీ చదవండి: World Cup: ఒకప్పుడు సౌతాఫ్రికా టీమ్. నేడు టీమ్ మారి.. వాళ్లనే ఓడించాడు!
