ఒక్కోసారి ఊహించని కాంబినేషన్ లు తెరపైకి వస్తాయి. తాజాగా అలాంటి ఓ కాంబోనే హాట్ టాపిక్ గా మారింది. ఓ పాన్ ఇండియా స్టార్, ఓ పాన్ ఇండియా డైరెక్టర్ మొదటిసారి చేతులు కలపబోతున్నట్లు వార్తలొస్తున్నాయి. ఆ ఇద్దరు ఎవరో కాదు ప్రభాస్, సుకుమార్.
బాహుబలితో పాన్ ఇండియా స్టార్ గా మారిన ప్రభాస్ ఇతర స్టార్స్ కి సాధ్యంకాని విధంగా జెట్ స్పీడ్ లో సినిమాలు చేస్తున్నాడు. ప్రస్తుతం ప్రభాస్ చేతిలో సలార్, ఆదిపురుష్, ప్రాజెక్ట్-k వంటి భారీ పాన్ ఇండియా ప్రాజెక్ట్స్ ఉన్నాయి. అలాగే మారుతి దర్శకత్వంలో సైలెంట్ గా ఒక సినిమా చేస్తున్నాడు. అంతేకాకుండా సందీప్ రెడ్డి దర్శకత్వంలో స్పిరిట్ అనే ఓ చిత్రాన్ని కూడా ప్రకటించాడు. ఇప్పటికే చేతిలో ఐదు ప్రాజెక్టులతో బిజీగా ఉన్న ప్రభాస్.. తాజాగా మరో ప్రాజెక్ట్ కి ఓకే చెప్పినట్లు టాక్. ఈ సినిమాకి స్టార్ డైరెక్టర్ సుకుమార్ దర్శకత్వం వహించనున్నట్లు తెలుస్తోంది.
ఐకాన్ స్టార్ అల్లు అర్జున్ హీరోగా సుకుమార్ దర్శకత్వంలో రూపొందిన ‘పుష్ప ది రైజ్’ దేశవ్యాప్తంగా సంచలనం సృష్టించింది. ఈ చిత్రంతోనే సుకుమార్ పాన్ ఇండియా డైరెక్టర్ గా మారిపోయాడు. ప్రస్తుతం బన్నీతో పుష్ప రెండో భాగం ‘పుష్ప ది రూల్’ని తెరకెక్కిస్తున్న సుకుమార్ ఆ తర్వాత ప్రభాస్ తో ఓ సినిమా చేయనున్నాడని న్యూస్ వినిపిస్తోంది. ఈ చిత్రాన్ని ‘ది కాశ్మీర్ ఫైల్స్’ ప్రొడ్యూసర్ అభిషేక్ అగర్వాల్ నిర్మించనున్నాడని సమాచారం.
సుకుమార్ కొన్ని రోజుల క్రితం అభిషేక్ అగర్వాల్ తో పాటు ‘ది కాశ్మీర్ ఫైల్స్’ దర్శకుడు వివేక్ అగ్నిహోత్రిని కలిశాడు. వీరి కలయికలో ఓ క్రేజీ ప్రాజెక్ట్ రాబోతున్నట్లు ఆ సమయంలో అభిషేక్ అగర్వాల్ ఓ హింట్ కూడా ఇచ్చాడు. అయితే వీరి కాంబోలో రానున్న ఆ ప్రాజెక్ట్ లో ప్రభాస్ హీరోగా నటించనున్నాడని ప్రచారం జరుగుతోంది. ప్రభాస్ హీరోగా సుకుమార్ దర్శకత్వంలో తెరకెక్కనున్న ఈ చిత్రానికి సహా నిర్మాతగా వివేక్ అగ్నిహోత్రి, నిర్మాతగా అభిషేక్ అగర్వాల్ వ్యవహరించనున్నారని వినికిడి. పుష్ప పార్ట్-2 పూర్తయ్యాక ఈ ప్రాజెక్ట్ అఫీషియల్ అనౌన్స్ మెంట్ రానుందని అంటున్నారు.
