మణిపూర్ లో ప్రభుత్వ ఏర్పాటుకు సిద్ధపడుతున్న మాజీ ముఖ్యమంత్రికి సిబిఐ షాక్

మణిపూర్ లో అధికార బిజెపి ఎమ్మెల్యేలు, ప్రభుత్వానికి మద్దతు ఇస్తున్న స్వతంత్ర ఎమ్మెల్యేలు రాజీనామా చేయడంతో బిజెపి ప్రభుత్వం మైనార్టీలో పడింది. దీంతో కాంగ్రెస్ ప్రభుత్వ ఏర్పాటుకు చర్యలు చేపడుతుంది. ఇప్పటికీ కాంగ్రెస్ పార్టీ గవర్నర్ కు లేఖ రాసింది. అసెంబ్లీలో బల పరీక్ష నిర్వహిచాలని కోరింది. అయితే గవర్నర్ ఎటువంటి ఆదేశాలు జారీ చేయలేదు. ఈ లోపు ప్రభుత్వాన్ని ఏర్పాటు‌ చేసేందుకు చర్యలు చేపడుతున్న కాంగ్రెస్ కు భంగపాటు తప్పదనిపిస్తోంది. అందుకు మణిపూర్ లో ప్రస్తుతం జరుగుతున్న పరిణామాలు అద్దం పడుతున్నాయి. కాంగ్రెస్ సీనియర్ నేత, మాజీ ముఖ్యమంత్రి ఓ ఇబోబి సింగ్ కు సెంట్రల్ బ్యూరో ఆఫ్ ఇన్వెస్టిగేషన్ (సిబిఐ) సమన్లు జారీ చేసింది. ప్రభుత్వ ఏర్పాటు చేసేందుకు కీలకంగా ఉన్న ఇబోబి సింగ్ పై పాత కేసులో సిబిఐ ఇప్పుడు ప్రత్యక్షమవ్వడంపై సర్వత్రా విమర్శలు వెల్లువెత్తుతున్నాయి.

రూ.332 కోట్ల నిధుల దుర్వినియోగ కేసులో మణిపూర్ మాజీ సిఎం ఇబోబి సింగ్‌కు సిబిఐ సమన్లు ​​చేసింది. ఈ కేసులో ఆయనను ప్రశ్నించినందుకు సిబిఐ సమన్లు ​​చేసింది. మణిపూర్‌లో ఇబోబి సింగ్ ఆధ్వర్యంలో ప్రభుత్వాన్ని ఏర్పాటు చేస్తున్నట్లు కాంగ్రెస్ ప్రకటించిన కొద్ది రోజుల తరువాత ఈ పరిణామాలు చోటు చేసుకున్నాయి.

బిజెపి నేతృత్వంలోని ఎన్. బిరెన్ సింగ్ ప్రభుత్వానికి మిత్రపక్షాలు మద్దతు ఉపసంహరించుకోవడంతో మైనార్టీలో పడింది. బిజెపికి చెందిన కొద్ది మంది ఎమ్మెల్యేలు కాంగ్రెస్‌లో చేరడానికి రాజీనామా చేశారు. ఈ నేపథ్యంలో సిబిఐ రంగంలోకి దిగింది.

కాంగ్రెస్ నేత, మాజీ ముఖ్యమంత్రి ఇబోబి సింగ్ ను సిబిఐ బృందం విచారణ జరిపింది. ఇంఫాల్‌లోని సిబిఐ కార్యాలయంలో సిబిఐ ముందు హాజరుకావాలని ఇబోబి సింగ్ కు మంగళవారం సమన్లు ​​జారీ చేశారు. ఇబోబి సింగ్, ఇతర నిందితులను ప్రశ్నించడం కోసం సిబిఐ జాయింట్ డైరెక్టర్ ఎన్ఎం సింగ్ నేతృత్వంలోని బృందం మంగళవారం ఇంఫాల్ చేరుకుంది. బుధవారం ఇబోబి సింగ్ ఇంటికి సిబిఐ బృందం వెళ్లి విచారణ జరిపింది.

ఇబోబి సింగ్, ఇతరులపై 2019 నవంబర్ 20న కేసు నమోదు చేసింది. ఐజ్వాల్, ఇంఫాల్, గురుగ్రామ్‌లోని తొమ్మిది స్థానాల్లో శోధనలు నిర్వహించింది. సింగ్ నివాసం నుంచి రూ.11.47 లక్షల నగదు, పాత డీమోనిటైజ్ చేసిన కరెన్సీని రూ.36.49 లక్షలు స్వాధీనం చేసుకున్నట్లు దర్యాప్తులో పేర్కొన్నారు.

సింగ్ నివాసంలో జరిపిన సోదాల్లో భాగంగా ఆడి, మిత్సిబుషి, హోండా, హ్యుందాయ్ ఎనిమిది లగ్జరీ కార్లు కూడా దొరికాయి. ఇదికాకుండా సింగ్, మణిపూర్ డెవలప్‌మెంట్ సొసైటీలో భాగమైన మాజీ ఐఎఎస్ అధికారుల ప్రాంగణంలో జరిపిన సోదాల్లో ప్లాట్లు, ఇళ్ళు, ఫ్లాట్లు, షాపులు, లగ్జరీ కార్లతో సహా వివిధ ఆస్తులకు సంబంధించిన పత్రాలతో పాటు, వివిధ బ్యాంకు ఖాతాల వివరాలు స్వాధీనం చేసుకున్నారు.

మణిపూర్ డెవలప్‌మెంట్ సొసైటీ (ఎమ్‌డిఎస్) అప్పటి ఛైర్మన్‌గా ఉన్న సింగ్, 2009 జూన్ 30 నుండి 2017 జూలై 6 వరకు తన పదవీకాలంలో ఇతరులతో అవినీతి, ప్రభుత్వ నిధులను దుర్వినియోగం చేశారని సిబిఐ ప్రతినిధి గత ఏడాది నవంబర్‌లో ఆరోపించారు. అభివృద్ధి పనుల కోసం వారికి అప్పగించిన మొత్తం రూ.518 కోట్లలో రూ. 232 కోట్లు అవినీతి జరిగినట్లు సిబిఐ తెలిపింది.

ఈ కేసులో ముగ్గురు మాజీ ఎండిఎస్ చైర్మెన్లు డి.ఎస్ పూనియా, పి.సి లాముక్ంగా, ఓ. నబాకిషోర్ సింగ్ ఉన్నారు. సొసైటీ మాజీ ప్రాజెక్ట్ డైరెక్టర్ వై నింగ్తేమ్ సింగ్, దాని పరిపాలనా అధికారి ఎస్. రంజిత్ సింగ్ ఎఫ్ఐఆర్ లో పేరు పెట్టారు. నింగ్తేమ్ సింగ్ నుంచి రూ.10 లక్షల డీమోనిటైజ్ చేసిన కరెన్సీని, ఇంఫాల్‌లోని రెండు ఇళ్ల పత్రాలను కూడా సిబిఐ స్వాధీనం చేసుకుంది.

డి.ఎస్ పూనియా, పి.సి లాముక్ంగా, ఓ. నబాకిషోర్ సింగ్ నివాసాల్లో జరిపిన సోదాల్లో ఆస్తి, బ్యాంకు పత్రాలను స్వాధీనం చేసుకుంది. ఈ కేసును మళ్లీ ఇప్పుడు బయటకు తీశారు. మణిపూర్ లో నెలకొన్న ప్రస్తుత రాజకీయ సంక్షోభం పరిస్థితుల్లో సిబిఐ ప్రవేశిచడంపై సర్వత్రా చర్చ జరుగుతుంది. అందులోనూ ప్రభుత్వం ఏర్పాటుకు సిద్ధంగా వ్యక్తిపై విచారణ జరపడం, అందులో పాత కేసును మళ్లీ బయటకు తీయడంపై విమర్శలు వెల్లువెత్తుతున్నాయి.