ఇంకా షూటింగ్ మొదలుకాకుండానే పవన్ కళ్యాణ్ కొత్త సినిమా భవదీయుడు భగత్ సింగ్ కు ఇబ్బందులు మొదలయ్యాయి. హీరోయిన్ గా ఎంపికైన పూజా హెగ్డే ఈ ప్రాజెక్టు నుంచి తప్పుకుందని సమాచారం. హరీష్ శంకర్ దర్శకత్వంలో రూపొందాల్సిన ఈ సోషల్ డ్రామా ఎప్పుడో ప్రకటించినప్పటికీ ఇప్పటిదాకా చిత్రీకరణ స్టార్ట్ చేయలేదు. స్క్రిప్ట్ సిద్ధమయ్యింది. క్యాస్టింగ్ ప్లాన్ తో హరీష్ రెడీ ఉన్నాడు. కానీ ఎటొచ్చి పవర్ స్టార్ నుంచే సెట్స్ పైకి వచ్చేందుకు గ్రీన్ సిగ్నల్ అందలేదు. దీంతో వాయిదాల మీద వాయిదాలు తప్పలేదు. సడన్ గా ఫిక్స్ చేసుకున్న వినోదయ సితం రీమేక్ సైతం పెండింగ్ లో ఉంచేశారు. అదైనా మొదలుపెడతారా లేదో తెలియదు
పూజా హెగ్డేకు ఇష్టం లేకపోయినా డ్రాప్ అయ్యిందని తెలిసింది. ఎందుకంటే తనకిప్పుడు ఎన్నో కమిట్ మెంట్స్ ఉన్నాయి. మహేష్ బాబు త్రివిక్రమ్ శ్రీనివాస్ కాంబినేషన్ ప్రాజెక్టు కోసం జూలై నుంచి బిజీ అవుతుంది. ఆల్రెడీ సల్మాన్ ఖాన్ కభీ ఈద్ కభీ దీవాలి షూటింగ్ లో పాల్గొంటోంది. మరికొన్ని ప్రతిపాదన స్టేజిలో ఉన్నాయి. జూనియర్ ఎన్టీఆర్ కొరటాల శివ ప్యాన్ ఇండియా మూవీకి తననే లాక్ చేసుకున్నా ఆశ్చర్యం లేదు. విజయ్ దేవరకొండతో పూరి జగన్నాథ్ తీయబోయే జనగణమన అతి త్వరలో స్టార్ట్ అవుతుంది. ఇంత టైట్ షెడ్యూల్స్ ఉంటే భవదీయుడు భగత్ సింగ్ కోసం కాల్ షీట్స్ ని ఖాళీగా ఉంచుకునే పరిస్థితి లేదు. అందుకే తప్పుకోవాల్సి వచ్చింది.
ఇక పవన్ సంగతి చూస్తే హరిహర వీరమల్లులో విపరీతమైన జాప్యం జరుగుతోంది. 2023 సంక్రాంతికి రిలీజ్ చేయడం అనుమానంగానే ఉంది. వినోదయ సితం టేకప్ చేయాల్సిన సముతిరఖని మొన్నటి దాకా అదిగో ఇదిగో అంటూ చెప్పుకొచ్చారు కానీ ఆయన సైలెంట్ అయ్యారు. తమిళ సినిమాలతో బిజీ అయ్యారు. వీటికి తోడు పవన్ జనసేన పనులను సైతం షూటింగులతో సమానంగా నెత్తినేసుకోవడంతో ఎక్కడిక్కడ నిర్మాతలకు ఇబ్బందులు తప్పడం లేదు. సో పూజా హెగ్డే ఎలా చూసుకున్నా మంచి నిర్ణయమే తీసుకుంది. అసలు తీసుకోవడమే అఫీషియల్ గా చెప్పలేదు కానీ ఇప్పుడీ వార్తను సైతం అధికారికంగా ధృవీకరించే ఛాన్స్ లేదు.
