భారత దిగ్గజ సంస్థ రిలయన్స్ ఇండస్ట్రీస్ 46వ ఏజీఎం ప్రారంభమైంది. ఈ సందర్భంగా సంస్థ ఛైర్మన్ ముకేశ్ అంబానీ కీలక నిర్ణయాలు ప్రకటించారు. ఇందులో ముఖ్యమైనది నీతా అంబానీ రాజీనామా. రిలయన్స్ బోర్డు నుంచి తన సతీమణి తప్పుకుంటున్నట్లు ముకేశ్ అంబానీ ప్రకటించారు. ఇదే టైమ్లో రిలయన్స్ ఇండస్ట్రీలోకి తమ వారసులు ఇషా అంబానీ, ఆకాశ్ అంబానీ, అనంత్ అంబానీకి చోటు కల్పిస్తున్నామని వెల్లడించారు. వీళ్లను నాన్ ఎగ్జిక్యూటివ్ డైరెక్టర్లుగా నియమిస్తూ ఆయన నిర్ణయం తీసుకున్నారు.
రిలయన్స్ ఫౌండేషన్ సేవల్ని మరింత ఫోకస్డ్గా ముందుకు తీసుకెళ్లే ఉద్దేశంతోనే నీతా అంబానీ రాజీనామా చేశారని సమాచారం. ఇక, రిలయన్స్ ఏజీఏం సందర్భంగా కంపెనీ స్టాక్ ఎక్స్ఛేంజీలకు ఫైలింగ్ గురించి కూడా వెల్లడించారు. అనంతరం వాటాదారులను ఉద్దేశించి ముకేశ్ అంబానీ కీలక వ్యాఖ్యలు చేశారు. చంద్రయాన్-3 ప్రయోగం విజయవంతం అవడంపై ఇస్రో సైంటిస్టులకు ఆయన అభినందనలు తెలిపారు. అలాగే రిలయన్స్ ఇండస్ట్రీస్ డెవలప్మెంట్కు సంబంధించి కూడా పలు ముఖ్యమైన ప్రకటనలు చేశారాయన. గత పదేళ్లలో రిలయన్స్ సంస్థ 150 బిలియన్ డాలర్ల మేర పెట్టుబడులు పెట్టిందని ముకేశ్ తెలిపారు.
దేశంలోని ఏ ఇతర కార్పొరేట్ కంపెనీ కూడా రిలయన్స్ మాదిరిగా ఇన్వెస్ట్మెంట్స్ చేయలేదన్నారు ముకేశ్ అంబానీ. కష్టసాధ్యమైన లక్ష్యాల్ని కూడా తాము సుసాధ్యం చేశామన్నారు. వినియోగదారులకు నాణ్యమైన సేవల్ని అందించేందుకు వినూత్న పద్ధతులను తీసుకొచ్చామని పేర్కొన్నారు. భారత్లో రిలయన్స్ జియో యూజర్ల సంఖ్య 45 కోట్లు దాటిందని అంబానీ తెలిపారు. రిలయన్స్ సంస్థలో అన్ని విభాగాల్లోనూ కలిపి 2.6 లక్షల కొత్త ఉద్యోగాల కల్పన జరిగిందన్నారు. ఫైబర్ కేబుల్ అవసరం లేకుండానే రిలయన్స్ జియో తీసుకురానున్న జియో ఎయిర్ ఫైబర్ను వినాయక చవితి పండుగ సందర్భంగా సెప్టెంబర్ 19న లాంఛ్ చేయనున్నట్లు ముకేశ్ అంబానీ ప్రకటించారు.
