సాధారణంగా కార్లలో సేఫ్టీ కోసం సీట్ బెల్టులను వినియోగిస్తుంటారు. విమాన ప్రయాణాల్లోనూ వీటిని వాడుతుంటారు. ఫ్లైట్లో జర్నీ చేసే సమయంలో సీట్ బెల్ట్ పెట్టుకోవడం తప్పనిసరి. ఇప్పుడు ఇలాంటి నిబంధనే మన ఆర్టీసీ బస్సుల్లోనూ రానుంది. తెలంగాణ రాజధాని హైదరాబాద్లో తొలిసారిగా సీట్ బెల్టులు ఉండే సిటీ బస్సుల్ని అందుబాటులోకి తీసుకొస్తున్నారు. ఫారెన్ కంట్రీస్లో బస్సుల్లో సీట్ బెల్టులు తప్పనిసరి. వాస్తవానికి మన దేశంలోనూ బస్సుల్లో సీటు బెల్టులు ఉండాలనే నిబంధన ఉన్నా అది అమలు కావడం లేదు. మొదటిసారిగా టీఎస్ఆర్టీసీ సిటీ సర్వీసుల్లో ఈ తరహా సీట్లను అందుబాటులోకి తెస్తున్నారు.
హైదరాబాద్ సిటీలో మరో నెలన్నరలో కొత్త ఎలక్ట్రిక్ ఏసీ బస్సులు అందుబాటులోకి రానున్నాయి. ఈ బస్సుల్లో సీట్ బెల్టులు కనిపించనున్నాయి. కొత్త ఎలక్ట్రిక్ ఏసీ బస్సులు ఎలా ఉంటాయనే దానికి సంబంధించిన నమూనా బస్సును సోమవారం బస్ భవన్కు తీసుకొచ్చారు. ఈ నమూనా బస్సును ఆర్టీసీ ఎండీ సజ్జనార్ పరిశీలించారు. శంషాబాద్ ఎయిర్పోర్టుతో పాటు ఐటీ కారిడార్ రూట్లలో తిరిగేందుకు వీలుగా ఎలక్ట్రిక్ ఏసీ బస్సులను సిద్ధం చేయాలని ఆర్టీసీ ఇటీవల నిర్ణయించింది. పుష్పక్ పేరుతో ఇప్పటికే 40 ఎలక్ట్రిక్ బస్సులు ఎయిర్పోర్టు రూట్లో తిరుగుతున్న విషయం తెలిసిందే.
ఎయిర్పోర్టు రూట్లలో తిరుగుతున్న ఎలక్ట్రిక్ బస్సులు మంచి లాభాల్లో ఉండటం, రద్దీకి చాలినన్నీ సర్వీసులు లేకపోవడంతో అదనంగా మరిన్ని బస్సులు తిప్పాలని ఆర్టీసీ నిర్ణయించింది. అలాగే ఐటీ కారిడార్లో మెట్రో సర్వీసులు అందుబాటులో లేని రూట్లలోనూ కొన్ని బస్సుల్ని తిప్పాలని డిసైడ్ అయింది. ప్రస్తుతం ఎయిర్పోర్టు రూట్లో నడుస్తున్న ఎలక్ట్రిక్ బస్సులతో పోలిస్తే ఆధునిక వసతులు కలిగిన ఈ కొత్త బస్సులు ప్యాసింజర్లకు మరింత మెరుగైన రవాణా వసతిని అందించనున్నాయి. ఈ మేరకు 500 ఎలక్ట్రిక్ ఏసీ బస్సుల కోసం ఆర్టీసీ ఆర్డర్ ఇవ్వగా.. తొలి విడతలో 50 బస్సులు అందుబాటులోకి రానున్నాయి. అందులో 20 ఎయిర్పోర్టుకు, 30 ఐటీ కారిడార్కు తిరుగుతాయి.
