కోర్టుల్లో కొన్ని కేసులు త్వరగా పరిష్కారమైనప్పటికీ.. మరికొన్ని కేసులు మాత్రం ఏళ్లకు ఏళ్లు నానడాన్ని చూస్తూనే ఉన్నాం. కేసుల పరిష్కారానికి సంవత్సరాల తరబడి కోర్టుల చుట్టూ తిరగడం గురించి వార్తల్లోనూ చూస్తూనే ఉంటాం. ఈ కేసు కూడా అలాంటిదే. ఐదు, పది కాదు ఏకంగా 75 ఏళ్ల నుంచి ఈ కేసు కోర్టులోనే నలుగుతోంది. ఈలోపు ఎంతో మంది జడ్జిలు మారారు. కానీ పరిష్కారం మాత్రం రాలేదు. అయితే తమకు న్యాయం జరగాలని చేస్తున్న పోరాటాన్ని ఆదివాసీలు మాత్రం ఆపలేదు. న్యాయం కోసం పట్టువదలని విక్రమార్కుల్లా ఏళ్లకు ఏళ్లు పోరాడుతూనే వచ్చారు. ఎట్టకేలకు ఈ కేసులో వారు సక్సెస్ అయ్యారు. అవును.. 75 ఏళ్ల పాటు ఆదివాసీలు నిర్వహించిన పోరాటానికి నేడు ఫలితం దక్కింది. 75 ఏళ్ల నుంచి నలుగుతున్న ఒక కేసులో తెలంగాణ హైకోర్టు సంచలన తీర్పు వెలువరించింది.
పట్టువదలకుండా పోరాటం సాగించిన ఆదివాసీలకు ఈ కేసులో విజయం లభించింది. ములుగు జిల్లా, మంగపేట మండలంలోని 23 గ్రామాలు రాజ్యాంగంలోని ఐదో షెడ్యూల్ పరిధిలోకి వస్తాయని రాష్ట్ర హైకోర్టు ఇవాళ తీర్పు ఇచ్చింది. ఆయా గ్రామాలకు సంబంధించిన ఈ కేసులో చీఫ్ జస్టిస్ ఉజ్జల్ భూయాన్ నేడు తీర్పును వెలువరించారు. ఆదివాసీల తరఫున న్యాయవాది చిక్కుడు ప్రభాకర్ వాదనలు వినిపించారు. ఆ 23 గ్రామాలు రాజ్యాంగంలోని ఐదో షెడ్యూల్ కిందకు రావని ఆదివాసీయేతర రాజకీయ నేతలు కోర్టును ఆశ్రయించారు. అయితే ఇరుపక్షాల వాదనలు విన్న న్యాయస్థానం.. ఎట్టకేలకు ఆదివాసీలకు అనుకూలంగా తీర్పును ఇచ్చింది. ఇకపోతే, భారత రాజ్యాంగంలోని షెడ్యూల్ 5 అనేది షెడ్యూల్ ప్రాంతాల పరిపాలనకు సంబంధించినది అనే విషయం తెలిసిందే.
