వీడియో: ఇంట్లోకి కుక్క వచ్చిందని 100కు డయల్.. ఆ తర్వాత ఏం జరిగిందంటే..!

డయల్ 100 గురించి తెలిసిందే. అత్యవసర పరిస్థితుల్లో ఉన్నప్పుడు ఈ నంబర్​కు కాల్ చేస్తే చాలు.. నిమిషాల వ్యవధిలోనే పోలీసులు రెక్కలు కట్టుకొని వాలిపోతుంటారు. అత్యవసర సమయాల్లో బాధితులను ఆదుకునేందుకు ఈ టోల్ ఫ్రీ నంబర్​ సేవల్ని ఏర్పాటు చేశారు. 100కు కాల్ చేసి సమాచారం అందిస్తే పోలీసులు వెంటనే రంగంలోకి దిగుతారు. వీలైనంత త్వరగా చర్యలు తీసుకొని బాధితులకు సత్వర న్యాయం అందిస్తున్నారు. పోలీసుల వైపు నుంచి తక్షణ స్పందన ఉండటంతో ఈ నంబర్​కు కాల్ చేసే వారి సంఖ్య పెరిగింది. కొందరు ఆకతాయిలు, పోకిరీలు దీన్ని అదనుగా తీసుకొని పోలీసులను ఇబ్బంది పెట్టిన సందర్భాలు కూడా ఉన్నాయి. చిన్న సమస్యలకు కూడా 100కు కాల్ చేయడం ఎక్కువైపోయింది.

తాజాగా ఓ వ్యక్తి 100కు డయల్ చేశాడు. దీంతో పోలీసులు హుటాహుటిన అక్కడికి చేరుకున్నారు. ఈ ఘటన సరిగ్గా ఎక్కడ జరిగిందో తెలియదు గానీ సమాచారం అందగానే పోలీసులు అక్కడికి చేరుకున్నారు. తీరా చూస్తే.. అతడి ఇంట్లో కుక్క దూరిందట. తన ఇంట్లోకి కుక్క వచ్చిందని, దాన్ని తరిమేయాలని పోలీసులను కోరాడా వ్యక్తి. దీంతో అక్కడికి వచ్చిన పోలీసులు.. ఈ మొత్తం వ్యవహారాన్ని వీడియో తీశారు. గేటుకు తాళం వేసుకోవాలని, ఇలా కాల్ చేయడం కరెక్ట్ కాదని.. తమ విలువైన సమయాన్ని వృథా చేయొద్దని పోలీసులు కోరారు. దీనికి సంబంధించిన వీడియో ఇప్పుడు నెట్టింట వైరల్​గా మారింది.

ఈ వీడియోపై సోషల్ మీడియలో నెటిజన్స్ భిన్నాభిప్రాయాలు వ్యక్తం చేస్తున్నారు. కొందరు పోలీసులు చెప్పిన దాంట్లో తప్పు లేదని, చిన్న వాటికి కూడా వాళ్లను పిలవడం కరెక్ట్ కాదని అంటున్నారు. అయితే మరికొందరు మాత్రం ఆ వ్యక్తి చేసిన దాంట్లో తప్పు లేదని, కుక్క కరుస్తుందేమోననే భయంతో పోలీసులను పిలిచాడని కామెంట్స్ చేస్తున్నారు. వీధి కుక్కల బెడదను తగ్గించాలని మరికొందరు నెటిజన్స్ కోరుతున్నారు. మరి.. ఇంట్లోకి కుక్క దూరిందని పోలీసులకు ఫిర్యాదు చేసిన ఈ ఘటన మీద మీరేం అనుకుంటున్నారో కామెంట్ల రూపంలో తెలియజేయండి.

• ఇదీ చదవండి: రాష్ట్ర అధికారిక చిహ్నంలో మార్పులు.. ఇకపై అవి కనిపించవా?