ప్రపంచంలోని అతిపెద్ద క్రికెట్ స్టేడియం అయిన అహ్మదాబాద్లోని నరేంద్ర మోడీ మైదానంలో ప్రతిష్టాత్మక మ్యాచ్కు అంతా రెడీ అయిపోయింది. దాయాదులు ఇండియా-పాకిస్థాన్ మధ్య ఫైట్కు సర్వం సిద్ధమైంది. క్రికెట్ ఫ్యాన్స్ అంతా ఎప్పుడెప్పుడా అని ఎదురు చూస్తున్న రోజు రానే వచ్చింది. వన్డే వరల్డ్ కప్లో అత్యంత కీలక పోరుకు మరికొన్ని గంటల టైమ్ మాత్రమే మిగిలి ఉంది. పాకిస్థాన్తో తాడోపేడో తేల్చుకునేందుకు టీమిండియా వెయిట్ చేస్తోంది. మ్యాచ్కు మరికొన్ని గంటలు మాత్రమే ఉన్న నేపథ్యంలో ఎవరు గెలుస్తారనే దానిపై చాలా ప్రెడిక్షన్స్ వస్తున్నాయి. అయితే హిస్టరీ చూసుకుంటే భారత్ వైపే అనుకూలంగా ఉంది. ప్రస్తుతం కూడా టీమిండియాదే జోరు. బలాబలాల్లోనూ పాకిస్థాన్ఫై భారత్దే పైచేయి.
సొంత గడ్డపై ఆడుతుండటం టీమిండియాకు బిగ్ ప్లస్ కానుంది. ఈ మ్యాచ్లో నిస్సందేహంగా భారత జట్టే ఫేవరెట్ అని చెప్పొచ్చు. ఇప్పటిదాకా వన్డే వరల్డ్ కప్స్లో భారత్-పాక్ ఏడు సార్లు తలపడ్డాయి. ఆ 7 మ్యాచుల్లోనూ టీమిండియానే విజయం వరించింది. దీన్ని బట్టే మెగా టోర్నీలో దాయాదిపై మన టీమ్ డామినేషన్ ఏ రేంజ్లో ఉందో అర్థం చేసుకోవచ్చు. ఇటీవల జరిగిన ఆసియా కప్లోనూ పాక్ను చిత్తు చేసింది రోహిత్ సేన. గతం చూసుకున్నా, ఇప్పుడు చూసుకున్నా భారత జట్టుదే ఆధిపత్యం కనిపిస్తోంది. పాకిస్థాన్తో పోల్చుకొని చూస్తే అన్ని విభాగాల్లోనూ టీమిండియా బలంగా కనిపిస్తోంది. ఈ మధ్య కాలంలో ఎన్నడూ లేనంత భీకర ఫామ్లో ఉన్నారు భారత ప్లేయర్లు. ఆసియా కప్ను నెగ్గిన మన జట్టు.. ఆ తర్వాత ఆసీస్తో సిరీస్ను నెగ్గింది.
ఒక్క వార్మప్ మ్యాచ్ ఆడకపోయినా, సరైన ప్రాక్టీస్ లేకపోయినా వరల్డ్ కప్-2023లో వరుస విజయాలతో దూసుకెళ్తోంది టీమిండియా. పటిష్టమైన కంగారూ టీమ్పై ఓడిపోతామేమో అనే మ్యాచ్లో పోరాడి 6 వికెట్ల తేడాతో నెగ్గింది. బ్యాటర్లు అందరూ సూపర్ ఫామ్లో ఉన్నారు. ఆసీస్తో మ్యాచ్లో ఫెయిలైన రోహిత్ శర్మ, ఇషాన్ కిషన్, శ్రేయస్ అయ్యర్లు ఆఫ్ఘాన్తో మ్యాచ్తో ఫామ్ అందుకున్నారు. భారీ సెంచరీతో ప్రత్యర్థులకు హిట్మ్యాన్ హెచ్చరికలు పంపాడు. డెంగ్యూ నుంచి కోలుకున్న ఓపెనర్ శుబ్మన్ గిల్ తిరిగి టీమ్లో చేరడంతో భారత్ మరింత బలంగా కనిపిస్తోంది. గత మ్యాచ్లో ఆడిన శార్దూల్ ఠాకూర్ ప్లేసులో మమ్మద్ షమి లేదా రవిచంద్రన్ అశ్విన్ను ఆడించొచ్చు. పిచ్ పరిస్థితుల్ని బట్టి ఇద్దరిలో ఎవరో ఒకర్ని తీసుకోవచ్చు. ఎవరు టీమ్లో చేరినా అదనపు బలం చేకూరుతుంది. బౌలింగ్, బ్యాటింగ్, ఫీల్డింగ్లో టాప్ ఫామ్లో ఉండటం.. తాజా ఫామ్, రికార్డులు, సొంత గడ్డపై ఆడటం టీమిండియాకు కలిసొచ్చే అంశాలు.
పాకిస్థాన్ను తక్కువ అంచనా వేయడానికి వీల్లేదు. ఆ టీమ్లో హారిస్ రౌఫ్, మహ్మద్ రిజ్వాన్, షఫీక్, బాబర్ ఆజం లాంటి డేంజరస్ ప్లేయర్లు ఉన్నారు. వీరిలో బాబర్కు భారత్ఫై మంచి రికార్డు లేదు. షఫీక్కు ఎక్స్పీరియెన్స్ లేదు. బ్యాటింగ్లో రిజ్వాన్ను త్వరగా ఔట్ చేయడం కీలకం. బౌలింగ్లో రౌఫ్తో పాటు షహీన్ ఆఫ్రిదీని సమర్థంగా ఎదుర్కోవడం ముఖ్యం. అయితే ప్రస్తుత ఫామ్, గత రికార్డులు, బలాబలాలు చూసుకుంటే ఈ మ్యాచ్లో సొంతగడ్డపై ఆడుతున్న భారత్దే గెలుపు పక్కా అని చెప్పాలి. ఏ విధంగా చూసినా ఇవాళ్టి మ్యాచ్లో టీమిండియా నెగ్గడం ఖాయం. మన టీమ్ స్థాయికి తగ్గట్లు ఆడితే వరల్డ్ కప్లో ముచ్చటగా మూడో గెలుపు, పాకిస్థాన్పై 8-0తో అజేయ రికార్డు కంటిన్యూ అవుతుంది. మరి.. ఈ మ్యాచ్లో ఎవరు గెలుస్తారని మీరు భావిస్తున్నారో కామెంట్ల రూపంలో తెలియజేయండి.
ఇదీ చదవండి: భారత్తో మ్యాచ్కు ముందు రోహిత్ను ప్రశంసల్లో ముంచెత్తిన పాక్ టీమ్!
