భూమా కుటుంబంలో చిచ్చు : అక్కా, త‌మ్ముళ్ల మ‌ధ్య విభేదాలు?

మాజీ మంత్రి, టీడీపీ నాయకురాలు భూమా అఖిలప్రియ ఇప్ప‌టి వ‌ర‌కూ కేసుల‌తోనే ఉక్కిరిబిక్కిరి అవుతుంటే.. ఇప్పుడు మ‌రో త‌ల‌నొప్పి మొద‌లైన‌ట్లు తెలుస్తోంది. సొంత త‌మ్ముడి నుంచే విమ‌ర్శ‌లు ఎదుర్కొంటున్న‌ట్లు తెలుస్తోంది. అఖిల‌, ఆమె భ‌ర్త భార్గవ్ వ్య‌వ‌హార శైలి కార‌ణంగా భూమా కుటుంబానికి ఓ వైపు సొంత వ‌ర్గం, మ‌రోవైపు పార్టీ శ్రేణులు దూర‌మ‌వుతున్నారు. ఈ క్ర‌మంలో అఖిల‌ప్రియ త‌మ్ముడు భూమా జగత్ విఖ్యాత్‌ రెడ్డి ఒంటరిగా రాజకీయాల్లో నిలదొక్కుకునే ప్రయత్నం ప్రారంభించినట్లు క‌నిపిస్తోంది. కిడ్నాప్ కేసులో పోలీసు విచారణ నుంచి తప్పించుకునేందుకు తప్పుడు మెడికల్‌ సర్టిఫికెట్లు సమర్పించారని బోయిన్‌పల్లి పోలీసులు అఖిల భర్త భార్గవ్‌రామ్, సోదరుడు జగత్‌ విఖ్యాత్‌ రెడ్డిపై కూడా కేసు నమోదు చేశారు. అందుకు కార‌ణం బావేన‌ని జ‌గ‌త్ న‌మ్ముతున్నాడ‌ట‌. ఈ విష‌యంలో కూడా వారితో జ‌గ‌త్ విభేదిస్తున్న‌ట్లు తెలుస్తోంది.

త‌ప్పు మీద త‌ప్పు

అయితే కుట్రపూరితంగా పోలీసులు తప్పుడు సర్టిఫికెట్లు సృష్టించి తమపై అభియోగం మోపుతున్నారని అఖిల చెబుతున్నారు. ఇదే క్రమంలో జగత్, భార్గవ్‌ పరస్పరం వాదనకు దిగినట్లు తెలుస్తోంది. ఈ వ్యవహారం కర్నూలు జిల్లాలో తీవ్ర చర్చనీయాంశమవుతోంది. హైదరాబాద్‌లోని శేరిలింగంపల్లిలో 40 ఎకరాల భూమిని ఆక్రమించుకునేందుకు సీఎం కేసీఆర్‌ బంధువులను అఖిలప్రియ, ఆమె భర్త భార్గవ్, తమ్ముడు జగత్‌ విఖ్యాత్‌ రెడ్డి కిడ్నాప్‌ చేశారని ఈ ఏడాది జనవరిలో అక్కడి పోలీసులు కేసు నమోదు చేశారు. ఈ ఘటనలో అఖిలకు 14 రోజులు రిమాండ్‌ విధించడంతో చంచల్‌గూడ జైలుకు వెళ్లి వచ్చారు. భార్గవ్, జగత్‌ పోలీసులకు లొంగిపోకుండా ముందస్తు బెయిల్‌ తెచ్చుకున్నారు. కాగా ఈనెల 3వ తేదీన సికింద్రాబాద్‌లోని సిటీ కోర్టులో హాజరు కావాల్సి ఉండ‌గా రాలేదు. పైగా కొవిడ్ కార‌ణంగా రాలేక‌పోయామ‌ని దొంగ స‌ర్టిఫికెట్లు స‌మ‌ర్పించ‌డంతో మ‌రిన్ని కేసులు వారికి చుట్టుకున్నాయి.

బావ, బామ్మర్ది మధ్య గొడవ

రెండేళ్లుగా భూమా కుటుంబంలో జరుగుతున్న వరుస పరిణామాలకు భార్గవ్‌ వైఖరే కారణమని జగత్‌ బలంగా నమ్ముతున్నట్లు తెలుస్తోంది. భూమా నాగిరెడ్డి మృతి తర్వాత భూమాకు అన్నీతానై వ్యవహరించిన ఏవీ సుబ్బారెడ్డి కూడా ఆ కుటుంబానికి దూరమయ్యారు. అలాగే వారి సమీప బంధువు శివరామిరెడ్డి, నాగిరెడ్డి చిన్నాన్న, విజయ డెయిరీ మాజీ చైర్మన్‌ భూమా నారాయణరెడ్డి, అఖిల పెదనాన్న భాస్కర్‌రెడ్డి కుమారుడు భూమా కిషోర్‌రెడ్డి దూరంగా ఉంటున్నారు. పార్టీలో మండల, గ్రామస్థాయి నేతలు చాలా వరకూ దూరమయ్యారు. నంద్యాల మాజీ ఎమ్మెల్యే భూమా బ్రహ్మానందరెడ్డి కూడా పార్టీ వ్యవహారాలకు దూరంగా ఉన్నారు. ఆయన సోదరుడు మహేశ్‌ బీజేపీలో చేరారు. దీంతో ఆళ్లగడ్డలో భూమా కుటుంబం పూర్తిగా పట్టుకోల్పోయింది.

ఆళ్ల‌గ‌డ్డ‌లో ఇదే హాట్ టాపిక్

ఇదే క్రమంలో ఎమ్మెల్యే గంగుల బిజేంద్రారెడ్డి బలపడుతున్నారు. ఈ పరిణామాల నేపథ్యంలో జగత్‌ ఎక్కడ పొరపాటు జరుగుతోందని ఆలోచించి, దానికి భార్గవ్‌ కారణమని అతనితో వాదనకు దిగినట్లు తెలుస్తోంది. అఖిలతో కూడా జగత్‌ గట్టిగా వాదించి, ఆళ్లగడ్డ రాజకీయాలు ఇక తాను చూసుకుంటానని, భార్గవ్‌ జోక్యం ఇక అనవసరమని తేల్చిచెప్పినట్లు తెలుస్తోంది. ఈ ఘటన ఇప్పుడు ఆళ్లగడ్డతో పాటు జిల్లా వ్యాప్తంగా చర్చనీయాంశమవుతోంది. అయితే వయసు రీత్యా ఎన్నికల్లో పోటీ చేసేందుకు జగత్‌కు 2024కు రెండు నెలలు వయస్సు తక్కువ వస్తున్నట్లు తెలుస్తోంది. దీంతో పోటీ చేయాలంటే అఖిల తప్పనిసరి కావడంతో ఏం చేయాలో దిక్కుతోచని సంకటస్థితిలో జగత్‌ ఉన్నట్లు తెలుస్తోంది. అయితే ఎన్నికలు కాస్త అటో ఇటో జరిగితే వయస్సు సమస్య ఉండదని, ఆ పరిస్థితి వస్తే తానే పోటీ చేయాలనే యోచనలో జగత్‌ ఉన్నట్లు తెలుస్తోంది