సంక్రాంతి పండగ ముగిసిన మరుసటి రోజే ఆంధ్రప్రదేశ్‌లో ఎన్నికల పండగ మొదలవబోతోంది. ఏపీలో స్థానిక సంస్థల ఎన్నికలకు ఈరోజు హైకోర్టు గ్రీన్‌సిగ్నల్‌ ఇచ్చింది. కోర్టు ఆదేశాల మేరకు ఎన్నికల షెడ్యూల్‌కు సంబంధించిన వివరాలతో కూడిన అఫిడవిట్‌ను అధికారులు హైకోర్టుకు ఈ రోజు సమర్పించారు. దీన్ని పరిశీలించిన హైకోర్టు ఈ మేరకు అనుమతి మంజూరు చేసింది.
రాష్ట్ర ఎన్నికల సంఘం రూపొందించిన ఈ షెడ్యూల్‌లో అన్ని పరిషత్, పంచాయతీ ఎన్నికలను మార్చి 3 లోపు పూర్తి చేసేలా పొందుపరిచారు. ముందు ఎంపీటీసీ, జడ్పీటీసీ ఎన్నికలు జరుగనున్నాయి. ఈ నెల 17 నుంచి ఫిబ్రవరి 15 మధ్యన ఈ ఎన్నికలు పూర్తి చేస్తామని అపిడవిట్‌లో పేర్కొన్నారు. ఫిబ్రవరి 8 నుంచి మార్చి 3 మధ్యన పంచాయతీ ఎన్నికలు నిర్వహిస్తామని అధికారులు తెలిపారు.
స్థానిక సంస్థల ఎన్నికలకు సంబంధించి హైకోర్టు గ్రీన్‌ సిగ్నల్‌ ఇవ్వడం, షెడ్యూల్‌ కూడా రూపొందించడంతో రాష్ట్ర ఎన్నికల సంఘం రంగంలోకి దిగింది. ఈ నెల 10వ తేదీన ప్రభుత్వ ప్రధాన కార్యదర్శి, డీజీపీ, పంచాయతీ రాజ్, ఆర్థిఖ శాఖ అధికారులతో సమావేశం కానుంది. ఆ తర్వాత 13వ తేదీన రాష్ట్రంలోని రాజకీయ పార్టీల నాయకులతో సమావేశం నిర్వహించనుంది.
