స్టీల్ ప్లాంట్ కు టెండ‌ర్ : అమ్మ‌కంపై కేంద్రం ముందుకే

సుమారు 26,000 ఎకరాలకు పైగా విస్త‌రించి ఉన్న ప్లాంట్. సంవత్సరానికి 7.3 మిలియన్ టన్నుల ఉక్కు ఉత్ప‌త్తి సామ‌ర్థ్యం. సుమారు 16,000 మంది శాశ్వత ఉద్యోగులు , 17,500 మంది కాంట్రాక్ట్ ఉద్యోగులు ఉన్నారు. పరోక్షంగా మరో లక్ష మంది వ్యక్తులు విశాఖ స్టీల్ ప్లాంట్ పై ఆధారపడి జీవిస్తున్నారు. క‌రోనా స‌మ‌యంలో కూడా వేలాది మందికి ఆక్సిజ‌న్ అందించి ప్రాణాల‌ను నిలిపింది. అటువంటి ప్లాంట్ ప‌రిర‌క్ష‌ణ కోసం ల‌క్ష‌లాది మంది కార్మికులు పోరాడుతున్నారు. ఏపీ ప్ర‌భుత్వం సైతం ప్లాంట్ ప్రైవేటీక‌ర‌ణ కాకుండా త‌న వంతు ప్ర‌య‌త్నాలు చేస్తూనే ఉంది. నేరుగా ముఖ్య‌మంత్రే కేంద్రానికి లేఖ రాశారు. మ‌రోవైపు ఐదు నెల‌లుగా ప్లాంట్ కోసం ఉద్య‌మం కొన‌సాగుతూనే ఉంది. కేంద్ర మాత్రం ప్లాంట్ అమ్మ‌కంపై వ‌డివ‌డిగా అడుగులు వేస్తోంది. తాజాగా టెండ‌ర్ల‌కు నోటిఫికేష‌న్ జారీ చేసి అంద‌రికీ షాక్ ఇచ్చింది.

మ‌రోసారి స్ప‌ష్టం చేసిన కేంద్రం

స్టీల్ ప్లాంట్ ప్రైవేటీకరణను నిరసిస్తూ కేంద్ర ప్రభుత్వం తీసుకున్న నిర్ణయాన్ని మార్చుకోవాలని, వెంటనే ప్రైవేటీకరణను ఉపసంహరించుకోవాలని స్టీల్ ప్లాంట్ కార్మికులు, ఉద్యోగులు ఆందోళన కొనసాగిస్తున్న విషయం తెలిసిందే. విశాఖ స్టీల్ ప్లాంట్ ప్రైవేటీకరణకు వ్యతిరేకంగా రాష్ట్రంలో బీజేపీ మినహాయించి అఖిలపక్ష పార్టీలు కేంద్రం తీరును నిరసిస్తూ తమ గళాన్ని వినిపిస్తున్నాయి. విశాఖ స్టీల్ ప్లాంట్ ప్రైవేటీకరణకు వ్యతిరేకంగా విశాఖ మహా నగర పాలక సంస్థ జిహెచ్ఎంసి తీర్మానం చేసింది. కానీ తాజాగా కేంద్రం మరోమారు తన నిర్ణయాన్ని మార్చుకోబోము అన్న విషయాన్ని స్పష్టం చేసింది. విశాఖ స్టీల్ ప్లాంట్ విక్రయానికి వేగంగా అడుగులు వేస్తుంది.

జూలై 7 నుంచే టెండ‌ర్లు

ఇప్పుడు తాజాగా వైజాగ్ స్టీల్ ప్లాంట్ ప్రైవేటీకరణ సంబంధించి టెండర్లను ఆహ్వానిస్తూ కేంద్ర ప్రభుత్వం ఉత్తర్వులు జారీ చేసింది. అమ్మకానికి రోడ్ మ్యాప్ సిద్ధం చేసింది. అమ్మకానికి షెడ్యూల్ ను విడుదల చేసింది. ప్రైవేటీకరణ ప్రక్రియలో భాగంగా లీగల్ అడ్వైజ,ర్ ట్రాన్సాక్షన్ అడ్వైజర్ లను నియమించింది కేంద్రం. ఒకపక్క వైజాగ్ స్టీల్ ప్లాంట్ ప్రైవేటీకరణను అంగీకరించేది లేదని స్థానికంగా జరుగుతున్న ఉద్యమాలను, అభ్యంతరాలను ఏమాత్రం పట్టించుకోకుండా కేంద్ర ప్రభుత్వం నిర్ణయం తీసుకుంది. జూలై 7 నుంచే టెండ‌ర్ల‌ను ఆహ్వానిస్తూ బిడ్డింగ్ ప్రారంభించారు.

ఎంపికైన సంస్థ‌కు అమ్మ‌కం

ప్లాంట్ బిడ్ లకు సంబంధించిన అప్లికేషన్లను బుధవారం నుంచి ఆన్లైన్లో అందుబాటులో ఉంచారు. 15వ తేదీన ప్రీ-బిడ్ మీటింగ్ నిర్వహించనున్నారు. ఆపై 28వ తేదీన బిడ్ సమర్పణ చివరి తేదీగా నిర్ణయించారు. 29వ తేదీన సాంకేతిక బిడ్లను ప్రకటించనున్నారు. బిడ్ లలో పాల్గొనడానికి రూ .1 లక్ష డిపాజిట్ మరియు 1 కోటి రూపాయల ఆర్థిక సంస్థ హామీ ఇవ్వాలని కేంద్రం నోటిఫికేషన్‌లో పేర్కొంది. ఇందులో ఎంపికైన కంపెనీకి తక్షణమే స్టీల్ ప్లాంట్ ఇచ్చేందుకు కూడా రంగం సిద్ధం చేస్తున్నారు. విశాఖపట్నం స్టీల్ ప్లాంట్‌తో పాటు దానికి అనుబంధంగా ఉన్న 100 శాతం అనుబంధ సంస్థలను సైతం విక్రయిస్తామని కేంద్రం ఒక ప్రకటనలో పేర్కొంది. ఏపీలోని జగ్గయ్యపేట, తెలంగాణలోని మాదారం స్టీల్ ప్లాంట్ గనులు అదనంగా విక్రయించనున్నట్టు పేర్కొంది.

ఉద్య‌మం ఉధృతం కానుందా

ప్లాంట్ ప‌రిర‌క్ష‌ణ కోసం దాదాపు ఐదు నెల‌లుగా ఉద్య‌మం కొన‌సాగుతోంది. అఖిల‌ప‌క్షం ఆధ్వ‌ర్యంలో కార్మికులు నిర‌స‌న‌లు కొన‌సాగిస్తూనే ఉన్నారు. అయిన‌ప్ప‌ట‌కీ ఇప్పుడు కేంద్రం టెండ‌ర్ల కు నోటిఫికేష‌న్ జారీ చేసింది. కేంద్ర ప్రభుత్వం జారీ చేసిన ఈ నోటిఫికేషన్ పై పెద్ద ఎత్తున కార్మిక సంఘాలు ఆందోళన చేసే అవకాశం ఉన్నట్లుగా తెలుస్తోంది. ఇప్పటికే పలు మార్లు విశాఖ స్టీల్ ప్లాంట్ ప్రైవేటీకరణ ఉపసంహరించుకోవాలని అఖిలపక్ష పార్టీ నేతలతో కలిసి కేంద్ర ప్రభుత్వానికి విజ్ఞప్తి చేశారు. సీఎం జగన్ మోహన్ రెడ్డి సైతం విశాఖ స్టీల్ ప్లాంట్ పరిరక్షణ కోసం కేంద్రానికి లేఖలు రాశారు. తాజా ప‌రిణామాల నేప‌థ్యంలో ఎటువంటి చ‌ర్య‌లు చేప‌ట్ట‌నున్నారో వేచి చూడాలి.

Also Read : వివాదాలొద్దు.. రైతే ముద్దు.. జల వివాదంపై కుండబద్ధలు కొట్టిన జగన్‌