ముంబయ్ నుండి హైదరాబాద్ కి వస్తున్న ఆరెంజ్ ట్రావెల్స్ కి చెందిన బస్సు సంగారెడ్డి జిల్లా రామచంద్రపురం సమీపంలోకి రాగానే ఒక్కసారిగా దగ్ధమైంది. బస్సు డ్రైవర్ అప్రమత్తమై ప్రయాణికులను కిందకు దించివేయడంతో పెను ప్రమాదం తప్పింది.
ఈ ప్రమాదంలో ప్రయాణికులందరూ క్షేమంగా బయట పడటంతో అందరూ ఊపిరిపీల్చుకున్నారు. కాగా ప్రయాణికులు కిందకి దిగిన కొద్ది క్షణాల్లోన్నే బస్సు మొత్తం పూర్తిగా దగ్దమైంది.. ఈ ప్రమాదంలో ప్రయాణికుల సామాన్లు, వస్తువులు పూర్తిగా దగ్ధం అయ్యాయి. కాగా బస్సు ఇంజిన్ నుండి మంటలు వ్యాపించాయని ప్రయాణికులు చెప్తున్నారు. అగ్నిమాపక సిబ్బంది వెంటనే అక్కడకు చేరుకుని మంటలను అదుపు చేశారు. రామచంద్రపురం పోలీసులు కేసు నమోదు చేసి ఈ ఘటనకు గల కారణాలను అన్వేషిస్తున్నారు. డ్రైవర్ అప్రమత్తం కాకుంటే ఘోర ప్రమాదం జరిగి ఉండేదని ప్రయాణికులు వ్యాఖ్యానిస్తున్నారు.
