రాజధానికి సంభందించిన అభివృద్ధి వికేంద్రీకరణ బిల్లు, సీఆర్డీఏ రద్దు బిల్లు, కర్నూల్ కి హైకోర్టు కి సంబందించిన కార్యాలయాల తరలింపు అంశాలపై దాఖలైన పిటిషన్ల పై తదుపరి విచారణను హై కోర్ట్ మార్చి 30 వ తేదికి వాయిదా వేసింది. బుధవారం ఈ పిటిషన్ల పై ఇరుపక్షాల వాదనలు విన్న హైకోర్టు ధర్మాసనం జియన్ రావు కమిటీ, బోస్టన్ కమిటీల నివేదికను కోర్ట్ కి సమర్పించాలని ఆదేశించింది.
ఇక రాజధాని లో ప్రభుత్వం ఇళ్లస్థలాల కేటాయింపు పై దాఖలైన పిటిషన్ పై ఈ రోజు మధ్యాహ్నం 2:30 తరువాత విచారణ చేపడతామని హైకోర్టు తెలిపింది. రాజధాని నిర్మాణానికి రైతులనుండి సేకరించిన భూమిలో 1251 ఎకరాల్ని ఆర్ధికంగా వెనుకబడిన వర్గాలకు ఇళ్లస్థలాలు కేటాయిస్తూ ప్రభుత్వం మంగళవారం జీవో నెంబర్-107 ను జారీచేసింది. ‘నవరత్నాలు-పేదలందరికీ ఇళ్ళు’ పధకం కింద 1251 ఎకరాల్లో 54,307 మందికి ఇళ్ల స్థలాలు కేటాయించనున్నట్టు ఈ జీవో లో ప్రభుత్వం పేర్కొంది. రాజధాని సమీపంలోని మంగళగిరి, తాడేపల్లి, పెదకాకాని మండలాలతో పాటు సమీపంలోని విజయవాడ నగరపాలక సంస్ధకు చెందిన పేద ప్రజలకు ఈ ఇళ్లస్థలాలు కేటాయించనున్నట్టు ప్రభుత్వం తెలిపింది.
భూ సమీకరణలో తీసుకున్న మొత్తం భూమిలో 5 శాతం పేదలకు ఇళ్ల స్థలాల కోసం కేటాయించాలని సీఆర్డీఏ చట్టంలో 53 (డి) నిబంధన చెబుతుందని పురపాలక పట్టణాభివృద్ధి శాఖ కార్యదర్శి జె.శ్యామల రావు పేర్కొన్నారు. అయితే రాష్ట్ర ప్రభుత్వం తీసుకున్న ఈ నిర్ణయాన్ని సవాలు చేస్తూ రాజధాని ప్రాంతానికి చెందిన పలువురు రైతులు హైకోర్టుని ఆశ్రయించారు.
