ఫిల్మ్ ఇండస్ట్రీలో దాదాపుగా పెద్ద సినిమాలదే హవా అని చెప్పొచ్చు. ప్రతి ఏడాది సూపర్ హిట్స్గా నిలిచే మూవీస్లో సుమారుగా అన్నీ బిగ్ మూవీస్ ఉంటాయి. ఆ లిస్టులో ఒకట్రెండు చిన్న చిత్రాలే ఉంటాయి. కానీ అవి సృష్టించే మేనియా అంతా ఇంతా కాదు. ఈ ఏడాది అలా సంచలనం సృష్టించిన సినిమానే ‘బేబీ’. చిన్న చిత్రంగా రిలీజై డబుల్ బ్లాక్ బస్టర్గా నిలిచిందీ మూవీ. బాక్సాఫీస్ వద్ద దుమ్మురేపుతున్న ‘బేబీ’ ఏకంగా రూ.80 కోట్లకు పైగా గ్రాస్ వసూలు చేసి సెన్సేషనల్ రన్ను కొనసాగిస్తోంది. ఈ సినిమాకు వస్తున్న కలెక్షన్లను చూస్తుంటే రూ.100 కోట్ల క్లబ్లోకి చేరినా ఆశ్చర్యపోనవసరం లేదనిపిస్తోంది.
పవర్ స్టార్ పవన్ కల్యాణ్ నటించిన ‘బ్రో’ సినిమా విడుదల తర్వాత కూడా ‘బేబీ’ దూకుడు ఏమాత్రం తగ్గడం లేదు. మూడో వీకెండ్లోనూ ఉభయ తెలుగు రాష్ట్రాల్లోని చాలా చోట్ల ఈ చిత్రం ప్రదర్శితం అవుతున్న థియేటర్లు హౌస్ ఫుల్స్ అయ్యాయి. ‘బ్రో’ మూవీకి నాలుగో రోజు నుంచి కలెక్షన్లు దారుణంగా పడిపోవడం కూడా ‘బేబీ’కి కలిసొస్తోంది. మరో వారం వరకు పెద్ద సినిమాలు రిలీజ్ కావడం లేదు. ఈ గ్యాప్ ఆ చిత్రానికి మరింత కలసి రావొచ్చు. యూత్ ఆడియెన్స్కు ఎక్కువగా కనెక్ట్ అయిన ఈ మూవీని సాయి రాజేష్ డైరెక్ట్ చేశారు. ఇందులో ఆనంద్ దేవరకొండతో పాటు వైష్ణవి చైతన్య, విరాజ్ అశ్విన్ల నటన అందర్నీ ఆకట్టుకుంటోంది.
‘బేబీ’ చిత్రం రిలీజై 20 రోజులైనా బాక్సాఫీస్ వద్ద జోరు ఏమాత్రం తగ్గడం లేదు. దీంతో ఈ మూవీ టీమ్ ఇటీవల సక్సెస్ మీట్ నిర్వహించింది. ఈ సక్సెస్ మీట్లో మెగాస్టార్ చిరంజీవి పాల్గొన్న విషయం తెలిసిందే. సక్సెస్ మీట్ తర్వాత ప్రేక్షకుల్ని నేరుగా కలవాలని ‘బేబీ’ టీమ్ నిర్ణయించుకుంది. ఈ నేపథ్యంలో సక్సెస్ టూర్ ప్లాన్ చేసింది. ఈ క్రమంలో భీమవరంలో నిర్వహించిన సక్సెస్ టూర్లో ఓ అనూహ్య ఘటన చోటుచేసుకుంది. లోకల్ మీడియా కాంట్రిబ్యూటర్లకు, బౌన్సర్లకు మధ్య గొడవ జరిగింది. అయితే మధ్యలోకి చిత్ర నిర్మాత ఎస్కేఎన్ ఎంట్రీ ఇవ్వడంతో గొడవ సద్దుమణిగింది. దీనికి సంబంధించిన వీడియో నెట్టింట వైరల్గా మారింది.
