వానాకాలం మొదలైంది. ఇక సీజనల్‌ వ్యాధులు విజృంభిస్తాయి. కొన్ని జాగ్రత్తలు తీసుకుంటే.. ఆరోగ్యాన్ని కాపాడుకోవచ్చు. మరి ఈ కాలంలో ఎలాంటి జాగ్రత్తలు తీసుకోవాలంటే..
వానాకాలం మొదలైంది. ఇక సీజనల్‌ వ్యాధులు విజృంభిస్తాయి. కొన్ని జాగ్రత్తలు తీసుకుంటే.. ఆరోగ్యాన్ని కాపాడుకోవచ్చు. మరి ఈ కాలంలో ఎలాంటి జాగ్రత్తలు తీసుకోవాలంటే..
ఈ ఏడాది కాస్త ముందుగానే వర్షాకాలం ప్రారంభం అయ్యింది. జూన్‌ నెలారంభం నుంచే వానలు కురుస్తున్నాయి. ఇక ఈ ఏడాది జోరు వానలు ఉంటాయని వాతావరణ శాఖ అధికారులు చెబుతున్నారు. ఇప్పటికే అన్నదాతలు వ్యవసాయం పనులు ప్రారంభించారు. ఇక జోరు వానల నేపథ్యంలో నగరాలు, పట్టణాల్లో ఉండేవారు జాగ్రత్తగా ఉండాలంటూ అధికారులు సూచిస్తున్నారు. ఇక వర్షా కాలంలో సీజనల్‌ వ్యాధులతో ప్రతి ఒక్కరు ఇబ్బంది పడతారు. అప్పటి వరకు ఎండలు ఉండి.. ఒక్కసారిగా వాతావరణం చల్లగా మారడం.. పైగా వానా కాలంలో ఈగలు, దోమలు విజృంభించడం వంటి కారణాల వల్ల సీజనల్‌ వ్యాధుల బారిన పడే అవకాశాలు అధికం. కనుక కొన్ని జాగ్రత్తలు తీసుకుంటే.. వర్షాకాలంలో మీ ఆరోగ్యాన్ని భద్రంగా చూసుకోవచ్చు అని చెబుతున్నారు నిపుణులు. ఆ వివరాలు..
వానాకాలంలో దోమలు, ఈగలు ఎక్కువగా తిరుగుతుంటాయి. ఇక దోమల వల్ల ప్రాణాంతక వ్యాధులు ప్రబలే అవకాశాలు అధికంగా ఉన్నాయి. వీటిలో మరీ ముఖ్యంగా డెంగ్యూ, టైఫాయిడ్‌ వంటి వాటి బారిన పడితే ఒక్కోసారి ప్రాణాలు పోయే ప్రమాదం ఉంది.
దోమల వల్ల వచ్చే ప్రమాదకరమైన వ్యాధి డెంగ్యూ. ఇది టైగర్‌ మస్కిటో వల్ల వస్తుంది. ఓళ్లు నొప్పులు, కీళ్ల నొప్పులు, చర్మం మీద దద్దుర్లు, జ్వరం వస్తే.. వైరల్‌ ఫీవర్‌ అని లైట్‌ తీసుకోకుండా.. వెంటనే ఆస్పత్రికి వెళ్లి చెక్ చేయించుకోవాలి. ఏమాత్రం అశ్రద్ధ చేసినా.. మెదడులో రక్తస్రావం, రక్తనాళాలు దెబ్బ తినటం, కాలేయ సమస్యలు తలెత్తి.. ఆరోగ్యం విషమిస్తుంది. కనుక ఈ సీజన్‌లో వచ్చే ఎంత చిన్న జ్వరాన్ని అయినా తేలిగ్గా తీసుకోకూడదు.
ఈ సీజన్‌లో వచ్చే మరో ప్రమాదకరమైన జ్వరం టైఫాయిడ్‌. ఇది ‘సాల్మనొల్లా టైపై’ అనే బ్యాక్టీరియా వల్ల వ్యాపిస్తుంది. శుభ్రంగా లేని ఆహారం, నీళ్ల ద్వారా వస్తుంది. అందులోనూ ఈ బ్యాక్టీరియా సోకిన మూడు వారాల తర్వాతే లక్షణాలు కనిపిస్తాయి. అందుకే కొద్దిగా జ్వరం, తలనొప్పి, కడుపు నొప్పి లాంటివి గమనిస్తే.. వెంటనే బ్లడ్ టెస్ట్ చేయించుకోవాలి.
వాతావరణంలో వచ్చిన మార్పుల వల్ల శరీరంలో రోగనిరోధక శక్తి తగ్గుతుంది. దాంతో వైరస్లు, బ్యాక్టీరియాలు తేలికగా మనపై దాడి చేస్తాయి. అందుకే కాలం మారగానే చాలా మందికి జలుబు, దగ్గు వస్తుంటాయి. అలాంటి వారు ఈ సీజన్‌లో చాలా జాగ్రత్తగా ఉండాలి.
సీజన్ మారేటప్పుడు తరచుగా కళ్ల, చర్మ ఇన్ఫెక్షన్లు వస్తుంటాయి. వాతావరణంలో తేమ పెరగడం వల్ల కళ్లకలక, కళ్లు పొడిబారటం వంటి సమస్యలు వస్తాయి. అందుకే చేతులు కడుక్కోకుండా.. కళ్లను తాకకూడదు. ఒకవేళ కళ్లకలక లక్షణాలు కనిపిస్తే.. వెంటనే కళ్లను శుభ్రమైన నీళ్లతో కడిగి వేడి నీటితో కాపడంపెట్టాలి. వీలైనంత త్వరగా డాక్టర్ని కలవాలి. కళ్లు ఎర్రబడటం, దురదలు, మంట కనిపిస్తే సొంత వైద్యం మాని ఆస్పత్రికి వెళ్లాలి. అలాగే చర్మాన్ని కాపాడుకునేందుకు.. వర్షంలో తడవకుండా ఉంటే బెటర్. ఒకవేళ తడవాల్సి వస్తే.. ఇంటికి వెళ్లగానే స్నానం చేయాలి.
