ట్యూషన్ టీచర్ ఇంట్లో శవమై తేలిన బాలుడు! అసలేం జరిగిందంటే?

ఉత్తర్ ప్రదేశ్ లో దారుణం చోటు చేసుకుంది. కనిపించకుండా పోయిన బాలుడు చివరికి ట్యూషన్ టీచర్ ఇంట్లో శవమై తేలాడు. తాజాగా వెలుగు చూసిన ఈ ఘటన స్థానికంగా సంచలనంగా మారుతోంది. ఈ విషయం తెలుసుకుని ఆ బాలుడి తల్లిదండ్రులు, ఇతర కుటుంబ సభ్యులు కన్నీరు మున్నీరుగా విలపించారు. అనంతరం ఈ ఘటనపై అనుమానాస్పద మృతి కింద కేసు నమోదు చేసుకున్న పోలీసులు టీచర్ ఇంట్లో ఉన్న ఆ బాలుడిని మృతదేహాన్ని పోస్ట్ మార్టం నిమిత్తం ఆస్పత్రికి తరలించారు. ఈ ఘటనలో అసలేం జరిగిందంటే?

పోలీసుల కథనం ప్రకారం.. ఉత్తర్ ప్రదేశ్ కాన్పూర్ లో ఓ ప్రముఖ వ్యాపారవేత్త మనీష్ కనోడియా కుమారుడు కుశాగ్రా (16) స్థానికంగా ఉండే రచిత అనే యువతి వద్ద రోజూ ట్యూషన్ కు వెళ్లేవాడు. అయితే ఉన్నట్టుండి కుశాగ్రా కనిపించ కుండపోయాడు. వెంటనే అప్రమత్తమైన ఆ బాలుడి తల్లిదండ్రులు పోలీసులకు ఫిర్యాదు చేశారు. అయితే ఈ క్రమంలోనే కుశాగ్రా కిడ్నాప్ కు గురయ్యాడని తెలిసింది. ఇందులో భాగంగానే పోలీసులు ఆ ట్యూషన్ టీచర్ రచిత ఇంట్లో వెతకగా అతడు శవమై కనిపించాడు. ఆ తర్వాత పోలీసులు ఆ బాలుడి మృతదేహాన్ని స్వాధీనం చేసుకుని పోస్ట్ మార్టం నిమిత్తం ఆస్పత్రికి తరలించారు.

అనంతరం ఈ ఘటనపై కేసు నమోదు చేసుకుని దర్యాప్తు చేశారు. అయితే ఈ పోలీసులు ట్యూషన్ టీచర్ ఇంటి సమీపంలో ఉన్న సీసీ కెమెరాలను పరిశీలించగా.. అందులో ట్యూషన్ టీచర్ రచిత, ఆమె ప్రియుడితో పాటు ఆ బాలుడు ఇంట్లోకి వెళ్తున్న దృశ్యాలు రికార్డ్ అయ్యాయి. దీంతో పోలీసులు వారిద్దరిని అరెస్ట్ చేశారు. అయితే కుశాగ్రాని ట్యూషన్ టీచర్ రచిత, ఆమె ప్రియుడు ఇద్దరు కలిసి కిడ్నాప్ చేసి ఆ తర్వాత హత్య చేసి ఉంటారని పోలీసులు అనుమానిస్తున్నారు. కుమారుడుమృతితో అతడి తల్లిదండ్రులు, ఇతర కుటుంబ సభ్యులు కన్నీరు మున్నీరుగా విలపించారు. ఇదే ఘటన స్థానికంగా తీవ్ర కలకలంగా మారుతోంది.