India vs Sri Lanka: శ్రీలంక జట్టు ఇప్పుడు సెలబ్రేషన్స్లో బిజీగా ఉంది. భారత్ లాంటి టాప్ టీమ్పై సిరీస్ నెగ్గడంతో సంబురాల్లో మునిగిపోయారు సింహళ ఆటగాళ్లు.
India vs Sri Lanka: శ్రీలంక జట్టు ఇప్పుడు సెలబ్రేషన్స్లో బిజీగా ఉంది. భారత్ లాంటి టాప్ టీమ్పై సిరీస్ నెగ్గడంతో సంబురాల్లో మునిగిపోయారు సింహళ ఆటగాళ్లు.
శ్రీలంక జట్టు ఇప్పుడు సెలబ్రేషన్స్లో బిజీగా ఉంది. భారత్ లాంటి టాప్ టీమ్పై సిరీస్ నెగ్గడంతో సంబురాల్లో మునిగిపోయారు సింహళ ఆటగాళ్లు. టీ20 సిరీస్లో వైట్వాష్ అయినా వెంటనే తేరుకొని వన్డే సిరీస్లో టీమిండియాకు షాక్ ఇచ్చింది శ్రీలంక. ఆ సిరీస్ను 2-0 తేడాతో గెలుచుకుంది. రోహిత్ శర్మ, విరాట్ కోహ్లీ, కేఎల్ రాహుల్, శ్రేయస్ అయ్యర్ లాంటి స్పెషలిస్ట్ ప్లేయర్లు ఉన్న టాప్ టీమ్ను ఓడించడంతో వాళ్ల ఆనందానికి హద్దుల్లేకుండా పోయింది. సిరీస్ స్టార్ట్ అవడానికి ముందు ఎవరూ దీన్ని ఊహించలేదు. లంక పోటీ ఇస్తే అదే గొప్ప అనుకున్నారు. కానీ వరుస మ్యాచుల్లో రోహిత్ సేనను ఓడించి సిరీస్ను సొంతం చేసుకుంటుందని అనుకోలేదు.
భారత్పై వన్డే సిరీస్లో నెగ్గడం లంకకు 27 ఏళ్ల తర్వాత ఇదే తొలిసారి కావడం గమనార్హం. అప్పుడు జట్టులో సభ్యుడిగా ఉన్న సనత్ జయసూర్య ఇప్పుడు కూడా ఆ టీమ్తో ట్రావెల్ అవుతున్నాడు. ఆ జట్టుకు తాత్కాలిక హెడ్ కోచ్గా బాధ్యతలు చేపట్టిన ఈ దిగ్గజం.. వన్డే సిరీస్లో టీమ్ గెలుపు కోసం చాలా కృషి చేశాడు. ఈ టూర్ మొదలవక ముందు రాజస్థాన్ రాయల్స్ టీమ్ హైపెర్ఫార్మెన్స్ డైరెక్టర్గా ఉన్న జుబిన్ భరూచాను పిలిపించి ఆటగాళ్లకు స్పెషల్ కోచింగ్ ఇప్పించాడు. క్రీజులో నిలదొక్కుకోవడం, భారీ ఇన్నింగ్స్లు ఆడటం ఎలాగో నేర్పించాడు. అలాగే లంక స్పిన్నర్లలో ధైర్యం నూరిపోశాడు. భారత్పై గెలవగలమనే భరోసాను ఇచ్చి ఆడించాడు. ఇది వర్కౌట్ అయింది. అయితే ఆ జట్టు విజయం కోసం ఇంతగా ప్రయత్నించిన జయసూర్య టీమ్ను వీడేందుకు సిద్ధమయ్యాడు.
లంక తాత్కాలిక కోచ్గా ఉన్న జయసూర్య త్వరలో తన బాధ్యతల నుంచి తప్పుకోనున్నాడు. నెక్స్ట్ ఇంగ్లండ్తో జరిగే సిరీస్ తర్వాత అతడు కోచింగ్ నుంచి తప్పుకొని లంక క్రికెట్ బోర్డు వ్యవహారాల్లో బిజీ అవనున్నాడు. రెగ్యులర్ కోచ్ లేకపోవడంతో రెండు సిరీస్ల కోసం ఆ రోల్లోకి వచ్చిన జయసూర్య.. ఇంకొన్ని రోజుల్లో దిగిపోనున్నాడు. ఈ విషయాన్ని స్వయంగా జయసూర్యే తెలిపాడు. తమ టీమ్కు ఓ మంచి పర్మినెంట్ కోచ్ రావాలని, జట్టును విజయాలబాటలో నడిపే వ్యక్తి రాక కోసం ఎదురు చూస్తున్నామని తెలిపాడు. భారత్ లాంటి టాప్ టీమ్పై సిరీస్ నెగ్గడం ఎంతో సంతోషాన్ని ఇచ్చిందని.. తమ జట్టు ఎంతో బాగా ఆడిందని మెచ్చుకున్నాడు. లంక టీమ్లో మంచి టాలెంటెడ్ ప్లేయర్లు ఉన్నారని.. వాళ్లను సానబెడితే తిరుగుండదన్నాడు. అయితే జయసూర్య కోచింగ్ బాగుందని, సక్సెస్ అందించిన అతడు ఇంకొన్నాళ్లు ఆ రోల్లో కొనసాగాలని లంక ఫ్యాన్స్ కోరుకుంటున్నారు.
