కర్ణాటక జట్టులోకి ద్రవిడ్ తనయుడు.. ఏ టోర్నీలో ఆడనున్నాడంటే..?

రాహుల్ ద్రవిడ్.. క్రికెట్ లవర్స్​కు పరిచయం అక్కర్లేని పేరు. జెంటిల్మన్ గేమ్​కు భారత్ అందించిన అతి గొప్ప ప్లేయర్లలో ఒకడు ద్రవిడ్. బ్యాట్స్​మన్​గా, కీపర్​గా, కెప్టెన్​గా టీమిండియా సాధించిన ఎన్నో విజయాల్లో కీలకపాత్ర పోషించాడు ద్రవిడ్. ముఖ్యంగా టెస్టుల్లో మంచి పేరు తెచ్చుకున్నాడు. అతడు క్రీజులో నిలదొక్కుకున్నాడంటే ఔట్ చేయడం ఎవరి వల్లా అయ్యేది కాదు. లెజెండరీ బౌలర్లు కూడా ద్రవిడ్​ను ఔట్ చేయడానికి అష్టకష్టాలు పడేవారు. ఓపిక, సహనంతో క్రీజులో నిలబడి గంటల తరబడి బ్యాటింగ్ చేయడం అతడికి వెన్నతో పెట్టిన విద్య. ఈ టాలెంట్​తో ఎన్నో సందర్భాల్లో భారత్​ను ఓటమి నుంచి గట్టెక్కించాడు ద్రవిడ్.

టీమిండియాకు కెప్టెన్​గానూ బాధ్యతలు నిర్వర్తించిన ద్రవిడ్.. యంగ్ క్రికెటర్లకు అవకాశాలు ఇచ్చి ప్రోత్సహించాడు. రిటైర్మెంట్ అనంతరం నేషనల్ క్రికెట్ అకాడమీ (ఎన్​సీఏ) హెడ్​గా బాధ్యతలు చేపట్టాడు. భారత జట్టుకు పలువురు యువ క్రికెటర్లను తయారు చేసి ఇచ్చాడు. ప్రస్తుతం టీమిండియా హెడ్​ కోచ్​గా ఉన్నాడు ద్రవిడ్. అలాంటి ది వాల్, మిస్టర్ డిపెండబుల్ ద్రవిడ్​ అడుగుజాడల్లోనే అతడి కుమారులు నడుస్తున్నారు. ద్రవిడ్ చిన్న కొడుకు అన్వయ్ ద్రవిడ్ అండర్-14 కర్ణాటక క్రికెట్ టీమ్​కు కెప్టెన్​గా రాణిస్తుండగా.. పెద్ద కొడుకు సమిత్ ద్రవిడ్ ఆ రాష్ట్ర అండర్-19 జట్టులో ప్లేస్ దక్కించుకున్నాడు.

కర్ణాటక క్రికెట్ అసోసియేషన్ తాజాగా వినూ మన్కడ్ దేశవాళీ టోర్నీ కోసం 15 మంది సభ్యులతో కూడిన టీమ్​ను సెలెక్ట్ చేసింది. ఈ జట్టులో ద్రవిడ్ తనయుడు సమిత్​కు చోటు దక్కింది. ఈ టీమ్​కు ధీరజ్ జె.గౌడ కెప్టెన్​గా వ్యవహరిస్తుండగా.. ధృవ్ ప్రభాకర్​ను వైస్ కెప్టెన్​గా నియమించారు. హైదరాబాద్​ ఆతిథ్యం ఇస్తున్న ఈ టోర్నీ అక్టోబర్ 12వ తేదీ నుంచి 20వ తేదీ వరకు జరగనుంది. కాగా, ద్రవిడ్ రెండో కొడుకు అన్వయ్ కూడా క్రికెట్​నే కెరీర్​గా ఎంచుకున్నాడు. రెండేళ్ల కింద అండర్-14 ఇంటర్​ జోనల్ టోర్నమెంట్​లో కర్ణాటక టీమ్​కు కెప్టెన్​గా సెలెక్టయిన అన్వయ్.. అన్న సమిత్​తో కలసి మెరుపు ఇన్నింగ్స్ ఆడి అందరి ప్రశంసలు పొందాడు.

ఇది కూడా చదవండి: రోహిత్ అంటే భయం.. కోహ్లీ మాటలు లీక్ చేసిన అశ్విన్!