పాకిస్థాన్​ను చిత్తు చేసిన ఆఫ్ఘానిస్థాన్.. ఉన్న కాస్త పరువూ పోయింది!

వన్డే వరల్డ్ కప్-2023లో పాకిస్థాన్​కు భారీ షాక్ తగిలింది. ఆ టీమ్​కు వరుసగా మూడో ఓటమి ఎదురైంది. భారత్​పై మ్యాచ్​లో ఓటమితో డీలాపడ్డ దాయాది జట్టును నెక్స్ట్ మ్యాచ్​లో ఆస్ట్రేలియా చావు దెబ్బ తీసింది. దీంతో తప్పక గెలవాల్సిన మ్యాచ్​లో పసికూన ఆఫ్ఘానిస్థాన్​ చేతిలో ఓడిపోయింది బాబర్ సేన. వన్డే క్రికెట్ హిస్టరీలో ఇప్పటిదాకా పాకిస్థాన్​ను ఆఫ్ఘాన్ ఓడించలేదు. కానీ ఇవాళ హిస్టరీని క్రియేట్ చేసింది. 283 రన్స్ టార్గెట్​ను 49 ఓవర్లలో ఛేజ్ చేసి తొలిసారి పాక్​ను ఓడించింది. ఈ మ్యాచ్​లో ముందుగా బ్యాటింగ్​కు దిగిన పాకిస్థాన్​కు మంచి స్టార్ట్ దొరికింది. ఓపెనర్లు అబ్దుల్లా షఫీక్ (58), ఇమాముల్ హక్ (17) బాగా ఆడారు.

ఇమాముల్ ఔటైనా బాబర్ ఆజం (74), షఫీక్​కు మధ్య మరో పార్ట్​నర్​షిప్ నెలకొంది. అయితే బాబర్ తర్వాత రిజ్వాన్ (8), సౌద్ షకీల్ (25) తక్కువ స్కోర్లకే వెనుదిరిగారు. ఆఖర్లో షాదాబ్ ఖాన్ (40), ఇఫ్తికార్ అహ్మద్ (40) మంచి ఇన్నింగ్స్​లు ఆడారు. ముఖ్యంగా ఇఫ్తికార్ బౌండరీలు, సిక్సులతో ఆఫ్ఘాన్ బౌలర్లపై విరుచుకుపడ్డాడు. దీంతో ప్రత్యర్థి ముందు ఫైటింగ్ టార్గెట్​ను ఉంచింది పాకిస్థాన్. అనంతరం ఛేజింగ్​కు దిగిన ఆఫ్ఘానిస్థాన్​కు సూపర్బ్ స్టార్ట్ లభించింది. రెహ్మనుల్లా గుర్బాజ్ (65), ఇబ్రహీం జాద్రాన్ (87)లు పాక్ బౌలర్లపై అటాకింగ్​కు దిగారు. షాహిన్ అఫ్రిదీ, హ్యారిస్ రౌఫ్​ బౌలింగ్​లో బౌండరీల మీద బౌండరీలు కొట్టారు.

ఆఫ్ఘానిస్థాన్ విజయం దిశగా దూసుకెళ్తున్న టైమ్​లో గుర్బాజ్​ను షాహిన్ ఔట్ చేశాడు. అయితే ఇబ్రహీం జాద్రాన్ మాత్రం వెనక్కి తగ్గలేదు. వన్​డౌన్​లో వచ్చిన రెహ్మత్ షాతో కలసి రెండో వికెట్​కు 60 పరుగుల భాగస్వామ్యాన్ని నెలకొల్పాడు. ఆ తర్వాత జాద్రాన్​ను హసన్ అలీ ఔట్ చేశాడు. దీంతో మ్యాచ్​లో పాకిస్థాన్ పట్టు బిగిస్తుందేమోనని అనిపించింది. కానీ రెహ్మత్ షా (77 నాటౌట్), హష్మతుల్లా షాహిదీ (44 నాటౌట్) పాక్​కు ఆ ఛాన్స్ ఇవ్వలేదు. హష్మతుల్లా కెప్టెన్సీ నాక్ ఆడి టీమ్​ను విజయతీరాలకు చేర్చాడు. ఇప్పటికే ఈ వరల్డ్ కప్​లో ఇంగ్లండ్​కు షాకిచ్చిన ఆఫ్ఘానిస్థాన్.. తాజాగా పాక్​ను కూడా చిత్తు చేసింది. ఈ ఓటమితో పాక్​కు ఉన్న కాస్త పరువు కూడా పోయిందని సోషల్ మీడియాలో నెటిజన్స్ కామెంట్స్ చేస్తున్నారు. మరి.. ఆఫ్ఘాన్ చేతిలో పాక్ ఓటమిపై మీరేం అనుకుంటున్నారో కామెంట్ల రూపంలో తెలియజేయండి.

ఇదీ చదవండి: స్టార్ క్రికెటర్ దసరా సెలబ్రేషన్స్.. ఆయుధ పూజ అదిరింది!