ఇంగ్లండ్‌ వన్డే టీమ్‌లోకి అరివీర భయంకరులు! ఇక ఛాంపియన్స్‌ ట్రోఫీ వాళ్లదే?

ప్రస్తుత క్రికెట్​లో టాప్ టీమ్స్​లో ఒకటి ఇంగ్లండ్. ముఖ్యంగా లిమిటెడ్ ఓవర్స్​ క్రికెట్​లో ఆ జట్టు చాలా డేంజరస్. వన్డే ప్రపంచ కప్-2023లో డిఫెండింగ్ ఛాంపియన్​గా బరిలోకి దిగిన ఇంగ్లీష్ టీమ్.. వరుస ఓటములతో గ్రూప్ దశ నుంచే అవమానకర రీతిలో ఇంటిదారి పట్టింది. రీసెంట్​గా జరిగిన టీ20 వరల్డ్ కప్-2024లో సెమీస్​ వరకు వచ్చినా భారత్ దెబ్బకు బయటకు వచ్చేసింది. ఈ రెండు టోర్నీల్లో ఆశించిన మేర రాణించకపోయినా ఆ జట్టును తక్కువ అంచనా వేయడానికి లేదు. టీమ్ నిండా భారీ హిట్టర్లు, ఆల్​రౌండర్లతో కూడిన ఇంగ్లండ్.. వచ్చే ఏడాది ఆరంభంలో జరిగే ఛాంపియన్స్ ట్రోఫీ మీద కన్నేసింది. ఆ టోర్నీతో తిరిగి క్రికెట్​ను శాసించాలని చూస్తోంది. ఈ తరుణంలో ఆ జట్టులోకి ఇద్దరు అరివీర భయంకరులు వచ్చేస్తున్నారు. దీంతో ఛాంపియన్స్ ట్రోఫీ ఇంగ్లండ్​దేనని అంతా అంటున్నారు.

ఇంగ్లండ్ వన్డే జట్టులోకి జో రూట్, బెన్ స్టోక్స్ రావడం దాదాపుగా ఖాయమైంది. ప్రస్తుతం ఈ ఫార్మాట్​కు దూరంగా ఉంటున్న ఈ ఇద్దరు స్టార్లు ఛాంపియన్స్ ట్రోఫీలో ఆడే అవకాశాలు బలంగా కనిపిస్తున్నాయి. వన్డే వరల్డ్ కప్ పరాభవం తర్వాత 50 ఓవర్ల ఫార్మాట్​కు దూరంగా ఉంటున్న స్టోక్స్-రూట్ తిరిగి ఆ ఫార్మాట్​లో అడుగు పెట్టకపోవచ్చని అంతా అనుకున్నారు. అయితే ఇంగ్లండ్ సెలెక్టర్ ల్యూక్ రైట్ మాటలతో వీళ్లిద్దరూ వన్డేల్లో ఎంట్రీ ఇవ్వడం పక్కా అని తెలుస్తోంది. త్వరలో జరిగే వెస్టిండీస్, ఆస్ట్రేలియా సిరీస్​ల్లో సాధ్యమైనంతగా యంగ్ ప్లేయర్లకు అవకాశం కల్పిస్తామని చెప్పిన రైట్.. ఛాంపియన్స్ ట్రోఫీకి మాత్రం బలమైన టీమ్​తో వెళ్తామని తెలిపాడు. స్టోక్స్-రూట్ ఐసీసీ టోర్నీల కోసం తప్పక తిరిగొస్తారని, తమ టీమ్​కు వాళ్లిద్దరూ మూలస్తంభాలు లాంటి వాళ్లన్నాడు.

‘ఇంగ్లండ్ క్రికెట్​కు రూట్ చేసిన సేవలు అంతా ఇంతా కాదు. అతడు తన బెస్ట్ ఇస్తూనే వస్తున్నాడు. మెగా టోర్నమెంట్స్​లో అతడు తప్పక ఆడతాడు. ఇంగ్లీష్ టీమ్​కు రూట్ ఎంత కీలకమో మాకు తెలుసు. అతడు క్వాలిటీ స్పిన్ బౌలింగ్ కూడా వేయగలడు. బ్యాట్​తో పరుగుల వరద పారిస్తూ బాల్​తో రాణించే వాళ్లు చాలా అరుదు. అందులో రూట్ ఒకడు. అలాంటోడ్ని ఎందుకు వదులుకుంటాం. స్టోక్స్​ సేవల్ని అవసరమైనప్పుడు వాడుకుంటాం. అతడు మాకు చాలా ఇంపార్టెంట్ ప్లేయర్. బలమైన ఆటగాళ్లతో కూడిన టీమ్​ను ఛాంపియన్స్ ట్రోఫీకి పంపిస్తాం’ అని ల్యూక్ రైట్ చెప్పుకొచ్చాడు.

ఒకవైపు యంగ్ ప్లేయర్లను పరీక్షిస్తూనే రూట్, స్టోక్స్ లాంటి సీనియర్లను కూడా ఫిట్​గా ఉండేలా చూసుకుంటోది ఇంగ్లీష్​ బోర్డు. ఫామ్, ఫిట్​నెస్​ను బట్టి స్ట్రాంగ్​ టీమ్​ను సిద్ధం చేసుకోవాలనేది వాళ్ల ప్లాన్​లా కనిపిస్తోంది. రూట్, స్టోక్స్ వన్డేల్లోకి తిరిగొస్తున్నారనేది కన్ఫర్మ్ అవ్వడంతో ఇంక ఛాంపియన్స్ ట్రోఫీ ఇంగ్లండ్​దేనని క్రికెట్ ఫ్యాన్స్ అంటున్నారు. వాళ్లిద్దరూ ఫామ్​లో ఉంటే ఇంగ్లీష్ టీమ్​ను ఆపడం ఎవరి వల్లా కాదని.. ఆ ఫార్మాట్​లో వాళ్లు తోపులని అంటున్నారు. కాగా, వన్డే ప్రపంచ కప్-2019లో రూట్ 11 మ్యాచుల్లో కలిపి 556 పరుగులు చేశాడు. ఆ టోర్నీలో స్టోక్స్ 5 హాఫ్ సెంచరీలు బాదడమే గాక 5 వికెట్లు తీశాడు. అందుకే ఈ అరివీర భయంకరులు వస్తున్నారంటే అంతా భయపడుతున్నారు. ఒంటిచేత్తో మ్యాచ్ స్వరూపాన్ని మార్చేసే వీళ్లు ఫామ్​లో ఉంటే కప్పు వాళ్లదేనని అంటున్నారు. మరి.. రూట్-స్టోక్స్ కలసి ఇంగ్లండ్​కు ఇంకో ఐసీసీ ట్రోఫీని అందిస్తారా? మీ ఒపీనియన్​ను కామెంట్ చేయండి.

• ఇదీ చదవండి: సౌతాఫ్రికాకు ఘోర అవమానం! కరేబియన్ల చేతిలో క్లీన్‌స్వీప్‌

Joe Root and Ben Stokes will be considered by England for the 2025 Champions Trophy. (Espncricinfo). pic.twitter.com/r5bybpbZN5

— Mufaddal Vohra (@mufaddal_vohra) August 28, 2024