Ravi Bishnoi: లెజెండ్ కుంబ్లేను గుర్తుచేసిన రవి బిష్ణోయ్.. అతడి డెడికేషన్​కు హ్యాట్సాఫ్!

శ్రీలంక టూర్​ను టీమిండియా సక్సెస్​తో స్టార్ట్ చేసింది. శనివారం జరిగిన తొలి టీ20లో భారత్ 43 పరుగుల తేడాతో ఘనవిజయం సాధించింది. ఈ మ్యాచ్​లో తొలుత బ్యాటింగ్​కు దిగిన మెన్ ఇన్ బ్లూ 20 ఓవర్లలో 7 వికెట్ల నష్టానికి 213 పరుగుల భారీ స్కోరు చేసింది. ఓపెనర్లు యశస్వి జైస్వాల్ (21 బంతుల్లో 40), శుబ్​మన్ గిల్ (16 బంతుల్లో 34) మెరుపు ఇన్నింగ్స్​లతో అదరగొట్టారు. ఆ తర్వాత సూర్యకుమార్ యాదవ్ (26 బంతుల్లో 58) కెప్టెన్సీ ఇన్నింగ్స్​తో చెలరేగిపోయాడు. ఆఖర్లో రిషబ్ పంత్ (33 బంతుల్లో 49) కూడా ధనాధన్ ఇన్నింగ్స్ ఆడటంతో భారత్ భారీ స్కోరు చేసింది. ఆ తర్వాత బ్యాటింగ్​కు దిగిన ఆతిథ్య జట్టు 19.2 ఓవర్లలో 170 పరుగులకు పరిమితమైంది.

టీమిండియా బౌలర్లలో అర్ష్​దీప్ సింగ్, అక్షర్ పటేల్ చెరో రెండు వికెట్లు తీయగా.. రియాన్ పరాగ్ మూడు వికెట్లతో లంక నడ్డి విరిచాడు. కెప్టెన్సీ నాక్​తో మ్యాచ్ స్వరూపాన్ని మార్చేసిన సూర్యకుమార్​కు ప్లేయర్ ఆఫ్ ది మ్యాచ్ అవార్డు లభించింది. అయితే లంక ఇన్నింగ్స్​లో జరిగిన ఓ ఘటన మ్యాచ్​కే హైలైట్​గా మారింది. భారత లెగ్ స్పిన్నర్ రవి బిష్ణోయ్ బౌలింగ్ వేస్తూ గాయాలపాలయ్యాడు. 16వ ఓవర్ వేసిన బిష్ణోయ్​కు ఇంజ్యురీ అయింది. ప్రత్యర్థి ఆటగాడు కమిందు మెండిస్ ఇచ్చిన క్యాచ్​ను అందుకునే ప్రయత్నంలో జంప్ చేశాడు బిష్ణోయ్. కానీ బాల్ చేతికి చిక్కలేదు. బంతిని అందుకునే ప్రయత్నంలో మిస్సవడంతో అతడు కిందపడ్డాడు. దీంతో అతడి​ కుడి చేతి మణికట్టుతో పాటు ముఖానికి గాయమైంది. అతడి చెంప మీద గీసుకుపోవడంతో ఆ భాగంలో రక్తస్రావం అయింది.

బిష్ణోయ్​ గాయాన్ని చూసి వెంటనే ఫిజియో గ్రౌండ్​లోకి పరిగెత్తుకుంటూ వచ్చాడు. వైద్యం అందిన తర్వాత బిష్ణోయ్ డ్రెస్సింగ్ రూమ్​కు వెళ్లి రెస్ట్ తీసుకుంటాడని అంతా అనుకున్నారు. కానీ అతడు మాత్రం బౌలింగ్ కంటిన్యూ చేశాడు. అంతేగాక అదే ఓవర్​లో చరిత అసలంకను ఔట్ చేశాడు. మొత్తంగా 4 ఓవర్లలో 37 పరుగులు ఇచ్చి 1 వికెట్ తీశాడు. దీంతో అందరూ అతడి డెడికేషన్​కు ఫిదా అయిపోయారు. గాయమైనా భయపడకుండా టీమ్​కు ఆడటం గ్రేట్ అని మెచ్చుకుంటున్నారు. ఈ క్రమంలో లెజెండ్ అనిల్ కుంబ్లే వెస్టిండీస్​తో టెస్ట్​లో తలకు గాయమైనా బౌలింగ్ చేసి వికెట్లు తీసిన ఘటనను అందరూ గుర్తుచేసుకుంటున్నారు. 2002లో జరిగిన ఆ టెస్ట్​లో బ్యాటింగ్​ టైమ్​లో హెల్మెట్​కు బాల్ తగలడంతో గాయపడిన కుంబ్లే.. ట్రీట్​మెంట్ చేయించుకొని తలకు పట్టీతోనే బౌలింగ్ చేశాడు. దీన్ని గుర్తుచేస్తూ.. ఇదే పట్టుదలతో ఆడితే కుంబ్లే స్థాయికి చేరుకుంటావని బిష్ణోయ్​ను ప్రశంసల్లో ముంచెత్తుతున్నారు ఫ్యాన్స్.

• ఇదీ చదవండి: కోచ్​గా ఫస్ట్ మ్యాచ్​లో సూపర్ సక్సెస్.. అయినా గంభీర్​పై తప్పని ట్రోల్స్!

 

View this post on Instagram

 

A post shared by RVCJ Media (@rvcjinsta)