పసికూన ఐర్లాండ్తో టీ20 సిరీస్ ఇవాళే మొదలుకానుంది. ఈ టీమ్తో ఇప్పటిదాకా ఆడిన ఐదు టీ20ల్లోనూ టీమిండియాదే విజయం. ఈసారి కూడా సిరీస్ను క్లీన్స్వీప్ చేయాలనే ఉద్దేశంతోనే భారత్ బరిలోకి దిగుతోంది. ఈ సిరీస్ చాలా మంది యువ ఆటగాళ్లకు మంచి అవకాశమనే చెప్పాలి. ఇటీవల వెస్టిండీస్తో సిరీస్లో సత్తా చాటలేకపోయిన సంజూ శాంసన్కు ఇది గోల్డెన్ ఛాన్స్. నెక్స్ట్ ఆడబోయేవి అన్నీ ప్రధాన టోర్నీలే కాబట్టి చివరి అవకాశాన్ని అతడు ఎలా వినియోగించుకుంటాడో చూడాలి. ఈ సిరీస్తో ఐపీఎల్ హీరో రింకూ సింగ్ అరంగేట్రం చేసే ఛాన్స్ ఉంది.
విండీస్తో సిరీస్లో అదరగొట్టిన హైదరాబాదీ తిలక్ వర్మ.. ఇప్పుడు ఐర్లాండ్తో సిరీస్లోనూ రాణిస్తే, వరల్డ్ కప్ సెలెక్షన్ పోటీలోకి వచ్చే ఛాన్స్ ఉంది. పునరాగమనం చేస్తున్న ప్రసిద్ధ్ కృష్ణ, శివమ్ దూబేతో పాటు స్పిన్నర్ వాషింగ్టన్ సుందర్కూ ఈ సిరీస్ కీలకం కానుంది. అయితే అందరి కళ్లూ ఒక్క ప్లేయర్ మీదే ఉన్నాయి. ఆ ఆటగాడే పేసు గుర్రం జస్ప్రీత్ బుమ్రా. వెన్నెముక గాయం, సర్జరీ కారణంగా దాదాపు 11 నెలలు బుమ్రా క్రికెట్కు దూరంగా ఉన్నాడు. ఆ ప్రభావం జట్టు ప్రదర్శన మీద కూడా పడింది. ఈ సంవత్సరం స్వదేశంలో వరల్డ్ కప్ జరగనున్న నేపథ్యంలో బుమ్రా రీఎంట్రీ ఆసక్తికరంగా మారింది.
ఐర్లాండ్తో సిరీస్లో బుమ్రా ఎలా బౌలింగ్ చేస్తాడనేది కీలకమనే చెప్పాలి. అతడి ఫిట్నెస్, బౌలింగ్ లయ ఎలా ఉందనే దానిపై సెలెక్టర్లు ఓ అంచనాకు వచ్చే అవకాశం ఉంది. అతడు మునుపటిలా రాణిస్తే ఆసియా కప్ జట్టులో చోటు దక్కించుకోవచ్చు. ఈ ఛాలెంజ్ను బుమ్రా ఎలా ఎదుర్కొంటాడో చూడాలి. బుమ్రా వ్యాఖ్యలు చూస్తే మాత్రం అతడి టార్గెట్ వన్డే వరల్డ్ కప్ అని స్పష్టంగా అర్థమైపోతుంది. తాను టీ20ల కోసం కాదు.. ప్రపంచ కప్ కోసమే సన్నద్ధమయ్యానని బుమ్రా అన్నాడు. ఎన్సీఏలో 10 నుంచి 15 ఓవర్ల పాటు బౌలింగ్ ప్రాక్టీస్ చేశానని చెప్పాడు. తాను పాత బుమ్రానేనని.. ఎప్పుడూ నమ్మకం కోల్పోలేదని తెలిపాడు.
