మొదటి టెస్ట్​లోనే ఇంగ్లాండ్​ను వణికించాడు.. ఎవరీ ఆకాశ్ దీప్?

కెరీర్​లో ఫస్ట్ మ్యాచ్ అంటే ఏ ఆటగాడైనా కాస్త టెన్షన్​ పడతాడు. వచ్చిన ఛాన్స్​ను సద్వినియోగం చేసుకొని టీమ్​లో తన ప్లేస్​ను పక్కా ఫిక్స్ చేసుకోవాలని అనుకుంటాడు. తీవ్ర ఒత్తిడి, అంచనాల మధ్య ఇంటర్నేషనల్ లెవల్లో రాణించడం అంత ఈజీ కాదు. కానీ భారత యంగ్ పేసర్ ఆకాశ్​ దీప్ మాత్రం కాన్ఫిడెన్స్ ఉంటే ఇవన్నీ పెద్ద విషయం కాదని ప్రూవ్ చేశాడు. భారత్-ఇంగ్లాండ్ మధ్య రాంచీ వేదికగా జరుగుతున్న నాలుగో టెస్టులో ఆడుతున్నాడతను. రెస్ట్ వల్ల టీమ్​కు దూరమైన జస్​ప్రీత్ బుమ్రా ప్లేసులో టీమ్​లోకి వచ్చిన ఆకాశ్.. మొదటి టెస్టులో ఇంగ్లాండ్​ను వణికిస్తున్నాడు. బుల్లెట్ స్పీడ్​తో అతడు వేసే బంతులు స్వింగ్ కూడా అవుతుండటంతో ఇంగ్లీష్​ బ్యాటర్లు గజగజలాడుతున్నారు. అలాంటి ఆకాశ్ దీప్ ఎవరు? అతడి నేపథ్యం ఏంటనేది ఇప్పుడు తెలుసుకుందాం..

డెబ్యూ మ్యాచ్ ఆడుతున్న ఆకాశ్ దీప్ తక్కువ వ్యవధిలో 3 కీలక వికెట్లు తీశాడు. ఇంగ్లీష్ ఓపెనర్లు జాక్ క్రాలే (42), బెన్ డకెట్ (11) సహా మరో స్టార్ బ్యాటర్ ఓలీ పోప్ (0)ను కూడా వెనక్కి పంపాడతను. ఇంగ్లాండ్​​కు పట్టపగలే చుక్కలు చూపిస్తున్న ఆకాశ్.. ఈ స్థాయికి చేరుకునేందుకు ఎంతో శ్రమించాడు. బిహార్​లోని ససారం అనే గ్రామంలో జన్మించాడీ పేసర్. మిడిల్​క్లాస్ ఫ్యామిలీలో పుట్టిన ఆకాశ్​ చిన్నతనం నుంచే క్రికెట్​ను విపరీతంగా ఇష్టపడేవాడు. అయితే క్రికెట్​ వైపు అడుగులు పడుతున్న టైమ్​లో అతడి లైఫ్​లో ఊహించని విషాదం చోటుచేసుకుంది. ఆ సమయంలో అతడి తండ్రి మరణించాడు. అది జరిగిన కొన్నాళ్ల తర్వాత ఆకాశ్ సోదరుడు కూడా కన్నుమూశాడు. ఇన్ని కష్టాలు ఎదురైనా అతడు మాత్రం మొక్కవోని సంకల్పంతో, పట్టుదలతో తన కెరీర్​ను మలచుకున్నాడు. సొంత రాష్ట్రం బిహార్​లో ఛాన్సులు తక్కువగా ఉండటంతో వెస్ట్ బెంగాల్​కు తన మకాం మార్చాడు.

బెంగాల్​కు వెళ్లాక ఒక క్రికెట్ అకాడమీలో చేరాడు ఆకాశ్ దీప్. అనంతరం అసన్సోల్​లోని ఖేప్ క్రికెట్ టెన్నిస్ బాల్ టోర్నమెంట్​లో సూపర్బ్​గా పెర్ఫార్మ్ చేశాడు. దీంతో అతడికి దుబాయ్​కు వెళ్లే అవకాశం దక్కింది. అక్కడ కూడా దుమ్మురేపడంతో బెంగాల్ క్రికెట్ అసోసియేషన్ డివిజన్ మ్యాచుల్లో ఆడే ఛాన్స్ దక్కించుకున్నాడు. ఈ క్రమంలో బెంగాల్ సీనియర్ టీమ్ డైరెక్టర్ జోయ్​దీప్ ముఖర్జీ దృష్టిలో పడ్డాడు. అతడు బౌలింగ్ చేస్తుంటే కీపర్ వెనుక 10 గజాల దూరంలో నిల్చోవడం చూసి జోయ్​దీప్ షాకయ్యాడు. వెంటనే అండర్-23 కోచ్ సౌరాశిష్​ను పిలిచి ఆకాశ్​ గురించి తెలుసుకున్నాడు. ఆ టైమ్​లో బెంగాల్ క్రికెట్ ప్రెసిడెంట్​గా ఉన్న సౌరవ్ గంగూలీ ప్రవేశపెట్టిన విజన్-2020 ప్రోగ్రామ్​కు ఆకాశ్ దీప్​ను రిఫర్ చేశాడు. ఇదే అతడి కెరీర్​లో టర్నింగ్ పాయింట్​గా నిలిచింది.

గంగూలీ విజన్-2020 ప్రోగ్రామ్​కు షార్ట్ లిస్ట్ చేసిన జాబితాలో ఆకాశ్ దీప్​కు చోటు దక్కింది. అలా బెంగాల్ స్టేట్ టీమ్​కు ప్రాతినిధ్యం వహించేందుకు నిర్వహించిన ట్రయల్స్​లో అతడు పాల్గొన్నాడు. అనంతరం 2019లో బెంగాల్ తరఫున ఆకాశ్ ఫస్ట్ క్లాస్ క్రికెట్​లో అడుగుపెట్టాడు. అదే సంవత్సరం డొమెస్టిక్ క్రికెట్​లో టీ20ల్లోనూ అరంగేట్రం చేశాడు. ఓవరాల్​గా 30 ఫస్ట్ క్లాస్ మ్యాచ్​లు ఆడిన ఆకాశ్.. 104 వికెట్లు తీశాడు. అతడిలోని ప్రతిభను సెలక్టర్లు, కోచ్ రాహుల్ ద్రవిడ్ గుర్తించారు. నిలకడగా 140 కిలోమీటర్ల వేగంతో బంతులు వేయగలగడం, బాల్​ను ఇరువైపులా స్వింగ్ చేయగలగడం, ఫస్ట్ క్లాస్ క్రికెట్​లో దుమ్మురేపడంతో భారత్ టీమ్​లో ఆడే ఛాన్స్ దక్కించుకున్నాడు ఆకాశ్. టీమ్ మేనేజ్​మెంట్ తన మీద ఉంచిన నమ్మకాన్ని నిలబెట్టుకున్నాడు. ఇంగ్లాండ్​తో జరుగుతున్న నాలుగో టెస్టులో 3 వికెట్లు పడగొట్టి తాను ఎంత డేంజరస్ బౌలరో ప్రూవ్ చేసుకున్నాడు. మరి.. ఆకాశ్ దీప్ డెబ్యూపై మీ అభిప్రాయాలను కామెంట్ల రూపంలో తెలియజేయండి.

ఇదీ చదవండి: ఆ ఇద్దరు భారత క్రికెటర్లు అంటే చాలా ఇష్టం.. ‘దేవర’ బ్యూటీ ఇంట్రెస్టింగ్ కామెంట్స్!

AKASH DEEP ON FIRE. 🔥🤯

– One of the finest debut ever in Tests by an Indian fast bowler…!!!!pic.twitter.com/WeKIUWxlyL

— Johns. (@CricCrazyJohns) February 23, 2024