నేడు మలివిడత రైతు భరోసా..

సన్న, చిన్నకారు రైతులకు పెట్టుబడి సహాయం అందిచే లక్ష్యంతో వైఎస్‌ జగన్‌మోహన్‌ రెడ్డి ప్రభుత్వం గత ఏడాది ప్రారంభించిన వైఎస్సార్‌ రైతు భరోసా పథకం రెండో ఏడాదిలో మలివిడద నగదు జమను ఈ రోజు రైతుల ఖాతాల్లో వేయనున్నారు. ఏడాదికి 13,500 రూపాయలు అర్హులైన 50.47 లక్షల మంది రైతులకు మూడు విడతల్లో జమ చేసేలా ఈ పథకాన్ని రూపకల్పన చేశారు.

మొదటి ఏడాది ఈ పథకం విజయవంతంగా పూర్తయింది. రెండో ఏడాదిలో ఇప్పటికే మొదటి విడత నగదు 7,500 రూపాయలు రైతుల ఖాతాల్లో జమ చేశారు. ఈ రోజు రెండో విడత నగదు 4 వేల రూపాయలు రైతులకు చేరవేయనున్నారు. సంక్రాంతి సమయంలో చివరిదైన మూడో విడత నగదు రెండు వేల రూపాయలు జమ చేయనున్నారు.

ఎన్నికల్లో వైఎస్‌ జగన్‌ ఈ హమీ ఇచ్చారు. ఇది నవరత్నాల్లో ఒకటి. అధికారంలోకి వచ్చిన నాలుగు నెలలకే 2019 అక్టోబర్‌లో ఈ పథకం ప్రారంభించారు. మొదటి ఏడాది 46.69 లక్షల మంది రైతులకు ఈ పథకం కింద 6,173 కోట్ల రూపాయులు పెట్టుబడి సాయం అందించారు. ప్రతి ఏడాది అర్హులైన వారిని ఈ పథకంలో చేర్చుతున్నారు. రైతులు తమ పట్టాదార్‌ పాస్‌పుస్తకం, ఆధార్, బ్యాంకు ఖాతా నంబర్‌ గ్రామ సచివాలయాల్లో లేదా తమ వలంటీర్‌కు ఇస్తే చాలు.. ఈ పథకం ద్వారా లబ్ధి పొందవచ్చు.

ఎప్పటికప్పుడు కొత్త అర్హులకు ఈ పథకం వర్తింపజేస్తుండడంతో ఈ ఏడాది పెట్టుబడి సాయం అందుకునే రైతుల సంఖ్య 50.47 లక్షలకు చేరుకుంది. వీరందరికీ 6,797 కోట్ల రూపాయలు పెట్టుబడి సాయం కింద అందించనున్నారు. కౌలు రైతులు, గిరిజన రైతులకు కూడా ఈపథకం వర్తింపజేస్తున్నారు. మొత్తం మీద ఐదేళ్లలో ఈ పథకం ద్వారా రైతులకు 67,500 రూపాయలు లబ్ధి చేకూరనుంది.