Abdullahpurmet: అబ్దుల్లాపూర్‎మెట్‎లో ఘర్షణ! రైతులపై రియల్ ఎస్టేట్ వ్యాపారుల దాడి!

రంగారెడ్డి జిల్లా అబ్దుల్లాపూర్‎మెట్‎లో రియల్ ఎస్టేట్ వ్యాపారులకు రైతులకు మధ్య జరిగిన ఘర్షణ కలకలం రేపుతుంది. ఈ ఘటనలో రియల్ ఎస్టేట్ వ్యాపారులు విధ్యంసం సృష్టించారు. ఏకంగా రైతులపై దాడికి దిగారు. అబ్దుల్లాపూర్‎మెట్‎లో ప్రస్తుతం భూ వివాదం జరుగుతుంది. ఆ వివాదానికి సంబంధించి గ్రామస్థులు ఎదురు తిరిగారు. దాంతో వారిపై రియల్ ఎస్టేట్ వ్యాపారులు దాడులకు పాల్పడ్డారు. తెలుస్తున్న సమాచారం ప్రకారం.. అబ్దుల్లాపూర్ మెట్ పిగ్లిపూర్‎ గ్రామంలోని సర్వే నంబర్ 17పై నెలకొన్న వివాదం గురించి మాట్లాడుదామని కొంతమంది రియల్ ఎస్టేట్ వ్యాపారులు గ్రామస్థులతో చర్చలు జరిపేందుకు వారిని పిలిచారు. ఈ క్రమంలో రైతులు, రియల్ ఎస్టేట్ వ్యాపారుల మధ్య గొడవ జరిగింది..

రియల్ ఎస్టేట్ వ్యాపారులు రౌడీలతో తమను కొట్టించారని గ్రామస్థులు ఆరోపించారు. గతంలో ధరణి పోర్టల్‎లో రికార్డులు తారుమారు చేసి వందల కోట్ల విలువైన భూమిని రియల్ ఎస్టేట్ వ్యాపారులు కబ్జా చేశారని ఆరోపించారు. ఇప్పుడు మాట్లాడుకుందామని పిలిచి తమపై అన్యాయంగా దాడి చేశారని రైతులు ఆవేదన వ్యక్తం చేశారు. సీలింగ్ ల్యాండ్‎ను పట్టాగా రికార్డ్‎లలో చూపించి మా భూములు లాక్కున్నారని ఆ రైతులు ఆవేదన వ్యక్తం చేస్తున్నారు. గోపాల్ యాదవ్ అనే వ్యక్తి తన అనుచరులతో కలిసి న్యాయం అడిగిన రైతులపై దాడి చేశారని వాపోయారు. అంతేగాక అతను మళ్ళీ ఈ ప్రాంతానికి రైతులు వస్తే చంపేస్తామని బెదిరించాడని రైతులు ఆవేదన వ్యక్తం చేశారు.

అధికారుల చుట్టూ గత 6 నెలల నుండి తిరిగినా కూడా తమకి న్యాయం జరగడం లేదని రైతులు వాపోయారు. ఈ విషయంలో మాకు ఎలాగైనా న్యాయం జరగాలని రైతులు డిమాండ్ చేశారు. మాట్లాడుకుందామని పిలిచి మాపై ఇంత దారుణంగా కర్రలు, రాడ్లతో దాడులు చేయడం అన్యాయం అని రైతులు ఆవేదన వ్యక్తం చేశారు. ఈ మేరకు బాధితులు తమపై దాడి చేసినందుకు భయపడలేదు. ఏమాత్రం వెనక్కి తగ్గకుండా పోలీసులకు ఫిర్యాదు చేశారు. దీంతో బాధితుల ఫిర్యాదు మేరకు కేసు నమోదు చేసుకున్న పోలీసులు ఈ గొడవ గురించి దర్యాప్తు చేస్తున్నారు. మరి అబ్దుల్లాపూర్‎మెట్‎లో రియల్ ఎస్టేట్ వ్యాపారులకు రైతులకు మధ్య జరిగిన ఈ ఘర్షణ గురించి మీరేమి అనుకుంటున్నారో కామెంట్ రూపంలో తెలియజేయండి.