‘పుష్ప-2’ లో అన్నీ సర్ ప్రైజ్ లే.. పులితో ఫైట్, చిట్టిబాబు ఎంట్రీ!

తగ్గేదేలే అంటూ ‘పుష్ప: ది రైజ్’తో ఐకాన్ స్టార్ అల్లు అర్జున్ సృష్టించిన సంచలనం అంతా ఇంతా కాదు. సుకుమార్ దర్శకత్వం వహించిన ఈ చిత్రం పాన్ ఇండియా రేంజ్ లో భారీ కలెక్షన్లు రాబట్టి ఘన విజయం సాధించింది. ఈ మూవీ రెండో భాగం ‘పుష్ప ది రూల్’ పేరుతో రూపొందుతోంది. అయితే పార్ట్ 2 లో ఊహించని సర్ ప్రైజ్ లు ఎన్నో ఉన్నట్లు తెలుస్తోంది.

‘పుష్ప-2’లో బన్నీ పులితో తలపడనున్నాడని ఎప్పటినుంచో ప్రచారం జరుగుతోంది. ఆర్ఆర్ఆర్ లో జూనియర్ ఎన్టీఆర్ పులిని బందించే సీన్ కి సూపర్ రెస్పాన్స్ వచ్చింది. పుష్ప 2 లో పులితో బన్నీ ఫైట్ అంతకుమించి ఉండేలా సుకుమార్ ప్లాన్ చేస్తున్నట్లు టాక్. అలాగే, ఇందులో పుష్ప రాజ్ ని చూసి పులే భయపడుతుందని అర్థం వచ్చేలా ఓ పవర్ డైలాగ్ కూడా ఉన్నట్లు సమాచారం. అంతేకాదు పుష్ప-2 లో డైలాగ్ ఇదే అంటూ ప్రస్తుతం సోషల్ మీడియాలో ఒక డైలాగ్ వైరల్ గా మారింది. “అడవిలో జంతువులు నాలుగు అడుగులు వెనక్కి వేసాయంటే పులి వచ్చిందని అర్ధం.. అదే పులి నాలుగు అడుగులు వెనక్కి వేసిందంటే పుష్ప రాజ్ వచ్చాడని అర్థం” అనే డైలాగ్ ఉంటుందట. పుష్ప-1 విజయంలో డైలాగ్ లు కూడా కీలక పాత్ర పోషించాయి. తాజాగా పుష్ప-2 లోని డైలాగ్ అంటూ వైరల్ అవుతున్న డైలాగ్ పవర్ ఫుల్ గా ఉండటంతో బన్నీ ఫ్యాన్స్ సంబరపడుతున్నారు.

ఇక ‘పుష్ప-2’లో అన్నింటికన్నా పెద్ద సర్ ప్రైజ్ మెగా పవర్ స్టార్ రామ్ చరణ్ ఎంట్రీ అని తెలుస్తోంది. చరణ్ తో సుకుమార్ రూపొందించిన రంగస్థలం మూవీ బ్లాక్ బస్టర్ గా నిలిచింది. అందులో చరణ్ పోషించిన చిట్టిబాబు పాత్ర అన్ని వర్గాల ప్రేక్షకులను విశేషంగా ఆకట్టుకుంది. ఇప్పుడు ఆ చిట్టిబాబు గెటప్ లోనే చరణ్ కాసేపు ‘పుష్ప-2’లో సందడి చేయనున్నాడని వినికిడి. ప్రస్తుతం సినిమాటిక్ యూనివర్స్ ల ట్రెండ్ నడుస్తోంది. సుకుమార్ సినిమాటిక్ యూనివర్స్ లో భాగంగా ‘పుష్ప-2’లో పుష్పరాజ్, చిట్టిబాబు కలవనున్నారని ప్రచారం జరుగుతోంది.