బాలీవుడ్ లో వరుసగా పెద్ద సినిమాలు బాక్సాఫీసు వద్ద బోల్తా కొడుతున్నాయి. స్టార్ హీరోలు, భారీ క్యాస్టింగ్, బడ్జెట్, ఇలా ఎన్ని ఉన్నా.. సినిమాలు మాత్రం ఆశించిన ఫలితాన్ని దక్కించుకోవడంలో విఫలమవుతూనే ఉన్నాయి.
షంషేరా..
ఈ చిత్రం 2022 జూలై 22న విడుదలైంది. రణబీర్ కపూర్, వాణి కపూర్, సంజయ్ దత్ నటించిన ఈ చిత్రం బాక్సాఫీసు వద్ద సూపర్ హిట్ అవుతుందని అనుకున్నారు. కానీ, అలా జరగకపోగా, మొత్తంగా నెగిటివ్ టాక్ ను మూటగట్టుకుంది. రణబిర్, సంజయ్ ల నటన కూడా ఈ సినిమాను గట్టెక్కించలేకపోయింది. మొత్తానికి ఈ ఏడాది విడుదలైన సినిమాల్లో పెద్ద ఫ్లాప్ గా నిలిస్తుందని అంటున్నాయి ట్రేడ్ వర్గాలు.
సమ్రాట్ పృథ్వీరాజ్..
ఈ ఏడాది అక్షయ్ కుమార్ వంటి వరుస హిట్లతో దూసుకెళ్తున్న స్టార్ కు సైతం అచ్చిరాలేదు. ఇటీవల అక్షయ్ నటించిన సమ్రాట్ పృథ్వీరాచ్ చిత్రం భారీ పరాజయాన్నే మూటగట్టుకుంది. ఈ సినిమాపై ఎన్నో అంచనాలు ఉన్నప్పటికీ వాటిని చేరుకోలేకపోయింది. దీంతో అక్షయ్ అభిమానులు సైతం నిరాశలో ఉన్నారు.
రన్ వే 34…
అజయ్ దేవగణ్, అమితాబ్ బచ్చన్ వంటి స్టార్లు ఉంటే ఆ సినిమాపై కనీస ఆసక్తి కనబరుస్తారు ప్రేక్షకులు. విడుదలకు ముందు ఈ సినిమాపై మంచి అంచనాలే ఉన్నా.. సినిమా ఫలితం మాత్రం తీవ్ర నిరాశ పరిచింది. బాక్సాఫీసు వద్ద రన్ వే34 చిత్రం సైతం ఫ్లాప్ గా నిలిచింది.
హీరోపంతీ-2..
టైగర్ ష్రాఫ్ హీరోగా వచ్చిన ఈ చిత్రానిది కూడా అదే పరిస్థితి. ఏఆర్ రహ్మన్ సంగీతం, సీక్వెల్ గా వచ్చిన కథ.. ఇలా ఈ సినిమాలో ప్రేక్షకుల్ని థియేటర్లకు రప్పించే అంశాలు ఉన్నప్పటికీ రోటీన్ గా సాగిన కథాకథనాలతో మరో డిజాస్టర్ గా మారింది.
ధాకడ్..
ఈ ఏడాది పెద్ద డిజాస్టర్ గా నిలిచింది ఈ చిత్రం. దాదాపు 85 కోట్లతో నిర్మాణం జరిగితే, కనీసం 10 కోట్లు కూడా వసూలు చేయలేకపోయింది ఈ సినిమా.
