కోర్టుల్లో చేసే విచారణలు, వాదనలు, తీర్పుల్లో లింగ వివక్షతకు ఎలాంటి తావు లేకుండా పదాలను ఉపయోగించడంపై సుప్రీంకోర్టు ఒక హ్యాండ్బుక్ను విడుదల చేసింది. స్త్రీలను మూసధోరణిలో కించపరిచే, చులకన భావనతో చూసే పదాల స్థానంలో వినియోగించాల్సిన ప్రత్యామ్నాయ పదాలతో దీనిని తయారు చేసింది. మగవారితో సమానంగా ఆడవాళ్లను గౌరవించాలని సుప్రీం స్పష్టం చేసింది. వివక్షాపూరిత పదాలను లా డిక్షనరీ నుంచి తొలగించడం కూడా ఈ పుస్తక లక్ష్యాల్లో ఒకటి. సీజేఐ జస్టిస్ డీవై చంద్రచూడ్ నేతృత్వంలోని రాజ్యాంగ ధర్మాసనం బుధవారం ఈ హ్యాండ్బుక్ను రిలీజ్ చేసింది.
న్యాయసంవాదాలతో పాటు ఉత్తర్వులు, లిఖితపూర్వక వాదనల టైమ్లో జడ్జీలు, న్యాయవాదులకు ఈ హ్యాండ్బుక్ సాయపడుతుందని జస్టిస్ చంద్రచూడ్ తెలిపారు. లైంగిక హింసకు గురైన బాధితులను న్యాయపరిభాషలో వివరించే సమయంలో మూసధోరణిని వీడేందుకు 30 పేజీల ఈ పుస్తకం ఎంతగానో తోడ్పడుతుందని చెప్పారు. వ్యక్తిగత అభిప్రాయాలు, ఆసక్తులు, ఆహారపు అలవాట్లు, వేషధారణ ఆధారంగా స్త్రీల మీద దురభిప్రాయాలను ఏర్పర్చుకోవడం గానీ.. ఆ కారణం వల్ల వారిపై దురుసుగా ప్రవర్తించడం గానీ ఏమాత్రం సమర్థనీయం కాదని జస్టిస్ చంద్రచూడ్ స్పష్టం చేశారు.
పురుషులు అధికులు, స్త్రీలు అల్పులనే సాధారణీకరణ భావజాలం నుంచి జడ్జీలు, న్యాయవాదులూ బయటపడాల్సిన అవసరాన్ని కొత్త హ్యాండ్బుక్లో నొక్కి చెప్పారు. కోర్టులు గతంలో ఇచ్చిన తీర్పుల్లో మహిళల్ని ప్రస్తావిస్తూ చేసిన అనేక అనుచిత పదాలను ఇందులో పేర్కొన్నారు. తాజాగా విడుదల చేసిన ‘హ్యాండ్బుక్ ఆన్ కంబాటింగ్ జెండర్ స్టీరియోటైప్స్’ సుప్రీంకోర్టు వెబ్సైట్లో అందుబాటులో ఉంటుందని వెల్లడించారు. ఇక.. వేశ్య, వ్యభిచారిణి అనే అర్థంలో ఇంగ్లీషులో వాడుతున్న ప్రా*స్టిట్యూట్, వో*ర్, హు*కర్ లాంటి పదాలను సుప్రీం నిషేధించింది. వీటికి బదులుగా సె*క్స్వర్కర్ అనే పదాన్ని సూచించింది.
ఇప్పటిదాకా ఉంపుడుగత్తె అనే అర్థంలో వాడే ఇంగ్లీషు పదాలను కీ*ప్, కాంక్యు*బైన్ అనడానికి బదులుగా వివాహేతర సంబంధాలున్న స్త్రీ (విమెన్ విత్ సె*క్సువల్ రిలేషన్స్ అవుట్సైడ్ ఆఫ్ మ్యారేజ్)గా పేర్కొనాలని సుప్రీంకోర్టు తెలిపింది. ఉంపుడుగత్తె సంతానమని చెప్పేందుకు వాడుతున్న బా*స్టర్డ్ అనే పదానికి బదులుగా అవివాహ దంపతుల సంతాన (నాన్ మ్యారిటల్ చైల్డ్)మని తెలపాలి. హౌస్వైఫ్ను హోమ్మేకర్ అని పిలవాలి. మిస్ట్రెస్ను విమెన్ అని సంబోధించాల్సి ఉంటుంది. కెరీర్ విమెన్ను.. విమెన్ (మహిళ) అని పిలిస్తే సరిపోతుంది. ఈవ్టీజింగ్ను ఇక మీదట స్ట్రీట్ సె*క్సువల్ హరాజ్మెంట్గా పేర్కొనాల్సి ఉంటుంది. స్పి*న్స్టర్ (కన్య) అనడం కంటే అవివాహిత స్త్రీ (అన్మ్యారీడ్ విమెన్) అనడం సముచితం అని సుప్రీంకోర్టు హ్యాండ్బుక్ పేర్కొంది.
