గాల్లో ఎగురుతున్న విమానంలో సాంకేతిక లోపం! 167 మంది ప్రయాణికులతో..

విమానాలు అప్పుడప్పుడు ఎమర్జెన్సీ ల్యాండింగ్ అవుతుంటాయి. ఇలా ల్యాండ్ అయిన సమయాల్లో ప్రమాదాలు జరిగిన ఘటనలు కూడా ఉన్నాయి. వాతావరణం ప్రతికూలంగా మారడం, ఫ్లయిట్​లో సాంకేతిక లోపాలు తలెత్తడం, ప్రయాణికుల్లో ఎవరికైనా హెల్త్ ఎమర్జెన్సీ ఏర్పడిన సమయాల్లో విమానాలను అత్యవసరంగా కిందకు దించుతుంటారు. అయితే ఇలా ల్యాండ్ అయ్యే క్రమంలో ఒక్కోసారి పట్టు తప్పి ప్రమాదాలు జరగడం వార్తల్లో చూస్తూనే ఉన్నాం. తాజాగా మన దేశంలో ఓ ఫ్లైట్​ను ఎమర్జెన్సీ ల్యాండ్ చేశారు. గాల్లో ఎగురుతున్న విమానంలో సాంకేతిక లోపం తలెత్తింది. దీంతో అందులో ప్రయాణిస్తున్న వాళ్లు భయాందోళనకు లోనయ్యారు.

ఢిల్లీ నుంచి ముంబై వెళ్తున్న విస్తారా ఫ్లైట్​ను అత్యవసరంగా ముంబై ఎయిర్​పోర్ట్​లో దించారు. విమానం గాల్లో ఉండగానే హైడ్రాలిక్ వ్యవస్థలో సమస్య తలెత్తడంతో అప్రమత్తం అయ్యారు పైలట్లు. చివరి నిమిషంలో ఎమర్జెన్సీ ల్యాండింగ్ చేశారని సమాచారం. దీంతో ప్యాసింజర్స్ ఊపిరి పీల్చుకున్నారట. ఆ టైమ్​లో ఫ్లైట్​లో 167 మంది ప్రయాణిస్తున్నారని తెలిసింది. ఈ ఘటనపై విస్తారా సంస్థ ఓ ప్రకటన విడుదల చేసింది. విమానంలో చిన్న సమస్య తలెత్తడంతో ల్యాండింగ్ చేశామని పేర్కొంది. ముందు జాగ్రత్తగా పైలట్లు రిక్వెస్ట్ చేయడంతో ల్యాండింగ్​కు ఎయిర్ ట్రాఫిక్ కంట్రోల్ ఓకే చెప్పిందని.. దీంతో ముంబై ఎయిర్​పోర్ట్​లో విమానాన్ని సేఫ్​గా దింపామని వివరించింది.

• ఇదీ చదవండి: వందే భారత్ రైళ్లు: 100 ట్రైన్స్ కోసం 30 వేల కోట్ల టెండర్.. క్యాన్సిల్ చేసిన ఇండియన్ రైల్వేస్..