ఎలాన్ మస్క్.. ఈ పేరు తెలియని వారు దాదాపుగా ఉండరనే చెప్పాలి. ప్రముఖ వ్యాపారవేత్తగా, ప్రపంచ కుబేరుల్లో ఒకరిగా ఆయన పేరు ఎంతో గడించారు. అంతేకాదు పాపులర్ సోషల్ మీడియా ప్లాట్ఫామ్ అయిన ట్విట్టర్ను కొనుగోలు చేసి సంచలనం సృష్టించారాయన. అమెరికన్ కార్ల దిగ్గజం టెస్లాకు అధిపతి కూడా మస్కే కావడం విశేషం. కార్ల తయారీతో పాటు స్పేస్ ఎక్స్ అనే సంస్థ ద్వారా ఏరోస్పేస్ రంగంలో విప్లవాత్మక మార్పులు తీసుకొచ్చారాయన. వ్యాపార రంగంలో పేరు ప్రఖ్యాతులు గడించిన ఎలాన్ మస్క్.. వైవాహిక జీవితంలో మాత్రం ఒడిదొడుకులు ఎదుర్కొన్నారు.
వ్యాపార రంగంలో ఎలాన్ మస్క్ చూడని విజయం లేదు. అలాంటి ఈ అపర కుబేరుడు వైవాహిక జీవితంలో మాత్రం సక్సెస్ కాలేదు. ఆయన మూడుసార్లు పెళ్లిళ్లు చేసుకున్నారు. వాటిలో ఏ ఒక్క పెళ్లి కూడా నిలవలేదు. మ్యారేజ్ చేసుకున్న ఇద్దరు భార్యలతోనూ ఆయన అధికారికంగా విడిపోయారు. ఆయన నుంచి విడాకులు తీసుకున్న వారిలో రెండో భార్య తలులా రిలే కూడా ఒకరు. ఆమెను మస్క్ రెండు సార్లు పెళ్లి చేసుకోవడం గమనార్హం. మస్క్-తలులా చాన్నాళ్ల కిందే విడిపోయారు. కాగా, ఆమెకు ఇప్పుడు మరో వ్యక్తితో నిశ్చితార్థం జరిగింది. బ్రిటిష్ స్టార్ నటుడు థామస్ బ్రాడీ సాంగ్స్టర్తో రెండేళ్లు డేటింగ్ చేసిన తలులా రిలే ఇటీవలే ఎంగేజ్మెంట్ చేసుకున్నారు.
థామస్ బ్రాడీతో తన ఎంగేజ్మెంట్ అయిన తర్వాత తలులా రిలే సోషల్ మీడియాలో ఒక పోస్ట్ చేశారు. దీనికి ఎలాన్ మస్క్ స్పందిస్తూ.. రెడ్ హార్ట్ ఎమోజీతో కాబోయే వధూవరులకు అభినందనలు తెలిపారు. థామస్ కూడా తమ నిశ్చితార్థం గురించి ఇన్స్టాగ్రామ్ పోస్ట్ ద్వారా అందరికీ తెలియజేశారు. అయితే వీళ్లిద్దరి పెళ్లి ఎప్పుడనేది ఇంకా తెలియరాలేదు. థామస్-తలులా 2021లో డేటింగ్ మొదలుపెట్టినట్లు తెలుస్తోంది. ఇకపోతే, తలులా రిలేతో రెండేళ్లు డేటింగ్ చేసిన తర్వాత స్కాట్లాండ్లోని డోర్నోచ్ కేథడ్రల్లో మ్యారేజ్ చేసుకున్నారు ఎలాన్ మస్క్. అయితే 2016లో ఈ జంట డివోర్స్ తీసుకొని విడిపోయారు.
Congratulations! ♥️
— Elon Musk (@elonmusk) July 27, 2023
