సముద్రంలో వేటకు వెళ్లిన మత్స్యకారులు ఆపదలో చిక్కుకునే అవకాశాలు ఎక్కువ. వేటాడేందుకు వెళ్లిన గంగపుత్రులు తప్పిపోయిన ఘటనలు, ప్రమాదానికి గురవడం గురించి కూడా వార్తల్లో చూస్తూనే ఉన్నాం. ఈ నేపథ్యంలో వారి కోసం ఒక కొత్త టెక్నాలజీని అందుబాటులోకి తీసుకొస్తోంది జగన్ సర్కారు. ఇస్రో డెవలప్ చేసిన కమ్యూనికేషన్ అండ్ ట్రాకింగ్ సిస్టమ్ను త్వరలో అందుబాటులోకి తీసుకొచ్చేందుకు ఏపీ ప్రభుత్వం సన్నాహాలు చేస్తోంది. సముద్ర జలాల్లో వేటపై ఆధారపడి రాష్ట్రంలో 1.60 లక్షల కుటుంబాలు జీవనోపాధి పొందుతున్నాయి.
వేట సాగించే మత్స్యకారులకు ఇప్పటిదాకా ఇన్కాయిస్ సంస్థ శాటిలైట్ ద్వారా సముద్రంలో మత్స్య సంపద అధికంగా ఉండే ప్రదేశాలను గుర్తించి బోట్లలో అమర్చే ఆటోమేటిక్ ఇన్ఫర్మేషన్ సిస్టమ్, మత్స్యశాఖ డెవలప్ చేసిన మొబైల్ యాప్స్ ద్వారా 12 నాటికల్ మైళ్ల పైబడి దూరం వెళ్లే మెకనైజ్డ్ బోట్లకు సమాచారాన్ని అందిస్తున్నాయి. అయితే ఈ సమాచారం సంప్రదాయ, మెకనైజ్డ్ బోట్లకు అందే ఛాన్స్ లేదు. పైగా ఇది రెండు నుంచి మూడ్రోజులు మాత్రమే ఉపయోగపడుతుంది. మరోవైపు ఎవరైనా ఆపదలో ఉంటే తమ క్షేమ సమాచారం చెప్పాలంటే.. అది ఫోన్లకు ఉండే సిగ్నల్స్ పై ఆధారపడి ఉంటుంది. ఒకవేళ సిగ్నల్ మిస్సయితే తీరానికి కమ్యూనికేషన్ పూర్తిగా తెగిపోతుంది. దీంతో ఈ పరిస్థితికి చెక్ పెడుతూ కొత్త టెక్నాలజీ అందుబాటులోకి రానుంది.
కొత్తగా ప్రవేశపెడుతున్న కమ్యూనికేషన్ అండ్ ట్రాకింగ్ సిస్టమ్ను 12 నాటికల్ మైళ్లకు పైబడి దూరం వెళ్లే మరబోట్లు, మెకనైజ్డ్ బోట్లకు అమర్చనున్నారు. రూ.36,400 విలువైన ఈ డివైజ్ను 100 శాతం సబ్సిడీతో అమర్చనున్నారు. తీరంలో గస్తీ కోసం డెవలప్ చేసిన నావిక్, జీపీఎస్ శాటిలైట్స్తో ఈ పరికరం అనుసంధానమై పనిచేస్తుంది. బోట్లలోని మత్స్యకారుల దగ్గర ఉండే ఫోన్లను బ్లూటూత్ ద్వారా కనెక్ట్ చేసుకుంటే సిగ్నల్తో సంబంధం లేకుండా ఇరువైపులా సమాచారాన్ని పరస్పరం పంపుకునే ఛాన్స్ ఉంటుంది. దీని కోసం ప్రత్యేకంగా ఓ సాఫ్ట్వేర్ అప్లికేషన్ను అభివృద్ధి చేస్తున్నారు. ఎవరైనా సముద్రంలో ఆపదలో చిక్కుకుంటే ఈ డివైజ్ ద్వారా ఇన్ఫర్మేషన్ పంపితే శాటిలైట్ ద్వారా వెంటనే గ్రౌండ్ స్టేషన్కు చేరుతుంది. అక్టోబర్ నాటికి ఈ డివైజ్ సేవల్ని అందుబాటులోకి తెచ్చేందుకు కసరత్తులు చేస్తున్నామని మత్స్య శాఖ జేడీ వీవీ రావు తెలిపారు.
