బిపాషా బసు.. బాలీవుడ్లో ఒక టైమ్లో చక్రం తిప్పిన హీరోయిన్లలో ఒకరు. ఈ డస్కీ బ్యూటీ అందం, డ్యాన్సులకు యూత్ ఆడియెన్స్ ఫిదా అయిపోయారు. యువ హీరోల దగ్గర నుంచి టాప్ స్టార్స్ వరకు అందరి హీరోల చిత్రాల్లో నటించారు బిపాషా. ఒక సమయంలో హిందీ చిత్ర పరిశ్రమలో టాప్ హీరోయిన్స్తో ఆమె పోటీపడ్డారు. అయితే ఆ తర్వాత రేసులో వెనుకపడ్డారు. ‘రాజ్’, ‘జిస్మ్’, ‘ధూమ్ 2’, ‘నో ఎంట్రీ’, ‘ఫిర్ హేరా ఫేరీ’, ‘ఓంకార’, ‘రేస్ 2’, ‘బచ్నా హే హసీనో’ లాంటి హిట్ మూవీస్లో తనదైన నటనతో ఆడియెన్స్ మనసుల్లో సుస్థిర స్థానం సంపాదించుకున్నారామె. తెలుగులో సూపర్ స్టార్ మహేష్ బాబు సరసన ‘టక్కరి దొంగ’లో నటించి ఇక్కడి వారినీ అలరించారు.
బాలీవుడ్లో స్టార్ హీరోయిన్గా వెలుగొందిన బిపాషా బసు ఈమధ్య సినిమాలు చేయడం తగ్గించారు. ప్రియుడు కరణ్ సింగ్ గ్రోవర్ను ఆమె పెళ్లాడిన విషయం విదితమే. అయితే బిపాషాకు పెద్ద కష్టం వచ్చింది. గత సంవత్సరం నవంబర్లో పండంటి ఆడబిడ్డకు జన్మనిచ్చారామె. ఆ పాపాయికి దేవి అని నామకరణం చేశారు. అల్లారుముద్దుగా పెంచుకుంటున్న తన గారాలపట్టి పుట్టుకతోనే గుండెలో రంధ్రాలతో జన్మించిందని చెప్పారు బిపాషా. దీంతో చిన్నారి దేవీకి మూడు నెలల వయసులోనే సర్జరీ చేశారని చెబుతూ కంటతడి పెట్టుకున్నారు బిపాషా.
ఇన్స్టాగ్రామ్లో లైవ్లోకి వచ్చిన బిపాషా బసు.. తన ప్రెగ్నెన్సీ జర్నీతో పాటు ఓ అమ్మగా తాను ఎదుర్కొన్న ఒడిదొడుకుల గురించి మాట్లాడుతూ ఎమోషనల్ అయ్యారు. దేవి గుండెలో రంధ్రాలను సరిచేయడానికి వెంట్రిక్యులర్ సెప్టల్ డిఫెక్ట్ సర్జరీ చేయాలని డాక్టర్లు చెప్పారని బిపాషా తెలిపారు. ఆ సమయంలో బాధను పంటి కింద అదిమిపెట్టి నవ్వుతూ కనిపించానని.. ఇలాంటి నరకం ఏ తల్లికీ రాకూడదన్నారు. దీని గురించి తమ కుటుంబ సభ్యులకు కూడా చెప్పలేదన్నారు. పాపాయి రాకను ఎంతో ఘనంగా వేడుక చేసుకోవాలని అనుకున్నామని.. కానీ ఈ విషయం తెలిసి మనసు ముక్కలైందని బిపాషా చెప్పుకొచ్చారు. ఆపరేషన్ సక్సెస్ కావడంతో ఊపిరి పీల్చుకున్నామని చెబుతూ కన్నీళ్లు పెట్టుకున్నారు బిపాషా.
View this post on Instagram
