శ్రీలంక క్రికెట్​ను జై షా నాశనం చేశాడా? అర్జున రణతుంగ విమర్శల్లో నిజమెంత?

క్రికెట్​లో ఎన్ని టోర్నీలు ఉన్నప్పటికీ వరల్డ్ కప్​ కిందే ఏదైనా. జెంటిల్మన్ గేమ్​లో ఈ టోర్నమెంట్​ను అత్యంత ప్రతిష్టాత్మకంగా భావిస్తారు. వన్డే వరల్డ్ కప్ కోసం క్రికెట్ ఆడే ప్రతి దేశం ఎదురు చూస్తుంది. మెగా టోర్నీలో సత్తా చాటి టీమ్​కు కప్​ను అందించాలని ప్రతి క్రికెటర్ కలలు కంటాడు. అయితే ఈ క్రమంలో గెలిచిన జట్టును ప్రేక్షకులు, అభిమానులు పొగడ్తల్లో ముంచెత్తుతారు. అదే వరల్డ్ కప్​లో ఓడిన టీమ్ అయితే మాత్రం ఫ్యాన్స్ నుంచి తీవ్ర ఆగ్రహాన్ని ఎదుర్కోక తప్పదు. అలాగే క్రికెట్ బోర్డుల నుంచి కూడా చర్యలు ఫేస్ చేయాల్సి ఉంటుంది. ప్రపంచ కప్​లో ఫెయిలైన టీమ్స్​కు సంబంధించిన కెప్టెన్లు, కోచ్​లు రాజీనామా చేసిన సందర్భాలు కూడా ఉన్నాయి. 2007 వరల్డ్ కప్​లో గ్రూప్ దశలోనే టీమిండియా వెనుదిరగడంతో అప్పటి కెప్టెన్ రాహుల్ ద్రవిడ్ తన బాధ్యతల నుంచి తప్పుకున్నాడు.

2007 వరల్డ్‌ కప్​లోనే పాకిస్థాన్ కూడా గ్రూప్ దశలోనే నిష్క్రమించింది. దీంతో దాయాది జట్టులోనూ పలు మార్పులు చేశారు. 2015లో ఇంగ్లండ్ లీగ్ స్టేజ్​లోనే వెనుదిరిగింది. దీంతో టీమ్ మొత్తాన్ని మార్చేసింది ఇంగ్లీష్ క్రికెట్ బోర్డు. ప్రస్తుత వరల్డ్ కప్​లోనూ కొన్ని టీమ్ పెర్ఫార్మెన్స్ తాలూకు ఎఫెక్ట్ టోర్నీ ముగియక ముందు స్టార్ట్ అయింది. ఈసారి మెగాటోర్నీలో లీగ్ స్టేజ్​లో ఆడిన తొమ్మిది మ్యాచుల్లో ఏడింట్లో ఓడింది శ్రీలంక. దీంతో లంక గవర్నమెంట్ ఆ దేశ క్రికెట్ బోర్డు మొత్తాన్ని రద్దు చేసేసింది. టీమ్​లోనూ భారీ మార్పులు చేసేందుకు రెడీ అవుతున్నట్లు తెలుస్తోంది. అయితే రూల్స్​కు విరుద్ధంగా బోర్డు వ్యవహారాల్లోకి దేశ సర్కారు జోక్యం చేసుకుందనే కారణంతో శ్రీలంక మీద నిషేధం విధించింది ఐసీసీ. ఎలక్షన్ ప్రొసీజర్​కు వ్యతిరేకంగా ప్రభుత్వం బోర్డును రద్దు చేయడంతో బ్యాన్​ను ఫేస్ చేస్తోంది లంక క్రికెట్.

లంక క్రికెట్​కు పట్టిన దుస్థితిపై క్రికెట్ ఫ్యాన్స్ అందరూ బాధపడుతున్న తరుణంలో ఆ దేశ వరల్డ్ కప్ విన్నింగ్ కెప్టెన్ అర్జున రణతుంగ కాంట్రవర్షియల్ కామెంట్స్ చేశాడు. లంక క్రికెట్​కు ఈ గతి పట్టడానికి భారత క్రికెట్ బోర్డు (బీసీసీఐ) ప్రధాన కార్యదర్శి జై షానే కారణమని ఆరోపించాడు. లంక బోర్డు అధికారులతో ఉన్న సత్సంబంధాల కారణంగానే షా తమ మీద పెత్తనం చెలాయిస్తున్నాడని విమర్శించాడు. తండ్రి అమిత్ షా పవర్​ను అడ్డుపెట్టుకొని జై షా శ్రీలంక క్రికెట్​ను శాసిస్తున్నాడని సీరియస్ అయ్యాడు.

జై షా వల్లే లంక క్రికెట్ నాశనమైందన్నాడు అర్జున రణతుంగ. అయితే ఈ వ్యాఖ్యలపై నెటిజన్స్ ఒక్కొక్కరు ఒక్కోలా రియాక్ట్ అవుతున్నారు. ఆసియా కప్-2023 నిర్వహణ విషయంలో పాకిస్థాన్ నుంచి కొన్ని మ్యాచులు లంకలో జరిగేలా షా ఒప్పించాడని.. అంతవరకే గానీ ఆ దేశ క్రికెట్​లో ఆయన ప్రమేయం ఎక్కడా లేదంటున్నారు. లంక బోర్డుకు కాసులు కురిపించే లంక ప్రీమియర్ లీగ్​లోనూ షా వేలు పెట్టలేదని కామెంట్స్ చేస్తున్నారు. లంక క్రికెట్ పరువు ఎక్కడ పోతుందోనని అనవసరంగా ఈ వ్యవహారంలోకి షాను లాగుతున్నారని చెబుతున్నారు. మరి.. లంక క్రికెట్ విషయంలో షాను రణతుంగ విమర్శించడంపై మీరేం అనుకుంటున్నారో కామెంట్ల రూపంలో తెలియజేయండి.

ఇదీ చదవండి: సెమీస్​కు ముందు షాకింగ్‌ కామెంట్స్‌ చేసిన కేన్‌ మామ!