టెక్నాలజీ రోజురోజుకీ మరింత వేగంగా అభివృద్ధి చెందుతోంది. సాంకేతికత విభిన్న రూపాల్లో అందుబాటులోకి వస్తోంది. ఈ టెక్ జమానాలో రోజుకో సాంకేతికత తయారై బయటికొస్తోంది. ఇటీవలి కాలంలో చూసుకుంటే.. ఎక్కడ చూసినా ఆర్టిఫిషియల్ ఇంటెలిజెన్స్ గురించే వినిపిస్తోంది. ఏఐదే భవిష్యత్తు అని టెక్ నిపుణులు అంటున్నారు. ఆర్టిఫిషియల్ ఇంటెలిజెన్స్ గురించి ఇంత చర్చ జరగడానికి చాట్జీపీటీ ఒక కారణంగా చెప్పొచ్చు. కోడింగ్ దగ్గర నుంచి కవితల వరకు ఏది నేర్చుకోవాలన్నా చాట్జీపీటీనే మార్గమని చాలా మంది అంటూ వచ్చారు. దీని దగ్గర ప్రతి ప్రశ్నకు జవాబు ఉందని చెబుతూ వచ్చారు. దీంతో ఈ చాట్బోట్ను చాలా మంది వాడారు. భవిష్యత్తు ఏఐ టెక్నాలజీదేనని చెప్పడానికి చాట్జీపీటీ సక్సెస్ కారణమని టెక్ విశ్లేషకులు చెబుతూ వచ్చారు.
వాస్తవంలో మాత్రం పరిస్థితి వేరేలా ఉంది. గతేడాది నవంబర్లో మార్కెట్లో రిలీజైన దగ్గర నుంచి ఈ చాట్బోట్ను ఉపయోగించే వారి సంఖ్య రోజురోజుకీ తగ్గిపోతోందని తెలుస్తోంది. దీనికి వినియోగదారుల్లో కృత్రిమ మేధకు సంబంధించిన టూల్స్, ఇమేజ్ జనరేటర్స్ టూల్స్ వాడాలనే ఆసక్తి తగ్గడమే కారణమని వాషింగ్టన్ పోస్ట్ నివేదించింది. సిమిలర్ వెబ్ రిపోర్టు ప్రకారం కూడా చాట్జీపీటీని ఉపయోగించే సంఖ్య భారీగా తగ్గుతున్నట్లు తెలుస్తోంది. మే, జూన్ నెలల్లో ఏఐ వినియోగదారులు 9.7 శాతం పడిపోయారు. రెగ్యులర్గా కాకుండా సందర్భాన్ని బట్టి చాట్జీపీటీని వాడే యూనిక్ విజిటర్స్ కూడా 5.7 శాతం తగ్గారు. యూఎస్లో అయితే ఈ చాట్బోట్ పరిస్థితి మరింత దారుణంగా తయారైంది.
అమెరికాలో నెలవారీగా 10.3 శాతం మంది యూజర్లు చాట్జీపీటీని వాడటమే మానేశారు. అంతేకాదు, వెబ్సైట్లో విజిటిర్స్ గడిపిన టైమ్ కూడా 8.5 శాతం తగ్గినట్లు సిమిలర్ వెబ్ రిపోర్ట్ పేర్కొంది. ఈ నివేదికను నిశితంగా పరిశీలిస్తే.. నవంబర్ 2022లో మొదలైనప్పటి నుంచి గ్రోత్ రేట్ తటస్థంగా కొనసాగుతూ వచ్చింది. వెబ్సైట్ను విజిట్ చేసే యూజర్ల సంఖ్య ఫిబ్రవరి-మార్చి నెలల్లో 10 బిలియన్ల నుంచి 15 బిలియన్లకు చేరింది. కానీ తర్వాతి రెండు నెలల్లో గ్రోత్ రేట్ తగ్గింది. చాట్జీపీటీతో పాటు వరల్డ్లో రెండో అతిపెద్ద ఏఐ ప్లాట్ఫామ్ అయిన కేరక్టర్ కూడా ఈ తరహా ఇబ్బందులు ఎదుర్కొంటున్నట్లు సిమిలర్ వెబ్ రిపోర్ట్ హైలైట్ చేసింది. ఏఐ టూల్స్కు యూజర్లు తగ్గడానికి ప్రధాన కారణం వాటిపై నమ్మకం కోల్పోవడమేనని తెలుస్తోంది. చాట్జీపీటీలో గత కొన్ని నెలలుగా అనేక సమస్యలు వస్తున్నాయి. ఇప్పుడు యూజర్లు కూడా తగ్గుతుండటంతో దీని పనైపోయిందనే కామెంట్లు వినిపిస్తున్నాయి.
