వన్డే వరల్డ్ కప్కు అంతా రెడీ అయింది. ఇప్పటికే వామప్ మ్యాచ్లు కూడా మొదలయ్యాయి. ప్రతిష్టాత్మక టోర్నీలో పాల్గొనేందుకు ఒక్కో జట్టు భారత్కు చేరుకుంటోంది. ఇటీవలే ఇండియాకు వచ్చిన పాకిస్థాన్, న్యూజిలాండ్ జట్ల మధ్య శుక్రవారం ఉప్పల్ వేదికగా వామప్ మ్యాచ్ జరిగింది. ఇంగ్లండ్ టీమ్ కూడా ఇండియాకు చేరుకుంది. శనివారం ఈ రెండు జట్ల మధ్య గువాహతి వేదికగా వామప్ మ్యాచ్ జరగనుంది. వరుసగా ఆసియా కప్-2023, ఆస్ట్రేలియాపై సిరీస్ విజయాలతో ఫుల్ జోష్లో ఉన్న భారత్.. తమ వరల్డ్ కప్ వేటను పాజిటివ్గా ప్రారంభించేందుకు సిద్ధమవుతోంది. అన్ని విభాగాల్లోనూ జట్టు బలంగా కనిపిస్తోంది.
బ్యాటింగ్, బౌలింగ్, ఫీల్డింగ్.. ఇలా అన్ని విభాగాల్లోనూ టీమిండియా పవర్ఫుల్గా కనిపిస్తోంది. ప్లేయర్లు అందరూ మంచి ఫామ్లో ఉన్నారు. గాయపడిన స్పిన్ ఆల్రౌండర్ అక్షర్ పటేల్ స్థానంలో వచ్చిన సీనియర్ ఆఫ్ స్పిన్నర్ రవిచంద్రన్ అశ్విన్ రాకతో బౌలింగ్ అటాక్ మరింత బలోపేతం అయింది. స్పిన్కు అనుకూలించే స్వదేశీ పిచ్లపై అశ్విన్ అనుభవం టీమ్కు పెద్ద ప్లస్ పాయింట్ అనే చెప్పాలి. అయితే అశ్విన్ సెలెక్షన్పై టీమిండియా దిగ్గజం యువరాజ్ సింగ్ కీలక వ్యాఖ్యలు చేశాడు. అశ్విన్ బదులు యుజ్వేంద్ర చాహల్, వాషింగ్టన్ సుందర్ను జట్టులోకి తీసుకుంటే బాగుండేదన్నాడు. చాహల్ను వరల్డ్ కప్లో ఆడించకపోవడం సరికాదని మండిపడ్డాడు యువీ.
‘చాహల్ను ఆడించకపోవడం తప్పు. ప్లేయింగ్ ఎలెవన్లోకి తీసుకోకపోయినా 15 మంది స్క్వాడ్లోనైనా అతడ్ని ఉంచాల్సింది. లెగ్ స్పిన్నర్లు కీలక టైమ్లో వికెట్లు తీయడంలో ఎంతో ఉపయోగపడతారు. కుల్దీప్ యాదవ్ అద్భుతంగా బౌలింగ్ చేస్తున్నాడు. అయితే టర్నింగ్ ట్రాక్ల పైనా, స్లో వికెట్ల మీదా చాహల్ను ఎదుర్కోవడం చాలా కష్టం. మూడో పేసర్ స్థానాన్ని హార్దిక్ పాండ్యాతో భర్తీ చేయొచ్చు. కాబట్టి చాహల్ను తీసుకోవాల్సింది. స్పిన్ బౌలింగ్తో పాటు బ్యాటుతోనూ రాణించే వాషింగ్టన్ సుందర్ను కూడా తీసుకొని ఉండాల్సింది. ఇక, పేసర్ జస్ప్రీత్ బుమ్రా కమ్బ్యాక్ ఇవ్వడం సంతోషం. ఆసియా కప్ గెలిచినంత మాత్రాన వరల్డ్ కప్ మనదేనని చెప్పలేం. కానీ భారత్ మంచి ఫామ్లో ఉంది’ అని యువరాజ్ చెప్పుకొచ్చాడు.
ఇదీ చదవండి: ఇంగ్లండ్ టీమ్కు చేదు అనుభవం.. BCCIపై బెయిర్స్టో సీరియస్!
