గిల్ ఆరోగ్యంపై అప్​డేట్ ఇచ్చిన బ్యాటింగ్ కోచ్.. ఆయన ఏమన్నాడంటే..!

భీకరమైన ఫామ్​లో ఉన్న టీమిండియా ఓపెనర్​ శుబ్​మన్ గిల్ వన్డే వరల్డ్ కప్​-2023లో మరింత చెలరేగి ఆడతాడని అంతా అనుకున్నారు. కొందరు వెటరన్ క్రికెటర్లయితే ఈసారి ప్రపంచ కప్​లో గిల్ హయ్యెస్ట్ స్కోరర్​గా నిలుస్తాడని అంచనా వేశారు. అయితే బ్యాడ్ లక్. డెంగ్యూ బారిన పడిన ఈ యంగ్ బ్యాటర్ ఆస్ట్రేలియాతో మ్యాచ్​కు దూరమయ్యాడు. ఆ తర్వాత హాస్పిటల్​లో జాయిన్ అయ్యాడని న్యూస్ రావడంతో మొత్తం వరల్డ్ కప్​కు దూరమవుతాడని ఫ్యాన్స్ భయపడ్డారు. ఈ టైమ్​లో గిల్ ఆరోగ్యంపై భారత బ్యాటింగ్ కోచ్ విక్రమ్ రాథోడ్ కీలక అప్​డేట్ ఇచ్చాడు.

గిల్ వేగంగా కోలుకుంటున్నాడని విక్రమ్ రాథోడ్ తెలిపాడు. అతడు హాస్పిటల్​లో చేరిన మాట వాస్తవమేనని.. అయితే ముందు జాగ్రత్తగా ఇలా చేశామన్నాడు. ఎప్పటికప్పుడు డాక్టర్లు అతడ్ని పర్యవేక్షిస్తున్నారని.. త్వరలో అతడు గ్రౌండ్​లోకి తిరిగి అడుగుపెడతాడని ఆశిస్తున్నామని విక్రమ్ రాథోడ్ చెప్పాడు. గిల్ ఇప్పటికే 70 నుంచి 80 శాతం రికవర్ అయ్యాడని.. అయితే అతడు ఏ మ్యాచ్​లో ఆడతాడనేది ఇప్పుడే చెప్పడం కష్టమని పేర్కొన్నాడు. గిల్ హెల్త్​ అప్​డేట్ ఇచ్చిన విక్రమ్ రాథోడ్.. ఈ సందర్భంగా టీమిండియా బ్యాటింగ్ యూనిట్ మీదా ఇంట్రెస్టింగ్ కామెంట్స్ చేశాడు.

గిల్ లేకపోయినా భారత బ్యాటింగ్ యూనిట్ బలంగా, పటిష్టంగా ఉందన్నాడు విక్రమ్ రాథోడ్. ఎక్స్​పీరియన్స్ కలిగిన బ్యాటర్లు టీమ్​లో ఉన్నారని.. ప్రతి ఒక్కరికీ తమ రోల్ ఏంటో చాలా బాగా తెలుసన్నాడు. గ్రౌండ్​లోకి దిగిన తర్వాత ఎలా ఆడాలనే స్వేచ్ఛ వాళ్లకు ఇచ్చామని స్పష్టం చేశాడు. ఏ ఒక్కరి మీదో టీమిండియా బ్యాటింగ్ ఆర్డర్ ఆధారపడదని విక్రమ్ రాథోడ్ చెప్పుకొచ్చాడు. భారత బ్యాటింగ్ కోచ్ వ్యాఖ్యల్ని బట్టి చూస్తే పాకిస్థాన్​తో మ్యాచ్​లో గిల్ బరిలోకి దిగే సూచనలు కనిపిస్తున్నాయి. అయితే డెంగ్యూ వల్ల బలహీనంగా మారిన గిల్​ను అప్పుడే బరిలోకి దించుతారా? ఇంకా కొన్ని మ్యాచులు రెస్ట్ ఇస్తారా? అనేది చూడాలి.

ఇదీ చదవండి: CWC 2023: అది విరాట్ అంటే.. బుమ్రా కోసం కోహ్లీ చేసిన పని వైరల్!