కోహ్లీ సరసన అశ్విన్.. ఇది మామూలు రికార్డు కాదు!

టీమిండియా వెటరన్ స్పిన్నర్ రవిచంద్రన్ అశ్విన్ తన తడాఖా ఏంటో చూపించాడు. బంగ్లాదేశ్​తో జరిగిన తొలి టెస్టులో అటు బౌలింగ్, ఇటు బ్యాటింగ్​లో చెలరేగిపోయాడు. ఒకే మ్యాచ్​తో చాలా రికార్డులు తన మీద రాసుకున్నాడు. అతడితో పాటు రిషబ్ పంత్, శుబ్​మన్ గిల్, రవీంద్ర జడేజా, జస్​ప్రీత్ బుమ్రా కూడా అద్భుతంగా రాణించడంతో భారత్ ఘనవిజయం సాధించింది. ఫస్ట్ టెస్ట్​లో బంగ్లాదేశ్​ను 280 పరుగుల భారీ తేడాతో చిత్తుగా ఓడించింది. పంత్, గిల్ సెంచరీలు బాదినా, జడేజా ఆల్​రౌండ్ పెర్ఫార్మెన్స్​తో దుమ్మురేపినా, బుమ్రా వికెట్లతో వీరవిహారం చేసినా ఈ సక్సెస్​లో అశ్విన్​కే ఎక్కువ క్రెడిట్ దక్కుతుంది. బౌలింగ్​తో పాటు బ్యాటింగ్​లో అతడు చూపిన తెగువ, పోరాటాన్ని ఎంత మెచ్చుకున్నా తక్కువే. ఈ మ్యాచ్​లో అనేక పాత రికార్డులకు పాతర పెట్టిన లెజెండరీ స్పిన్నర్.. మరో అరుదైన ఘనత అందుకున్నాడు. టాప్ బ్యాటర్ విరాట్ కోహ్లీ సరసన స్థానం సంపాదించాడు.

చెన్నై టెస్ట్​లో బ్యాటింగ్​లో సెంచరీతో చెలరేగిన అశ్విన్.. సెకండ్ ఇన్నింగ్స్​లో 6 వికెట్లు తీసి ప్లేయర్ ఆఫ్​ మ్యాచ్​ అవార్డును ఎంచుకున్నాడు. లాంగ్ ఫార్మాట్​లో అతడికి ఇది 10వ ప్లేయర్ ఆఫ్ ది మ్యాచ్ పురస్కారం కావడం విశేషం. భారత్ తరఫున అత్యధిక సార్లు ఈ అవార్డును గెలుచుకున్న మూడో క్రికెటర్​గా నిలిచాడు. ఈ లిస్ట్​లో ఉన్న విరాట్ కోహ్లీ (10), రవీంద్ర జడేజా (10)తో కలసి సంయుక్తంగా మొదటి స్థానంలో నిలిచాడు అశ్విన్. ఇంకో అవార్డు సాధిస్తే వాళ్లిద్దర్నీ దాటేసి కొత్త బెంచ్​మార్క్ క్రియేట్ చేస్తాడు. ఈ మ్యాచ్​తో టెస్ట్ క్రికెట్​లో అత్యధిక సార్లు 5 వికెట్ల ఘనత సాధించిన బౌలర్ల జాబితాలో రెండో స్థానంలోకి ఎగబాకాడు అశ్విన్. అతడు 37 సార్లు ఫైఫర్స్ తీయగా.. శ్రీలంక దిగ్గజం ముత్తయ్య మురళీధరన్ (67) ఫస్ట్ ప్లేస్​లో ఉన్నాడు.

ఈ మ్యాచ్​తో టెస్ట్ క్రికెట్​లో 6 సెంచరీలు పూర్తి చేసుకున్నాడు అశ్విన్. సెంచరీ బాదిన ఓల్డెస్ట్ ఇండియన్ క్రికెటర్స్ లిస్ట్​లో నాలుగో స్థానంలో నిలిచాడు. 5 వికెట్స్ హాల్ తీసిన ఓల్డెస్ట్ ఇండియన్ బౌలర్​గానూ మరో అరుదైన ఘనతను అందుకున్నాడు. ఒకే టెస్ట్​లో సెంచరీ బాదడమే గాక 5 వికెట్లు కూడా తీసిన ఓల్డెస్ట్ ప్లేయర్​గా ఇంకో రికార్డు క్రియేట్ చేశాడు. ఇలా చాలా రికార్డులు తన పేరు మీద రాసుకున్నాడు. ఇక, చెన్నై టెస్ట్ నాలుగో రోజు 515 పరుగుల టార్గెట్​తో బరిలోకి దిగిన బంగ్లాదేశ్ తొలి గంట సేపు బాగానే ఆడింది. ఆ టీమ్ కెప్టెన్ నజ్ముల్ హసన్ షంటో (82), షకీబ్ అల్ హసన్ (25) భారత బౌలర్లను ప్రతిఘటించారు. ముఖ్యంగా షంటో భారీ షాట్లు బాదుతూ భయపెట్టాడు. కానీ జడేజా-అశ్విన్ ద్వయం వాళ్లిద్దరి పని పట్టింది. ఆ తర్వాత వచ్చిన బ్యాటర్లు వచ్చినట్లు పెవిలియన్ దిశగా సాగారు. 234 పరుగులకే ఆ టీమ్ కుప్పకూలింది. అశ్విన్ 6 వికెట్లు తీయగా.. జడ్డూ 3 వికెట్లు పడగొట్టాడు. బుమ్రాకు ఒక వికెట్ దక్కింది.

• ఇదీ చదవండి: కోహ్లీని టార్చర్ చేస్తున్న ఫ్యాన్స్! ఇలా తయారయ్యారేంట్రా?

Most Player of the match awards for India among active players in Tests:

Ravindra Jadeja – 10
Ravichandran Ashwin – 10*
Virat Kohli – 10 pic.twitter.com/egDT7Y6rOY

— Johns. (@CricCrazyJohns) September 22, 2024