వరల్డ్ కప్కు ముందు భారత్కు అన్నీ శుభశకునములే కనిపిస్తున్నాయి. ఎలా ఆడతారో అనే అనుమానాల మధ్య ఆసియా కప్కు బయల్దేరిన టీమిండియాకు ఆ టోర్నీలో ఎదురే లేకుండా పోయింది. సూపర్-4లో పాకిస్థాన్, శ్రీలంకను మట్టికరిపించిన భారత్.. ఫైనల్లో లంకను చిత్తుచిత్తుగా ఓడించి కప్ను కైవసం చేసుకుంది. ఆసియా కప్ అనంతరం ఆస్ట్రేలియా జట్టుతో శుక్రవారం జరిగిన తొలి వన్డేలోనూ గెలిచింది. ఈ విజయం ద్వారా వన్డేల్లో భారత్ ఆగ్రస్థానానికి చేరుకుంది. ఒక్క 50 ఓవర్ల ఫార్మాట్లోనే కాదు.. టీ20, టెస్టుల్లోనూ నెంబర్ వన్ టీమ్గా టీమిండియా అవతరించింది.
భారత జట్టుతో పాటు ప్లేయర్లు కూడా ఐసీసీ ర్యాంకింగ్స్లో అదరగొడుతున్నారు. ఇటీవలే స్టార్ పేసర్ మహ్మద్ సిరాజ్ వన్డేల్లో ప్రపంచ నెంబర్ వన్ బౌలర్ అయ్యాడు. టీ20ల్లో బ్యాటర్ల ర్యాంకింగ్స్లో సూర్యకుమార్ యాదవ్ చాన్నాళ్లుగా ఫస్ట్ ప్లేసులోనే ఉన్నాడు. టెస్టుల్లో సీనియర్ ఆఫ్ స్పిన్నర్ రవిచంద్రన్ అశ్విన్ మొదటి స్థానంలో ఉన్నాడు. ఇలా అన్ని ఫార్మాట్లలోనూ టీమిండియాతో పాటు టీమ్లోని ప్లేయర్లు తమ ఆధిపత్యాన్ని ప్రదర్శిస్తున్నారు. వరల్డ్ కప్కు ముందు ఆసియా కప్, ఆసీస్పై తొలి మ్యాచ్లో గెలుపుతో భారత్ ప్రత్యర్థులకు డేంజర్ సిగ్నల్స్ పంపిస్తోంది.
ఇటీవల కాలంలో భారత బ్యాటర్లు రోహిత్ శర్మ, శుబ్మన్ గిల్, ఇషాన్ కిషన్, విరాట్ కోహ్లీ, హార్దిక్ పాండ్యా మంచి ఫామ్లో ఉన్నారు. కమ్బ్యాక్ ఇచ్చిన కేఎల్ రాహుల్తో పాటు సూర్యకుమార్ యాదవ్ తమ సత్తా ఏంటో చూపించారు. బౌలర్లలో మహ్మద్ సిరాజ్, మహ్మద్ షమి, జస్ప్రీత్ బుమ్రా, కుల్దీప్ యాదవ్ జోరు మీదున్నారు. ఒక్క శ్రేయాస్ అయ్యర్ తన ఫామ్ను చాటుకోవాల్సి ఉంది. అలాగే బౌలింగ్లో అదరగొడుతున్న జడ్డూ.. బ్యాటింగ్లోనూ సత్తా చాటాల్సి ఉంది. ఇప్పటికైతే టీమ్ మంచి ఊపు మీద ఉంది. వరుస విజయాలు కూడా దక్కుతున్నాయి. దీంతో వరల్డ్ కప్ ప్రయాణాన్ని భారత్ మరింత ఆత్మవిశ్వాసంతో ప్రారంభించేందుకు సిద్ధమవుతోంది.
ఇక, ఆసీస్తో తొలి మ్యాచ్లో అదరగొట్టిన టీమిండియా సెప్టెంబర్ 24న ఇండోర్లో జరిగే రెండో వన్డేకు రెడీ అవుతోంది. ఇందులో గెలిచి సిరీస్ను 2-0తో సొంతం చేసుకోవాలని భావిస్తోంది. అయితే భారత జట్టు ఆశలపై వరుణుడు నీళ్లు జల్లే ఛాన్స్ ఉంది. ఈ మ్యాచ్ జరిగే టైమ్లో ఉరుములు, మెరుపులతో కూడిన వర్షం పడే అవకాశం ఉందని అక్కడి వాతావరణ శాఖ వెల్లడించింది. ఆదివారం నాడు ఆకాశం మేఘావృతమై ఉంటుందని పలు నివేదికలు చెబుతున్నాయి. దీంతో క్రికెట్ ఫ్యాన్స్ ఈ మ్యాచ్ జరుగుతుందో లేదో అని టెన్షన్ పడుతున్నారు.
ఇదీ చదవండి: రోహిత్ అంటే భయం.. కోహ్లీ మాటలు లీక్ చేసిన అశ్విన్!
