Nidhan
India vs Sri Lanka: టీమిండియా మరోమారు చెత్త ప్రదర్శనతో అభిమానులను నిరాశపర్చింది. లంకతో జరిగిన మూడో వన్డేలో ఓడి సిరీస్ను సమర్పించుకుంది.
India vs Sri Lanka: టీమిండియా మరోమారు చెత్త ప్రదర్శనతో అభిమానులను నిరాశపర్చింది. లంకతో జరిగిన మూడో వన్డేలో ఓడి సిరీస్ను సమర్పించుకుంది.
Nidhan
టీమిండియా మరోమారు చెత్త ప్రదర్శనతో అభిమానులను నిరాశపర్చింది. లంకతో జరిగిన మూడో వన్డేలో ఓడి సిరీస్ను సమర్పించుకుంది. తొలి వన్డే టై కాగా.. రెండో మ్యాచ్లో ఆతిథ్య జట్టు నెగ్గింది. దీంతో సిరీస్ డిసైడర్గా మారిన ఆఖరి వన్డేలో తప్పక గెలవాల్సిన స్థితిలో బరిలోకి దిగిన రోహిత్ సేన.. ఏకంగా 110 పరుగుల భారీ తేడాతో ఓటమిపాలైంది. బ్యాటర్ల వైఫల్యం టీమ్ను తీవ్రంగా దెబ్బతీసింది. కెప్టెన్ రోహిత్ శర్మ తప్ప సిరీస్లో మిగతా బ్యాటర్లంతా ఫెయిలయ్యారు. బౌలర్లు కూడా లంక కండీషన్స్ను సరిగ్గా వినియోగించుకోలేకపోవడం జట్టుకు బిగ్ మైనస్గా మారింది. అయితే మెన్ ఇన్ బ్లూ ఓటమికి మరో కారణం కూడా ఉంది.
లంక సిరీస్లో భారత్ ఓటమికి మనోడే కారణమని చెప్పాలి. ఆతిథ్య జట్టుకు కోచింగ్ ఇచ్చి భారత్ ఓటమికి కారణంగా మారిన అతడి పేరు జుబిన్ భరూచా. ఇండియన్ ప్రీమియర్ లీగ్లోని రాజస్థాన్ రాయల్స్ జట్టుకు డైరెక్టర్ ఆఫ్ హై-పెర్ఫార్మెన్స్గా ఉన్న జుబిన్ సేవల్ని భారత సిరీస్ కోసం వాడుకుంది లంక. రాజస్థాన్ జట్టుకు డైరెక్టర్ ఆఫ్ క్రికెట్గా ఉన్న కుమార సంగక్కర కోరిక మేరకు లంక జట్టుకు వారం రోజుల పాటు స్పెషల్ ట్రైనింగ్ ఇచ్చేందుకు ఒప్పుకున్నాడు జుబిన్. ఈ సిరీస్కు ముందు ఆ టీమ్ బ్యాటర్లకు ప్రత్యేక శిక్షణ ఇచ్చాడు. మంచి స్టార్ట్ దొరికితే దాన్ని భారీ స్కోరుగా ఎలా మలచాలి? చిన్న చిన్న భాగస్వామ్యాలతో మ్యాచ్ను ఎలా ముందుకు తీసుకెళ్లాలి? టెయిలెండర్స్ రాణించడం టీమ్కు ఎంత ప్లస్ అవుతుంది లాంటి విషయాలకు వాళ్లకు అర్థమయ్యేలా వివరించాడు.
జుబిన్ కోచింగ్ బాగా వర్కౌట్ అయింది. లంక ఓపెనర్లు పతుమ్ నిస్సంక, అవిష్క ఫెర్నాండోతో పాటు కుశాల్ మెండిస్ లాంటి వాళ్లు ఈ సిరీస్లో రాణించారు. దునిత్ వెల్లలాగే లాంటి బౌలర్లు బ్యాట్తోనూ రాణించడం ఆ టీమ్కు బిగ్ ప్లస్ అయింది. ఇదే విషయాన్ని ఆ జట్టు తాత్కాలిక కోచ్ జయసూర్య బయటపెట్టాడు. ‘రాజస్థాన్ టీమ్ నుంచి జుబిన్ను తీసుకొచ్చాం. అతడు జట్టుతో పాటే ఉండి 7 రోజుల పాటు కోచింగ్ ప్రోగ్రామ్ నిర్వహించాడు. అక్కడ మా ఆటగాళ్లు చాలా విషయాలు నేర్చుకున్నారు. భారీ ఇన్నింగ్స్లు ఆడటం, ఎక్కువ సేపు క్రీజులో నిలబడటం ఎలాగో తెలుసుకున్నారు. వాళ్లలో జుబిన్ కాన్ఫిడెన్స్ నింపాడు’ అని జయసూర్య చెప్పుకొచ్చాడు. ఇక, ఇదే జుబిన్ టీమిండియా యంగ్ ఓపెనర్ యశస్వి జైస్వాల్ను తీర్చిదిద్దాడు. అతడికి కొన్ని నెలల పాటు ప్రత్యేక శిక్షణను ఇచ్చి సానబెట్టాడు. ఆ తర్వాత ఐపీఎల్తో పాటు ఇంటర్నేషనల్ క్రికెట్లోనూ జైస్వాల్ తన మార్క్ చూపించాడు.
