వరల్డ్ కప్-2023కి అంతా రెడీ అయిపోయింది. మరో మూడ్రోజుల్లో ఈ మెగా టోర్నీ షురూ కానుంది. ఈసారి కప్ ఎగరేసుకుపోవాలని చాలా జట్లు ఫిక్స్ అయ్యాయి. అయితే వాటిల్లో నాలుగైదు టీమ్స్ మాత్రం ఫేవరెట్స్గా కనిపిస్తున్నాయి. అలాంటి జట్లలో ఒకటి న్యూజిలాండ్. గత రెండు వరల్డ్ కప్స్లో రన్నరప్గా నిలిచిన ఈ జట్టు ఈసారైనా టైటిల్ను అందుకొని ఛాంపియన్గా నిలవాలని అనుకుంటోంది. కెప్టెన్ కేన్ విలియమన్స్ నేతృత్వంలోని టీమ్ చాలా విభాగాల్లో బలంగా కనిపిస్తోంది. భారత గడ్డ మీద ఐపీఎల్లో ఆడిన అనుభవం పలువురు కివీస్ ప్లేయర్లకు ఉంది. ఈ నేపథ్యంలో వచ్చే వరల్డ్ కప్లో న్యూజిలాండ్ గెలుపు అవకాశాలు ఎలా ఉన్నాయి? అసలు ఆ టీమ్ బలం ఏంటి? బలహీనత ఏంటనేది ఇప్పుడు తెలుసుకుందాం..
ప్రస్తుత క్రికెట్లో అత్యంత బలమైన టీమ్స్లో న్యూజిలాండ్ ఒకటి. సూపర్ స్టార్లు లేకపోయినా ఉన్నవారితోనే సమష్టిగా ఆడటం ఆ జట్టు బలం. చివరి వరకు పోరాడటం, ఓటమిని ఒప్పుకోకపోవడం కివీస్లో చూడొచ్చు. అలాంటి న్యూజిలాండ్ జట్టుకు వరల్డ్ కప్స్లో మంచి రికార్డు ఉంది. ఇప్పటిదాకా 12 సార్లు వన్డే వరల్డ్ కప్ జరగ్గా.. 8 సార్లు సెమీస్కు వెళ్లిన ఘనత కివీస్కు ఉంది. దీన్ని బట్టే ఆ జట్టు ఎంత కన్సిస్టెన్స్గా రాణిస్తుందో అర్థం చేసుకోవచ్చు. అయితే ఒక్కసారి కూడా కివీస్ ప్రపంచ కప్ను ముద్దాడలేకపోయింది. 2015, 2019 వరల్డ్ కప్స్లో రన్నరప్గా నిలిచింది. గత వరల్డ్ కప్లోనైతే సూపర్ ఓవర్ తర్వాత బౌండరీ కౌంట్ అనే రూల్ వల్ల న్యూజిలాండ్ తృటిలో కప్పును కోల్పోయింది.
న్యూజిలాండ్ అన్ని విభాగాల్లోనూ పటిష్టంగా కనిపిస్తోంది. ఆ జట్టు కూర్పును చూసుకుంటే.. కెప్టెన్గా కేన్ విలియమ్సన్ నాయకత్వం వహించనున్నాడు. అతడితో పాటు మెయిన్ బ్యాటర్లుగా గ్లెన్ ఫిలిప్స్, విల్ యంగ్ టీమ్లో ఉన్నారు. వికెట్ కీపర్లుగా టామ్ లాథమ్, డెవాన్ కాన్వే.. పేసర్లుగా ట్రెంట్ బౌల్ట్, టిమ్ సౌథీ, లాకీ ఫెర్గూసన్, మ్యాట్ హెన్రీ ఉన్నారు. సీమ్ ఆల్రౌండర్లుగా జిమ్మీ నీషమ్, డ్యారెల్ మిచెల్.. స్పిన్ ఆల్రౌండర్లుగా మిచెల్ శాంట్నర్, రచిన్ రవీంద్ర, మార్క్ చాప్మన్ రూపంలో సత్తా కలిగిన ప్లేయర్లు న్యూజిలాండ్లో ఉన్నారు. ఈ జట్టులో స్పెషలిస్ట్ స్పిన్నర్గా ఇష్ సోధి వ్యవహరించనున్నాడు.
న్యూజిలాండ్ టీమ్లో విలియమ్సన్, బౌల్ట్ లాంటి ఒకరిద్దన్ని మినహాయిస్తే పెద్దగా స్టార్లు కనిపించరు. ఇంగ్లండ్, ఇండియా, ఆస్ట్రేలియాలా పేపర్పై చూసేందుకు ఆ జట్టు బలంగా కనిపించదు. అయినా ప్లేయర్లు అందరూ ఐకమత్యంతో ఆడటం కివీస్ బిగ్గెస్ట్ స్ట్రెంగ్త్ అని చెప్పాలి. ప్రతిసాకి కనీసం సెమీఫైనల్కు చేరుకోవడం ఆ టీమ్కు ఆనవాయితీగా వస్తోంది. మిగతా జట్లతో పోల్చుకుంటే టీమ్ వర్క్తో ఆడటం, ఫీల్డింగ్ అద్భుతంగా చేయడం న్యూజిలాండ్కు పెద్ద ప్లస్ పాయింట్. మ్యాచ్ను చివరి వరకు తీసుకెళ్లడం, ఒక్కో రన్ చేస్తూ ఇన్నింగ్స్ను ముందుకు నడిపించే విలియమ్సన్ లాంటి బ్యాటర్ ఉండటం మరో బలమని చెప్పాలి.
విలియమ్సన్ తన బ్యాటింగ్ ఎబిలిటీస్తో పాటు కెప్టెన్గా టీమ్ను కూల్గా ముందుండి నడిపిస్తాడు. ఎంఎస్ ధోనీలా ఎంత ఒత్తిడి ఉన్నా బయటకు కనిపించకుండా బాగా హ్యాండిల్ చేస్తాడు కేన్ మామ. అలాంటి కెప్టెన్ ఉండటం కివీస్కు బిగ్ ప్లస్. బౌల్ట్ రూపంలో వరల్డ్ క్లాస్ లెఫ్టార్మ్ పేసర్ ఉండటం మరో అడ్వాంటేజ్. అద్భుతమైన పేస్తో బౌలింగ్ వేసే ఫెర్గూసన్ ప్రత్యర్థి బ్యాటర్లకు చుక్కలు చూపగలడు. పేస్తో పాటు మంచి స్పిన్ ఎటాక్ న్యూజిలాండ్ సొంతమని చెప్పాలి. స్పిన్నర్లు మిషెల్ శాంట్నర్, ఇష్ సోధీని ఎదుర్కోవడం ఎంతటి బ్యాట్స్మెన్కైనా కష్టమే. విలియమ్సన్, బౌల్ట్, కాన్వే, ఫెర్గూసన్, నీషమ్కు ఐపీఎల్లో ఆడిన ఎక్స్పీరియెన్స్ ఉంది. ఇవి కివీస్ బలాలుగా చెప్పొచ్చు.
మంచి గేమ్ ఛేంజర్ లాంటి ప్లేయర్ టీమ్లో లేకపోవడం న్యూజిలాండ్కు మైనస్గా చెప్పొచ్చు. గ్లెన్ ఫిలిప్స్ రూపంలో అలాంటి ఒక ఆటగాడు ఉన్నా.. అతడు భారత పిచ్లపై ఆ స్థాయిలో క్లిక్ కాలేదు. విలియమ్సన్ ఉన్నా అతడు ఎక్స్ ఫ్యాక్టర్ అని చెప్పలేం. కేన్ మామ ఇన్నింగ్స్ను ముందుకు తీసుకెళ్లగలడు. కానీ రాస్ టేలర్ మాదిరిగా మ్యాచ్ స్వరూపాన్ని మార్చే సాలిడ్ మ్యాచ్ విన్నర్స్ కివీస్ టీమ్లో కనిపించడం లేదు. ఆ జట్టుకు ఇంజ్యురీ భయం కూడా ఉంది. గాయం తర్వాత కమ్బ్యాక్ ఇస్తున్న విలియమ్సన్ ఎలా ఆడతానేది ఇంట్రెస్టింగ్గా మారింది.
టామ్ లాథమ్ లాంటి బ్యాటర్లతో న్యూజిలాండ్ టాపార్డర్ బలంగా కనిపిస్తోంది. ఇండియాలో అతడి స్ట్రైక్ రేట్ 55గా ఉంది. అయితే మిడిలార్డర్ ఎలా రాణిస్తుందనే దాని మీదే కివీస్ సక్సెస్ ఆధారపడి ఉంది. కేన్ విలియమ్సన్ గనుక ఫెయిలైతే మిడిలార్డర్లో ఆ స్థాయి ప్లేయర్ మరొకరు లేకపోవడం న్యూజిలాండ్కు మైనస్గా చెప్పొచ్చు. టిమ్ సౌథీ గాయం కూడా కివీస్ను ఇబ్బంది పెడుతోంది. ఇంగ్లండ్తో సిరీస్లో అతడి బౌలింగ్ హ్యాండ్కు ఇంజ్యురీ అయింది. ఈ నేపథ్యంలో అతడు ఎప్పుడు ఫిట్ అవుతాడు, అసలు మెగాటోర్నీలో ఆడతాడా లేదా అనేది క్లారిటీ లేదు. సౌథీ లేకపోతే పవర్ప్లేలో వికెట్లు తీయడం కష్టమైపోతుంది. అప్పుడు బౌల్ట్ మీద మరింత ఒత్తిడి పడటం ఖాయం. ఈ బలహీనతల్ని అధిగమిస్తే కివీస్కు తిరుగుండదు. ఆ జట్టు బలాబలాల్ని గమనిస్తే సెమీస్కు చేరడం కాస్త కష్టంగానే కనిపిస్తోంది. కానీ ఎప్పటిలాగే సమిష్టిగా ఆడితే కప్ గెలిచినా ఆశ్చర్యపోనక్కర్లేదు. మరి.. ఈసారి ప్రపంచ కప్లో కివీస్ ఎంతవరకు వెళ్లగలదని మీరు భావిస్తున్నారో కామెంట్ల రూపంలో తెలియజేయండి.
ఇదీ చదవండి: భారత్తో మ్యాచ్ అంటే పాక్ ప్లేయర్లు భయపడుతున్నారు: మాజీ క్రికెటర్
