హాస్పిటల్ బెడ్స్ బుక్ చేసుకుంటున్న క్రికెట్ ఫ్యాన్స్! ఎందుకో తెలుసా?

వరల్డ్ పాపులర్ స్పోర్ట్స్​లో క్రికెట్ ఒకటనేది తెలిసిందే. ఈ గేమ్​ను కొన్ని దేశాల్లో ఎంటర్​టైన్​మెంట్, సరదా కోసం చూస్తారు. కానీ భారత్, పాకిస్థాన్, శ్రీలంక, బంగ్లాదేశ్ లాంటి ఆసియా దేశాల్లో క్రికెట్​ను ఒక మతంగా భావిస్తారనడంలో ఎలాంటి అతిశయోక్తి లేదు. ముఖ్యంగా ఇండియాలో అయితే జెంటిల్మన్​ గేమ్​కు ఓ రేంజ్​లో ఫ్యాన్ ఫాలోయింగ్ ఉంటుంది. ఇక, క్రికెటర్లను అయితే ఇక్కడ హీరోల్లా చూస్తుంటారు. వారికి ఉండే ఫ్యాన్ బేస్ వేరే లెవల్ అనే చెప్పాలి. మన దేశంలో ఎక్కడ క్రికెట్ మ్యాచ్ జరిగినా స్టేడియాలు ఫ్యాన్స్​తో ఫుల్​గా నిండిపోతాయి. తమ అభిమాన క్రికెటర్ల ఆటతీరును చూసేందుకు అభిమానులు వేలాదిగా మైదానాలకు పోటెత్తుతారు.

స్టేడియంలో మ్యాచ్​లను ఎంత మంది చూస్తారో అంతకు ఎన్నో రెట్ల సంఖ్యలో టీవీలు, ఫోన్లలో ఫ్యాన్స్ తిలకిస్తారు. భారత్​ ఆడే మ్యాచ్​లకు వీక్షకాదరణ ఎక్కువగా ఉంటుంది. టీమిండియా ఆడే ఇంటర్నేషనల్ మ్యాచ్​లతో పాటు భారత స్టార్ క్రికెటర్లు ఆడే ఇండియన్ ప్రీమియర్ లీగ్​కు వ్యూయర్​షిప్ కోట్లలో ఉంటుంది. ఇక, వరల్డ్ కప్​ లాంటి టోర్నీలో భారత్ ఆడుతోందంటే ప్రేక్షకులకు స్టేడియాలు సరిపోవు. అందునా దాయాది పాకిస్థాన్​తో టీమిండియా తలపడుతోందంటే ఉత్కంఠత తారస్థాయికి చేరుకుంటుంది. క్రికెట్​లో ఎన్నో భీకరమైన మ్యాచ్​లు ఈ రెండు జట్ల మధ్య జరిగాయి. ఈ ఇరు జట్లు గ్రౌండ్​లో తలపడితే కొదమసింహాలు కొట్లాడుకున్నట్లే ఉంటుంది.

భారత్ వేదికగా త్వరలో జరగనున్న వన్డే వరల్డ్​ కప్​లో ఇండియా-పాకిస్థాన్​ మరోమారు తలపడనున్నాయి. ఈ మ్యాచ్​కు ప్రపంచంలోనే అతిపెద్ద మైదానమైన నరేంద్ర మోడీ స్టేడియం వేదిక కానుంది. దీంతో ఈ మ్యాచ్​ టికెట్లకు ఫుల్ గిరాకీ ఏర్పడింది. టికెట్లతో పాటు అహ్మదాబాద్​లో హోటల్ రూమ్స్​కు కూడా డిమాండ్ ఎక్కువైంది. ఎంతగా అంటే.. రూ.వేలు పలికే రూమ్ రేట్ కాస్తా రూ.లక్షల్లో పలుకుతోందట. దీంతో హోటల్ రూమ్స్ దొరకనివాళ్లు, అంత ధర పెట్టి రూమ్స్​లో ఉండలేని వాళ్లు స్థానిక ఆస్పత్రుల్లో బెడ్స్​ను బుక్ చేసుకుంటున్నారని సమాచారం. ఒక మ్యాచ్​ కోసం ఇలా హాస్పిటల్ బెడ్స్ బుక్ చేయడం బహుశా క్రికెట్ హిస్టరీలో ఇదే ఫస్ట్ టైమ్ కావొచ్చు. మరి.. మ్యాచ్ కోసం ఇలా బెడ్స్​ను బుక్ చేయడంపై మీ అభిప్రాయాలను కామెంట్ల రూపంలో తెలియజేయండి.